વડોદરા મહાનગરપાલિકા (VMC) અને પૂર્વ ભારતીય ક્રિકેટર તથા તૃણમૂલ કોંગ્રેસ (TMC)ના સાંસદ યુસુફ પઠાણ વચ્ચેનો જમીન વિવાદ ફરી એકવાર ચર્ચાના કેન્દ્રમાં આવ્યો છે. તાજેતરમાં મળેલી મનપાની સ્થાયી સમિતિની બેઠકમાં યુસુફ પઠાણના કબજા હેઠળના 978 ચોરસ મીટરના પ્લોટ સહિત કુલ 7 પ્લોટની હરાજી કરવાની દરખાસ્ત રજૂ કરવામાં આવી હતી. સ્થાયી સમિતિએ 12માંથી 11 કામોને મંજૂરી આપતા આ દરખાસ્તને હવે સામાન્ય સભા સમક્ષ અંતિમ મંજૂરી માટે મોકલી છે.
આ સમગ્ર વિવાદની શરૂઆત વર્ષ 2012માં થઈ હતી, જ્યારે યુસુફ પઠાણે વડોદરાના તાંદલજા વિસ્તારમાં આવેલી સરકારી જમીન મેળવવા માટે અરજી કરી હતી. તે સમયે વડોદરા મહાનગરપાલિકાએ તેમની અરજી સ્વીકારી હતી, પરંતુ રાજ્ય સરકારે આ ફાળવણીને મંજૂરી આપી નહોતી. ત્યારબાદ આ સરકારી જમીન પર દીવાલ અને પશુઓનો શેડ બનાવી કથિત ગેરકાયદેસર દબાણ કરવામાં આવ્યું હોવાના આક્ષેપો થયા હતા, જેના પગલે મહાનગરપાલિકાએ નોટિસ ફટકારી હતી.
મનપાની કાર્યવાહી સામે યુસુફ પઠાણ ગુજરાત હાઇકોર્ટ પહોંચ્યા હતા. હાઇકોર્ટે આ મામલે કડક વલણ અપનાવી જમીન ખાલી કરવાની સૂચના આપી હતી. કોર્ટે નોંધ્યું હતું કે પ્લોટ ખાલી કરવામાં જેટલો વિલંબ થશે, તેટલો વધુ દંડ ચૂકવવો પડશે. જોકે, કોર્ટે કોઈ સ્ટે ઓર્ડર આપ્યો ન હોવા છતાં અત્યાર સુધી મહાનગરપાલિકા દ્વારા જમીન પરથી દબાણ દૂર કરવામાં આવ્યું નથી અને પ્લોટનો કબજો પણ પાછો લેવામાં આવ્યો નથી.
બીજી તરફ મનપા દ્વારા પ્લોટની હરાજી કરવાની પ્રક્રિયા સામે સ્થાનિક નાગરિકોમાં વિરોધનો સૂર ઉઠ્યો છે. ‘વિશ્વામિત્રી બચાવો સમિતિ’એ વડોદરાના મેયર અને મ્યુનિસિપલ કમિશનરને લેખિત રજૂઆત કરીને હરાજી પ્રક્રિયા સામે વાંધો નોંધાવ્યો છે. સમિતિના જણાવ્યા અનુસાર વર્ષ 2012થી 2026 સુધીના 14 વર્ષના ગેરકાયદેસર ઉપયોગ બદલ મહાનગરપાલિકાના નિયમો મુજબ યુસુફ પઠાણ પાસેથી વ્યાજ સહિત અંદાજે ₹7.50 કરોડની પેનલ્ટી વસૂલવાની થાય છે.
સમિતિએ આક્ષેપ કર્યો છે કે બાકી રહેલી દંડની રકમ વસૂલ્યા વિના સીધી બજાર કિંમતે પ્લોટની હરાજી કરવી એ સત્તાનો દુરુપયોગ ગણાય. તેનાથી મહાનગરપાલિકાને આર્થિક નુકસાન થઈ શકે છે અને ગેરકાયદેસર કબજો કરનારને ફાયદો મળી શકે છે. સમિતિએ માંગ કરી છે કે જ્યાં સુધી હાઇકોર્ટમાં કેસનો અંતિમ નિકાલ ન થાય અને બાકી દંડની વસૂલાત ન થાય, ત્યાં સુધી પ્લોટની હરાજી પ્રક્રિયા સ્થગિત રાખવી જોઈએ.
હવે આ મુદ્દે સામાન્ય સભામાં શું નિર્ણય લેવાય છે અને મહાનગરપાલિકા હરાજી પ્રક્રિયાને આગળ ધપાવે છે કે નહીં તેના પર સૌની નજર છે. રાજકીય અને કાનૂની રીતે સંવેદનશીલ બનેલો આ વિવાદ આગામી દિવસોમાં વધુ ગરમાઈ શકે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
