G7 સમિટમાં ભાગ લેવા માટે વડાપ્રધાન નરેન્દ્ર મોદી જાપાનના હિરોશિમામાં છે. આ દરમિયાન તેઓ ત્યાં હાજર ઘણા દેશોના નેતાઓ સાથે દ્વિપક્ષીય વાતચીત પણ કરશે. આ પહેલા તેમણે જાપાની અખબારને ખાસ ઈન્ટરવ્યુ આપ્યો હતો. આ લેખિત મુલાકાતમાં તેમણે G20ના પ્રમુખપદથી લઈને પરમાણુ હથિયારોના ઉપયોગ સુધીના અનેક મુદ્દાઓ પર ખુલીને વાત કરી હતી.
આ દરમિયાન તેમણે કહ્યું કે વૈશ્વિક પડકારોને ઉકેલવામાં G7 અને G20 વચ્ચે સહયોગ ખૂબ જ મહત્વપૂર્ણ છે. આ સાથે, તેમણે વિકાસશીલ અને ઉભરતા દેશોના પડકારોનો ઉકેલ શોધવામાં આંતરરાષ્ટ્રીય સમુદાયનું નેતૃત્વ કરવાની તેમની પ્રતિબદ્ધતા પણ વ્યક્ત કરી. તેમણે કહ્યું કે, ખાદ્ય સુરક્ષા અને શાંતિ અને સુરક્ષા જેવા વૈશ્વિક પડકારોનો સામનો કરવા માટે G7 અને G20 વચ્ચે સહયોગને મજબૂત બનાવવો જરૂરી છે.
આ દરમિયાન પરમાણુ હુમલા અંગે વાત કરતા તેમણે કહ્યું કે પરમાણુ હથિયારોનો ઉપયોગ કોઈપણ કિંમતે સ્વીકાર્ય નથી. જાપાનના વડાપ્રધાન કિશિદા દ્વારા પ્રસ્તાવિત વિશ્વને પરમાણુ શસ્ત્રો મુક્ત બનાવવા માટે તેઓ વિશ્વના તમામ દેશો સાથે કામ કરવા તૈયાર છે.
આ સિવાય પીએમ મોદીએ રશિયા-યુક્રેન યુદ્ધ પર ખુલ્લેઆમ પોતાનો અભિપ્રાય વ્યક્ત કર્યો હતો અને સમગ્ર મુદ્દાને શાંતિ અને વાતચીત દ્વારા ઉકેલવા પર ભાર મૂક્યો હતો. તેમના મતે, યુદ્ધની આગમાં સળગી રહેલા લોકોના ભલા માટે રશિયા અને યુક્રેન વચ્ચેના તણાવને વાતચીત અને કૂટનીતિ દ્વારા ઉકેલવો જોઈએ. બીજી તરફ આ મામલે જ્યારે યુનાઈટેડ નેશન્સ જનરલ એસેમ્બલીમાં ભારતના વોટિંગથી દૂર રહેવા વિશે પૂછવામાં આવ્યું ત્યારે પીએમ મોદીએ કહ્યું કે ભારત યુનાઈટેડ નેશન્સ જનરલ એસેમ્બલીના યુદ્ધની નિંદા કરવાના ઠરાવથી દૂર રહ્યું, પરંતુ સંયુક્ત રાષ્ટ્ર ચાર્ટર , આંતરરાષ્ટ્રીય કાયદો , હંમેશા સાર્વભૌમત્વ અને પ્રાદેશિક અખંડિતતા જાળવવા માટે પ્રતિબદ્ધ છે.
પીએમ મોદીના મતે, ભારતનું અત્યારે સૌથી પહેલું ધ્યાન કોરોના મહામારી, આતંકવાદ અને જળવાયુ પરિવર્તન જેવી સમસ્યાઓના ઉકેલ શોધવા પર છે. આ સમસ્યાઓ વિકાસશીલ દેશોને ઘણી અસર કરી રહી છે. આ સાથે તેમણે જાપાન અને અન્ય દેશોના સહયોગથી માનવ-કેન્દ્રિત વિકાસ પર ભાર મૂકવાની વાત કરી હતી.
બીજી તરફ જ્યારે તેમને દક્ષિણ ચીન અને પૂર્વ ચીન સાગરમાં ચીનના સૈન્ય વિસ્તરણ અને તાઈવાનમાં વધતા તણાવ અંગે ભારતના વલણ અંગે સવાલ કરવામાં આવ્યો, ત્યારે પીએમ મોદીએ કહ્યું કે ભારત માને છે કે વિવાદો શાંતિપૂર્ણ રીતે ઉકેલવા જોઈએ અને આંતરરાષ્ટ્રીય કાયદાનું પાલન કરવું જોઈએ. તેમના મતે, ભારત આંતરરાષ્ટ્રીય કાયદાના આધારે દરિયાઈ વિવાદોને શાંતિપૂર્ણ રીતે ઉકેલીને તેની સાર્વભૌમત્વ અને અખંડિતતાના રક્ષણ માટે પ્રતિબદ્ધ છે.
