અમદાવાદ મ્યુનિસિપલ કોર્પોરેશન (AMC) દ્વારા વર્ષ 2026-27 માટે ₹17,108 કરોડનું ડ્રાફ્ટ બજેટ રજૂ કરવામાં આવ્યું હતું, જેમાં શહેરના વિકાસ માટે અનેક મહત્વપૂર્ણ પ્રોજેક્ટ્સનો સમાવેશ કરવામાં આવ્યો હતો. જોકે, બજેટમાં દક્ષિણ ઝોનના શાહવાડી-બહેરામપુરા વિસ્તારમાં અદ્યતન સ્લોટર હાઉસ (કતલખાના) માટે ફાળવવામાં આવેલા ₹32 કરોડના પ્રસ્તાવે રાજકીય ગરમાવો વધારી દીધો હતો. ખાસ કરીને શાસક પક્ષ ભાજપના નેતાઓએ આ જોગવાઈનો ઉગ્ર વિરોધ કરતા અંતે પાલિકાને નિર્ણય પાછો ખેંચવાનો વારો આવ્યો, જેના કારણે આખું બજેટ રાજકીય ચર્ચાનું કેન્દ્ર બની ગયું છે.
બજેટ રજૂ થયા બાદ મેયરના બંગલે યોજાયેલી ઉચ્ચસ્તરીય બેઠકમાં મેયર, સ્ટેન્ડિંગ કમિટીના ચેરમેન, ધારાસભ્યો અને સંગઠનના અગ્રણીઓ હાજર રહ્યા હતા. બેઠક દરમિયાન સ્લોટર હાઉસ માટેના બજેટ પ્રસ્તાવ પર ભાજપના નેતાઓએ કડક વલણ અપનાવી કહ્યું હતું કે મૂંગા પશુઓના વધ માટે અલગથી મોટી રકમ ફાળવવી સ્વીકાર્ય નથી. પક્ષની અંદરથી જ ઉઠેલા વિરોધ અને લોકલાગણીને ધ્યાનમાં રાખીને સ્ટેન્ડિંગ કમિટીના ચેરમેને આ પ્રોજેક્ટની દરખાસ્ત રદ કરવાની બાંહેધરી આપી હતી, જેના પરિણામે AMCએ નિર્ણય પાછો ખેંચવાની જાહેરાત કરી.
બજેટમાં સૂચિત સ્લોટર હાઉસ પ્રોજેક્ટને આધુનિક સુવિધાઓ સાથે વિકસાવવાની યોજના હતી. ટી.પી. 32 (શાહવાડી-બહેરામપુરા) વિસ્તારમાં અંદાજે 15,882 સ્ક્વેર મીટર જમીન પર 24×7 પશુચિકિત્સક સેવા, એન્ટીમોર્ટમ રૂમ, ચિલિંગ ફેસિલિટી, એસી ટ્રાન્સપોર્ટ વાહનો, બ્લડ ટ્રીટમેન્ટ માટે રેન્ડરિંગ પ્લાન્ટ અને એફલુએન્ટ ટ્રીટમેન્ટ પ્લાન્ટ (ETP) જેવી વ્યવસ્થાઓ ઊભી કરવાની દરખાસ્ત હતી. આ પ્રોજેક્ટ સુપ્રીમ કોર્ટ અને કેન્દ્ર સરકારની માર્ગદર્શિકા મુજબ આધુનિક અને હાઇજેનિક વ્યવસ્થા ઉભી કરવા માટે બનાવાયો હતો.
સૂત્રોના જણાવ્યા મુજબ, અગાઉ સંકલન સમિતિની બેઠક દરમિયાન ધારાસભ્ય ઈમરાન ખેડાવાલાએ વર્તમાન સ્લોટર હાઉસને એસ.ટી. સ્ટેન્ડ નજીકથી પીપળજ તરફ ખસેડવાની અને હાલની જગ્યાએ નાગરિકો માટે પાર્ટી પ્લોટ બનાવવાની સૂચના આપી હતી. જોકે, ભાજપે આ મુદ્દાને પશુહિંસા અને ધાર્મિક લાગણીઓ સાથે જોડીને વિરોધ નોંધાવતા પ્રોજેક્ટને અટકાવી દીધો. શહેરના વિકાસ માટે ₹17 હજાર કરોડથી વધુનું બજેટ રજૂ થયું હોવા છતાં, સ્લોટર હાઉસ મુદ્દે ઉભેલા વિવાદે સમગ્ર બજેટ ચર્ચાને એક અલગ દિશામાં ધકેલી દીધું છે. હાલમાં નિર્ણય મોકૂફ રાખવામાં આવતા રાજકીય તણાવ થોડો શાંત થયો છે, પરંતુ આ મુદ્દો આવનારા સમયમાં ફરી ચર્ચામાં આવવાની શક્યતા છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
