ગુજરાતના ગૌરવ અને એશિયાટિક સિંહોના એકમાત્ર કુદરતી નિવાસસ્થાન એવા ગીર જંગલમાંથી રાહતના સમાચાર સામે આવ્યા છે. થોડા સમય પહેલાં ગીર પૂર્વ અને પશ્ચિમ રેન્જમાં કેટલાક સિંહોમાં ‘બેબેસિયા’ અને અન્ય ચેપી રોગોના લક્ષણો જોવા મળતાં વન વિભાગ ચિંતામાં મુકાયો હતો. સિંહોના સ્વાસ્થ્ય પર સંભવિત ખતરો ઉભો થતાં તંત્રે તાત્કાલિક પગલાં ભર્યા હતા.
વન વિભાગે સાવચેતીના ભાગરૂપે બીમાર અને શંકાસ્પદ કુલ 17 સિંહોને જસાધાર અને જામવાળા એનિમલ કેર સેન્ટરમાં ખસેડીને આઇસોલેશનમાં રાખ્યા હતા. અહીં નિષ્ણાત પશુચિકિત્સકો અને વનતારાની ટીમ દ્વારા સતત સારવાર અને મોનિટરિંગ શરૂ કરવામાં આવ્યું હતું.
સારવાર સફળ, 12 સિંહોને જંગલમાં મુક્ત કરાયા
વન વિભાગના તાજેતરના અહેવાલ મુજબ સારવાર હેઠળ રહેલા 17 સિંહોમાંથી 12 સિંહો હવે સંપૂર્ણપણે સ્વસ્થ થઈ ગયા છે. તેમના આરોગ્યમાં નોંધપાત્ર સુધારો થતાં તેમને ફરીથી તેમના કુદરતી વસવાટ ક્ષેત્ર એટલે કે ગીરના જંગલમાં મુક્ત કરી દેવામાં આવ્યા છે.
મળતી માહિતી મુજબ જસાધાર એનિમલ કેર સેન્ટરમાંથી 4 અને જામવાળા સેન્ટરમાંથી 7 સિંહોને મુક્ત કરવામાં આવ્યા છે. બાકીના સિંહો હજુ નિરીક્ષણ હેઠળ રાખવામાં આવ્યા છે, જોકે તેમની તબિયતમાં પણ સતત સુધારો નોંધાઈ રહ્યો છે.
કોઈ નવા મોત નહીં, સ્થિતિ સંપૂર્ણ નિયંત્રણમાં
સમગ્ર પરિસ્થિતિની સમીક્ષા કરવા રાજ્યના વનમંત્રી અર્જુન મોઢવાડિયાએ એનિમલ કેર સેન્ટરોની મુલાકાત લીધી હતી. મુલાકાત બાદ તેમણે જણાવ્યું કે હાલ સ્થિતિ સંપૂર્ણપણે નિયંત્રણમાં છે અને સિંહોમાં કોઈ નવા મોત નોંધાયા નથી.
તેમણે સ્પષ્ટતા કરી કે સિંહોના મૃત્યુ પાછળ કોઈ ગંભીર અથવા અત્યંત ખતરનાક વાયરસ જવાબદાર હોવાનું સામે આવ્યું નથી. વન વિભાગ અને પશુચિકિત્સા ટીમની ઝડપી કામગીરીને કારણે સ્થિતિ પર સફળતાપૂર્વક કાબૂ મેળવી લેવાયો છે.
600 સિંહોનું ડી-ટિકિંગ અને ડી-વોર્મિંગ
રોગચાળાને વધુ ફેલાતો અટકાવવા માટે વન વિભાગે ગીર વિસ્તારના આશરે 600 જેટલા સિંહોનું ડી-ટિકિંગ (Tick Removal) અને ડી-વોર્મિંગ (Deworming) હાથ ધર્યું છે. ઉપરાંત સમગ્ર ગીર વિસ્તારમાં જંતુનાશક કામગીરી કરીને વિસ્તારને જંતુમુક્ત બનાવવામાં આવ્યો છે.
વન વિભાગની ટીમો સતત સિંહોની હિલચાલ, આરોગ્ય અને વર્તન પર નજર રાખી રહી છે. નિષ્ણાતોના મતે સમયસર લેવામાં આવેલા પગલાંને કારણે સંભવિત મોટા સંકટને ટાળી શકાયું છે.
ગીરના સિંહોની સુરક્ષા માટે સતત મોનિટરિંગ
વન વિભાગે જણાવ્યું છે કે ગીરના સિંહોની સુરક્ષા અને આરોગ્ય જાળવવા માટે સતત મોનિટરિંગ કરવામાં આવી રહ્યું છે. આગામી દિવસોમાં પણ આરોગ્ય તપાસ, સર્વેલન્સ અને જરૂરી સારવારની કામગીરી ચાલુ રહેશે જેથી ગીરના અમૂલ્ય વન્યજીવ વારસાને સુરક્ષિત રાખી શકાય.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
