સુરતના વેડ દરવાજા નજીક આવેલા નાસિરનગર વિસ્તારમાં તાજેતરમાં થયેલા ડિમોલિશનનો મામલો હવે કાનૂની અને વહીવટી સ્તરે ચર્ચાનો વિષય બન્યો છે. મે મહિનાના અંતમાં વિસ્તારમાં કેટલાક મકાનો તોડી પાડવામાં આવ્યા હતા, જેના પગલે અસરગ્રસ્ત રહીશોએ ગુજરાત હાઇકોર્ટનો દરવાજો ખટખટાવ્યો છે.
મામલાની ગંભીરતાને ધ્યાનમાં રાખીને ગુજરાત હાઇકોર્ટે સુરત મહાનગરપાલિકા (SMC), ગુજરાત સરકાર તથા સુરત પોલીસ સહિત સંબંધિત પક્ષોને નોટિસ પાઠવીને જવાબ માંગ્યો છે.
સુરત મહાનગરપાલિકાએ સંડોવણીનો કર્યો ઇનકાર
મામલે સુરત મહાનગરપાલિકાના મ્યુનિસિપલ કમિશનર એન. નાગરાજે સ્પષ્ટતા કરતાં જણાવ્યું છે કે પાલિકા સીધી રીતે ડિમોલિશન કાર્યવાહી સાથે સંકળાયેલી નથી.
તેમના જણાવ્યા અનુસાર, પાલિકાની ટીમ માત્ર ખાનગી પક્ષ દ્વારા સૂચિત ટાઉન પ્લાનિંગ સ્કીમ હેઠળના રસ્તાની માપણી કરવા માટે સ્થળ પર ગઈ હતી. તેમણે ભારપૂર્વક જણાવ્યું કે મકાનો તોડવાની કામગીરી પાલિકા દ્વારા હાથ ધરવામાં આવી નહોતી.
પોલીસનો દાવો: સુરક્ષા માટે પાલિકાની સત્તાવાર અરજી મળી હતી
બીજી તરફ સુરત પોલીસના અધિકારીઓએ અલગ જ દાવો કર્યો છે. પોલીસના જણાવ્યા મુજબ, નાસિરનગર વિસ્તારમાં ડિમોલિશન દરમિયાન કાયદો અને વ્યવસ્થા જાળવવા માટે સુરત મહાનગરપાલિકા તરફથી સત્તાવાર અરજી કરવામાં આવી હતી.
આ અરજીના આધારે જ પોલીસ બંદોબસ્ત ગોઠવવામાં આવ્યો હતો. પોલીસના આ નિવેદન બાદ ડિમોલિશન કાર્યવાહી અંગે અનેક પ્રશ્નો ઉભા થયા છે.
પાલિકાના અધિકારીના નિવેદનો પણ ચર્ચામાં
મામલામાં પાલિકાના સેન્ટ્રલ ઝોનના એક્ઝિક્યુટિવ એન્જિનિયર જયાંગ રામજીવાલાના નિવેદનો પણ ચર્ચાનો વિષય બન્યા છે.
અહેવાલો મુજબ, શરૂઆતમાં તેમણે જણાવ્યું હતું કે ખાનગી બિલ્ડરે રોડ માટે પોતાની જમીનમાંથી 40 ફૂટ જગ્યા ફાળવતા પાલિકાએ રસ્તો ખુલ્લો કરવાની કાર્યવાહી હાથ ધરી હતી. જોકે બાદમાં તેમણે સ્પષ્ટતા કરતાં માત્ર રોડ માપણી માટે જ સ્થળ પર હાજર હોવાનું જણાવ્યું હતું.
આ વિરોધાભાસી નિવેદનોને કારણે સમગ્ર મામલે વધુ ચર્ચા જાગી છે.
રહીશોનો દાવો: 35 વર્ષથી વસવાટ, ટેક્સ અને બિલના પુરાવા રજૂ
અરજદાર પક્ષના વકીલના જણાવ્યા અનુસાર, નાસિરનગરના અનેક રહીશો છેલ્લા 35 વર્ષથી આ વિસ્તારમાં વસવાટ કરી રહ્યા છે.
હાઇકોર્ટમાં દાખલ કરાયેલી અરજીમાં રહીશોએ પ્રોપર્ટી ટેક્સની રસીદો, વર્ષ 2006ના વીજળી બિલ સહિતના દસ્તાવેજી પુરાવા રજૂ કર્યા છે. અરજદારોનો દાવો છે કે તેઓ કાયદેસર રીતે ત્યાં રહેતા હતા અને તેમની સાથે કાયદાકીય પ્રક્રિયાનું પાલન કરવામાં આવ્યું નથી.
પૂર્વ નોટિસ વિના કાર્યવાહીનો આરોપ
અરજદારો દ્વારા કોર્ટમાં મુખ્યત્વે એ મુદ્દો ઉઠાવવામાં આવ્યો છે કે ડિમોલિશન પહેલાં કોઈ લેખિત નોટિસ આપવામાં આવી નહોતી.
તેમનો દાવો છે કે ‘ગુજરાત પબ્લિક પ્રીમિસિસ એક્ટ, 1972’ મુજબ કોઈપણ સરકારી અથવા જાહેર મિલકત ખાલી કરાવતા પહેલાં સંબંધિત વ્યક્તિને ઓછામાં ઓછી 10 દિવસની શો-કોઝ નોટિસ આપવી ફરજિયાત છે.
અરજદારોનું કહેવું છે કે આ પ્રક્રિયાનું પાલન કર્યા વિના સીધી કાર્યવાહી કરવામાં આવી હતી, જે કાયદાકીય રીતે યોગ્ય નથી.
FIR માટે પણ નવી અરજીની તૈયારી
હાઇકોર્ટમાં ચાલતી કાર્યવાહી ઉપરાંત અરજદારો હવે ડિમોલિશન માટે જવાબદાર ગણાતા લોકો સામે FIR નોંધવાની માંગ સાથે વધુ એક અરજી દાખલ કરવાની તૈયારી કરી રહ્યા છે.
હાલ ગુજરાત હાઇકોર્ટે સંબંધિત તમામ પક્ષોને નોટિસ પાઠવી છે અને તેમના જવાબોની રાહ જોવાઈ રહી છે. આગામી સુનાવણી દરમિયાન મામલામાં વધુ મહત્વપૂર્ણ વિગતો બહાર આવવાની શક્યતા છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
