આમ આદમી પાર્ટી (AAP)ને સુપ્રીમ કોર્ટ તરફથી મોટો ઝટકો લાગ્યો છે. સુપ્રીમ કોર્ટે દિલ્હી મ્યુનિસિપલ કોર્પોરેશન (MCD)માં સરકારની સંમતિ લીધા વિના 10 એલ્ડરમેનની નિમણૂક કરવાના એલજી વીકે સક્સેનાના નિર્ણયને માન્ય રાખ્યો છે. દેશની સૌથી મોટી અદાલતને આમાં કાયદાનું ઉલ્લંઘન જણાયું નથી. સુપ્રીમ કોર્ટે દિલ્હી સરકારની એ દલીલને ફગાવી દીધી હતી કે એલજી ‘એલ્ડરમેન’ને નોમિનેટ કરવા માટે મંત્રી પરિષદની સલાહને અનુસરવા માટે બંધાયેલા છે.
જસ્ટિસ પીએસ નરસિમ્હાએ સોમવારે આ નિર્ણય આપ્યો હતો. આ કેસની સુનાવણી ચીફ જસ્ટિસ ડીવાય ચંદ્રચુડની આગેવાની હેઠળની બેન્ચે કરી હતી. જસ્ટિસ જે.બી.પારડીવાલા પણ બેન્ચમાં સામેલ હતા. ચુકાદો આપતા, જસ્ટિસ નરસિમ્હાએ કહ્યું કે એલ્ડરમેનની નિમણૂક એ એલજીની વૈધાનિક ફરજ છે અને તે તેને પરિપૂર્ણ કરવા માટે રાજ્ય કેબિનેટની સલાહ લેવા માટે બંધાયેલા નથી.
સુપ્રીમ કોર્ટે લગભગ 15 મહિના સુધી આ મુદ્દે પોતાનો નિર્ણય સુરક્ષિત રાખ્યો હતો. ગયા વર્ષે 17 મેના રોજ, સર્વોચ્ચ અદાલતે કહ્યું હતું કે લેફ્ટનન્ટ ગવર્નરને MCDમાં ‘એલ્ડરમેન’ નામાંકિત કરવાની સત્તા આપવાનો અર્થ એ થશે કે તે ચૂંટાયેલી મ્યુનિસિપલ સંસ્થાને અસ્થિર કરી શકે છે. MCDમાં 250 ચૂંટાયેલા અને 10 નામાંકિત સભ્યો છે.
ડિસેમ્બર 2022 માં, AAP એ મ્યુનિસિપલ કોર્પોરેશનની ચૂંટણીમાં 134 વોર્ડ જીતીને MCD પર ભારતીય જનતા પાર્ટી (BJP) ના 15 વર્ષના શાસનનો અંત કર્યો. ભાજપે 104 બેઠકો જીતી હતી જ્યારે કોંગ્રેસ 9 બેઠકો સાથે ત્રીજા ક્રમે રહી હતી.
