કારોબારી સપ્તાહના ત્રીજા દિવસે ભારતીય શેરબજાર લીલા નિશાન પર ખુલ્યું. બીએસઈ પર સેન્સેક્સ 207 પોઈન્ટના ઉછાળા સાથે 76,231.92 પર ખુલ્યો. જયારે NSE પર નિફ્ટી 0.20 ટકાના વધારા સાથે 23,212.70 પર ખુલ્યો.
બજાર ખુલતાની સાથે જ, નિફ્ટી પર ટાટા કન્ઝ્યુમર, ટ્રેન્ટ, ટેક મહિન્દ્રા, ઝોમેટો, ઓએનજીસી વધારા સાથે ટ્રેડ કરી રહ્યા છે, જ્યારે એચયુએલ, એચસીએલ ટેક્નોલોજીસ, ડૉ. રેડ્ડીઝ લેબ્સ, એનટીપીસી અને રિલાયન્સ ઇન્ડસ્ટ્રીઝ નુકસાન સાથે ટ્રેડ કરી રહ્યા છે.
વૈશ્વિક બજારમાં વૃદ્ધિ
એશિયન બજારોમાં, જાપાનના નિક્કી 0.04%, હોંગકોંગના હેંગ સેંગ ઇન્ડેક્સ 0.17% અને ચીનના શાંઘાઈ કમ્પોઝિટમાં 0.24% ની તેજી છે. 1 એપ્રિલના રોજ, અમેરિકાનો ડાઉ જોન્સ 0.028% ઘટીને 41,989 પર બંધ થયો. નાસ્ડેક કમ્પોઝિટમાં 0.87% તેજી રહી, જ્યારે S&P 500 ઇન્ડેક્સ 0.38% વધીને બંધ થયો. 1 એપ્રિલના રોજ, વિદેશી રોકાણકારો (FII) એ 5,901 કરોડ રૂપિયાના શેર વેચ્યા જયારે, સ્થાનિક રોકાણકારો (DII) એ 4,322 કરોડ રૂપિયાના શેર ખરીદ્યા.
મંગળવારનું બજાર
ટ્રેડિંગ સપ્તાહના બીજા દિવસે શેરબજાર ભારે ઘટાડા સાથે રેડ ઝોનમાં બંધ થયું. બીએસઈ પર સેન્સેક્સ 1390 પોઈન્ટ ઘટીને 76,024.51 પર બંધ થયો. જયારે NSE પર નિફ્ટી 1.45 ટકાના ઘટાડા સાથે 23,179.35 પર બંધ થયો. ટ્રેડિંગ દરમિયાન, નિફ્ટીમાં ટોપ ગેઇનર્સની યાદીમાં ઇન્ડસઇન્ડ બેંક, ટ્રેન્ટ, બજાજ ઓટો, જિયો ફાઇનાન્શિયલ, એચડીએફસી લાઇફના શેર સામેલ રહ્યા. જ્યારે HCL ટેક્નોલોજીસ, બજાજ ફિનસર્વ, HDFC બેંક, ઇન્ફોસિસ, હિન્ડાલ્કો ઇન્ડસ્ટ્રીઝના શેર ટોપ લૂઝર્સ શેરોની યાદીમાં સામેલ હતા.
બીએસઈ મિડકેપ ઈન્ડેક્સ 0.9 ટકા ઘટ્યો અને સ્મોલકેપ ઈન્ડેક્સ 0.2 ટકા વધ્યો. મીડિયા, ઓઇલ એન્ડ ગેસ, ટેલિકોમ સિવાય, બાકીના બધા સૂચકાંકો લાલ નિશાનમાં ટ્રેડ થયા. આઇટી, રિયલ્ટી અને કન્ઝ્યુમર ડ્યુરેબલ્સમાં 2-2 ટકાનો ઘટાડો થયો. મંગળવારે ભારતીય શેરબજારો સતત બીજા સત્રમાં ઘટ્યા હતા, જેમાં આઇટી અને બેંકિંગ શેરોએ સેન્સેક્સ અને નિફ્ટીમાં ભારે ઘટાડો નોંધાયો. યુએસ પ્રમુખ ડોનાલ્ડ ટ્રમ્પ પારસ્પરિક ટેરિફ લાદી શકે તેવી ચિંતા વચ્ચે રોકાણકારોનું વલણ સાવધ રહ્યું. બીએસઈ પર લિસ્ટેડ બધી કંપનીઓનું કુલ બજાર મૂડીકરણ 1.25 લાખ કરોડ રૂપિયા ઘટીને રૂ. 411.62 લાખ કરોડ રહી ગયું.
