કંડલા એરપોર્ટથી મુંબઈ જતી સ્પાઈસજેટની Q400 ફ્લાઇટ સાથે શુક્રવારે 12 સપ્ટેમ્બરના રોજ એક મોટી દુર્ઘટના ટળી ગઈ. અહેવાલો મુજબ, વિમાન ટેકઓફ કર્યા બાદ તરત જ તેનો એક પૈડો તૂટીને રનવે પર પડી ગયો હતો. કંડલા એર ટ્રાફિક કંટ્રોલ (ATC)એ તરત જ આ ઘટનાની નોંધ લીધી અને મુંબઈ એરપોર્ટને સતર્ક કરી આપત્કાળીન પરિસ્થિતિ જાહેર કરી. મુસાફરોમાં એક ક્ષણ માટે ભયનું માહોલ સર્જાયો હતો, પરંતુ પાયલોટની સમજદારી અને કુશળતાના કારણે વિમાન મુંબઈ એરપોર્ટ પર સાંજે લગભગ ચાર વાગ્યે સુરક્ષિત રીતે ઉતર્યું. વિમાનમાં સવાર બધા મુસાફરો સલામત હતા અને ઉતરાણ બાદ તેમને વિમાનમાંથી સુરક્ષિત રીતે બહાર કાઢવામાં આવ્યા.
સ્પાઈસજેટના પ્રવક્તાએ સ્પષ્ટ કર્યું કે ટેકઓફ પછી કંડલા રનવે પર વિમાનનું પૈડું પડેલું મળી આવ્યું હતું. તેમ છતાં, વિમાનને નિયંત્રણમાં રાખીને તે મુંબઈ સુધી સલામત રીતે ઉડાવવામાં આવ્યું અને વિમાનને ટર્મિનલ સુધી લાવવામાં આવ્યું. એરપોર્ટ ઓથોરિટી ઓફ ઈન્ડિયાના એક અધિકારીએ જણાવ્યું કે ATCના કર્મચારીઓને વિમાન ટેકઓફ થયા પછી કંઈક પડતું દેખાયું હતું. જ્યારે ATCની ટીમે તપાસ કરી, ત્યારે રનવે પરથી ધાતુની રિંગ અને વિમાનનું પૈડું મળી આવ્યું હતું. આ ઘટનાએ એરલાઇનની ટેક્નિકલ સુરક્ષા અને મેન્ટેનન્સ સિસ્ટમ પર ગંભીર પ્રશ્નો ઊભા કર્યા છે.
આ ઘટના સાથે જ મુસાફરોને એરલાઇન સલામતી અંગેની ચિંતાઓ યાદ અપાવી દે છે. થોડા જ દિવસો પહેલા, એર ઇન્ડિયાની દિલ્હીથી સિંગાપુર જતી ફ્લાઇટ નંબર AI2380માં ટેક્નિકલ સમસ્યા સર્જાઈ હતી. વિમાનના કેબિનમાં કૂલિંગ સિસ્ટમ યોગ્ય રીતે કાર્ય ન કરતી હોવાથી અંદરનું તાપમાન અસહ્ય બની ગયું હતું. પરિણામે મુસાફરોને પહેલેથી જ વિમાનમાંથી ઉતારવા પડ્યા હતા અને તેમને કલાકો સુધી એરપોર્ટ પર રાહ જોવી પડી હતી. લગભગ છ કલાકના વિલંબ બાદ ફ્લાઇટને ફરી શરૂ કરવામાં આવી હતી. એર ઇન્ડિયાએ પોતાના નિવેદનમાં આ વિલંબનું કારણ “કેબિન કૂલિંગ સમસ્યા” હોવાનું જણાવ્યું હતું.
આ બંને ઘટનાઓ બતાવે છે કે ભારતની આંતરિક અને આંતરરાષ્ટ્રીય ઉડાનોમાં ટેક્નિકલ ખામીઓની સમસ્યા વારંવાર સામે આવી રહી છે. મુસાફરોની સુરક્ષા માટે એરલાઇન્સ કંપનીઓને વધુ સતર્ક રહેવાની જરૂર છે. ખાસ કરીને મેન્ટેનન્સ અને પ્રી-ફ્લાઇટ ચેક જેવી પ્રક્રિયાઓને વધુ કડક રીતે અમલમાં મૂકવી પડશે, જેથી આવા જોખમોને પહેલા જ રોકી શકાય અને મુસાફરોનો વિશ્વાસ જળવાઈ રહે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
