મહારાષ્ટ્રના નાશિક સ્થિત Tata Consultancy Services (TCS) ના BPO યુનિટમાંથી બહાર આવેલા મહિલાઓના ઉત્પીડન અને ધર્માંતરણ સંબંધિત કેસમાં પોલીસ તપાસ આગળ વધતા નવા-નવા ખુલાસા થઈ રહ્યા છે. પોલીસ મુજબ, આ કેસમાં સંકળાયેલ આરોપીઓ એક સુવ્યવસ્થિત ગેંગ તરીકે કામ કરતા હતા અને તેમનો મુખ્ય ટાર્ગેટ 18થી 25 વર્ષની યુવતીઓ હતી.
આ મામલે અત્યાર સુધીમાં 9 FIR નોંધવામાં આવી છે, જેમાં અનેક આરોપીઓની ધરપકડ થઈ ચૂકી છે, જ્યારે કેટલાક હજુ ફરાર છે. પોલીસ દ્વારા કેન્દ્રીય એજન્સીઓ સાથે સંપર્ક કરી તપાસનો વ્યાપ વધારવામાં આવ્યો છે.
ગેંગની કાર્યપદ્ધતિ સામે આવી
તપાસમાં સામે આવ્યું છે કે આ ગેંગ નવા જોડાતા કર્મચારીઓની પર્સનલ પ્રોફાઇલ પર નજર રાખતી હતી. આ લોકો ખાસ કરીને એવી યુવતીઓને નિશાન બનાવતા હતા, જેમને આર્થિક જરૂરિયાત વધુ હોય.
એકવાર ટાર્ગેટ નક્કી થયા બાદ, પીડિતાને શારીરિક અને માનસિક ત્રાસ આપવામાં આવતો અને તેના પર ધાર્મિક પરિવર્તન માટે દબાણ કરવામાં આવતું હતું. પોલીસના જણાવ્યા મુજબ આ ગેંગ ‘ટાર્ગેટ આધારિત’ રીતે કામ કરતી હતી.
આ ગેંગમાં અનેક લોકો સંકળાયેલા હોવાનું સામે આવ્યું છે, જેમાં કેટલાક મુખ્ય આરોપીઓના નામ પણ જાહેર થયા છે.
HR મેનેજર પર ગંભીર આરોપ
આ કેસમાં ઓફિસના અંદરના લોકોની સંડોવણી સામે આવી છે. HR મેનેજર નિદા ખાન પર આરોપ છે કે તેમણે પીડિતાઓની ફરિયાદોને અવગણવી અને આરોપીઓનો બચાવ કર્યો હતો.
પોલીસ મુજબ, આ કારણે આ ગુનાહિત પ્રવૃત્તિ વર્ષ 2022થી સતત ચાલી રહી હતી. નિદા ખાનને ધરપકડ બાદ 28 એપ્રિલ સુધી જ્યુડિશિયલ કસ્ટડીમાં મોકલવામાં આવી છે, જ્યારે બીજી મહિલા આરોપી હજુ ફરાર છે.
પીડિતાઓના ચોંકાવનારા આક્ષેપ
FIRમાં સમાવિષ્ટ પીડિતાઓએ ગંભીર આક્ષેપો કર્યા છે. તેઓના જણાવ્યા મુજબ:
- તેમને ઓફિસના ટેરેસ પર એકલા કામ કરવા મજબૂર કરવામાં આવતું
- સુરક્ષાના બહાને પર્સનલ સામાન જપ્ત કરાતો
- નમાજ અદા કરવા અને નોન-વેજ ખાવા માટે દબાણ
- હિંદુ દેવી-દેવતાઓ અંગે અપમાનજનક ટિપ્પણીઓ સહન કરાવાતી
આ તમામ આક્ષેપોને લઈને પોલીસે વિગતવાર તપાસ શરૂ કરી છે.
ફોરેન ફન્ડિંગ અને આતંકી કનેક્શનની તપાસ
કેસની ગંભીરતા જોતાં હવે વિદેશી ફન્ડિંગ અને અન્ય સંભવિત કનેક્શન્સની પણ તપાસ ચાલી રહી છે. નાશિક પોલીસ કમિશનરે જણાવ્યું કે સોશિયલ મીડિયા પર ઉઠેલા સવાલોને ધ્યાનમાં રાખીને National Investigation Agency (NIA), ATS અને સ્ટેટ ઇન્ટેલિજન્સ ડિપાર્ટમેન્ટ (SID) ને પત્રો લખવામાં આવ્યા છે.
હાલ સુધી કોઈ ચોક્કસ પુરાવા મળ્યા નથી, પરંતુ દરેક પાસાંની ઊંડાણપૂર્વક તપાસ ચાલુ છે.
SIT દ્વારા તપાસ તેજ
આ સમગ્ર કેસની તપાસ માટે સ્પેશિયલ ઇન્વેસ્ટિગેશન ટીમ (SIT) રચવામાં આવી છે. SIT દ્વારા આરોપીઓના ઈમેઈલ, ચેટ રેકોર્ડ્સ અને બેન્ક ટ્રાન્ઝેક્શનની તપાસ કરવામાં આવી રહી છે.
શરૂઆતમાં પીડિતાઓ ડરના કારણે આગળ આવતી નહોતી, પરંતુ મહિલા પોલીસ અધિકારીઓ દ્વારા કાઉન્સેલિંગ બાદ હવે અનેક પીડિતાઓએ પોતાની આપવીતી જણાવી છે, જેના કારણે કેસ વધુ મજબૂત બન્યો છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
