પાકિસ્તાનની આર્થિક અને રાજકીય અનિશ્ચિતતા વચ્ચે દેશને વધુ એક આઘાતકો સમાચાર મળ્યા છે, જ્યારે વિશ્વની આઈટી દિગ્ગજ કંપની માઈક્રોસોફ્ટે પાકિસ્તાનમાંથી પોતાનો સત્તાવાર કારોબાર બંધ કરવાનો નિર્ણય લીધો છે. જો કે કંપની તરફથી હજુ સુધી કોઈ સત્તાવાર જાહેરનામું બહાર આવ્યું નથી, પરંતુ પાકિસ્તાનમાં માઈક્રોસોફ્ટના પૂર્વ કાર્યકારી અધિકારી જવાદ રહેમાને પોતાની લિન્કડઇન પોસ્ટ મારફતે આ જાણકારી આપી છે. તેમણે લખ્યું કે, “આજે મને ખબર પડી કે માઈક્રોસોફ્ટે પાકિસ્તાનમાં પોતાની તમામ સત્તાવાર કામગીરી બંધ કરી રહી છે. થોડાક બાકી રહેલા કર્મચારીઓને પણ આ અંગે ઔપચારિક રીતે જાણ કરાઈ ચૂકી છે. માઈક્રોસોફ્ટના એક યુગનો અહીં અંત આવી ગયો છે.”
જવાદ રહેમાને એ પણ ઉમેર્યું કે તેમણે પ્રથમ વખત દેશમાં માઈક્રોસોફ્ટની હાજરી સ્થાપિત કરી હતી અને વર્ષો સુધી કંપનીએ પાકિસ્તાનના ડિજિટલ વિકાસમાં મહત્વપૂર્ણ યોગદાન આપ્યું હતું. માઈક્રોસોફ્ટનો આકસ્મિક વિદાય પાકિસ્તાન માટે માત્ર ટેક્નોલોજી ક્ષેત્રની ક્ષતિ નથી, પરંતુ તે દેશના આર્થિક ભવિષ્ય વિશે ઊંડા પ્રશ્નો ઊભા કરે છે.
માઈક્રોસોફ્ટના નિર્ણય પાછળના સ્પષ્ટ કારણોની જાહેરાત ન થઈ હોય છતાં, નિષ્ણાતોનું માનવું છે કે પાકિસ્તાનની મંદ પડતી આર્થિક સ્થિતિ, વધતા ટેક્સ બોજા, કરન્સી અસ્થિરતા, ટેક્નોલોજી આયાત પર પડતા પ્રતિબંધો અને સતત શાસન પરિવર્તન જેવા તત્વો વિદેશી કંપનીઓ માટે અવિશ્વસનીય વાતાવરણ ઉભું કરે છે. છેલ્લા નાણાકીય વર્ષમાં પાકિસ્તાનની વેપાર ખોટ $24.4 બિલિયન સુધી પહોંચી ગઈ છે અને વિદેશી મુદ્રા ભંડાર પણ ઘટીને $11.5 બિલિયન સુધી સીમિત રહી ગયો છે, જે ટેક્નોલોજી અને આયાત આધારિત ઉદ્યોગો માટે મોટો પડકાર છે.
માઈક્રોસોફ્ટના કદમથી હવે પાકિસ્તાનમાં રોકાણ કરવા ઇચ્છુક અન્ય આંતરરાષ્ટ્રીય કંપનીઓ પણ હચકાઈ શકે છે. ટેક્નોલોજી ઉદ્યોગમાં માઇક્રોસોફ્ટ જેવી દિગ્ગજ કંપનીની કામગીરી બંધ થવાથી સ્થાનિક ઈકોસિસ્ટમ અને ટેલેન્ટ પુલ પર પણ નકારાત્મક અસર પડશે. આ સાથે બેરોજગારીમાં વધારો અને “બ્રેન ડ્રેન” (પ્રતિભા પલાયન)ની પરિસ્થિતિ વધુ ગંભીર બનશે.
આ સંદર્ભમાં પૂર્વ રાષ્ટ્રપતિ ડૉ. આરિફ અલ્વીએ પણ માઈક્રોસોફ્ટના નિર્ણય પર દુઃખ વ્યક્ત કર્યું છે. તેમણે જણાવ્યું કે દેશ હવે અનિશ્ચિતતાના ભયાનક વમળમાં ફસાઈ રહ્યો છે અને આર્થિક સુધારાની આશા એક અગમ્ય સ્વપ્ન જેવી લાગે છે. તેમણે ખાસ કરીને યુવા પેઢી માટે ઉચ્ચ રોજગારની તકો ઘટતી હોવાની ચિંતાની રજૂઆત પણ કરી.
Microsoft’s decision to shut down operations in Pakistan is a troubling sign for our economic future. I vividly recall February 2022, when Bill Gates visited my office. On behalf of the people of Pakistan, I had the honor of conferring the Hilal-e-Imtiaz on him for his remarkable… pic.twitter.com/T4SMkp6Mn0
— Dr. Arif Alvi (@ArifAlvi) July 3, 2025
સારાંશરૂપે, માઈક્રોસોફ્ટના આ પગલાંથી પાકિસ્તાનની આંતરરાષ્ટ્રીય છબી, રોકાણ માટેની આકર્ષણતા અને ટેક્નોલોજી ક્ષેત્રમાં વિકાસ માટેની સંભાવનાઓ બધુંજ ખતરામાં મૂકાયું છે. જો પાકિસ્તાને હવે પણ આર્થિક અને શાસન વ્યવસ્થામાં સામૂહિક સુધારા ન લાવે, તો આવી વિદેશી કંપનીઓના વિદાયને આવનાર દિવસોમાં નિયમિત ઘટના માનવી પડશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
