વડોદરામાં 8 સપ્ટેમ્બર, 2026ના રોજ યોજાનારા વડાપ્રધાન નરેન્દ્ર મોદીના કાર્યક્રમને લઈને લોકોમાં ભારે ઉત્સાહ જોવા મળી રહ્યો છે. કાર્યક્રમ માટે પ્રથમ વખત BookMyShow પ્લેટફોર્મ મારફતે ફ્રી ડિજિટલ રજિસ્ટ્રેશનની વ્યવસ્થા કરવામાં આવી હતી. રજિસ્ટ્રેશન શરૂ થયા બાદ અંદાજે એક કલાકમાં જ તમામ ઉપલબ્ધ બેઠકો બુક થઈ ગઈ હતી. ત્યારબાદ 42 હજારથી વધુ લોકો વેઇટિંગ લિસ્ટમાં પહોંચી ગયા હતા.
આ કાર્યક્રમ ‘NaMo for Viksit Bharat’ નામથી મહારાજા સયાજીરાવ યુનિવર્સિટી પેવેલિયન ગ્રાઉન્ડ ખાતે યોજાશે. BookMyShow પર ઉપલબ્ધ માહિતી મુજબ કાર્યક્રમ 8 સપ્ટેમ્બરે સવારે 10:30 વાગ્યાથી નિર્ધારિત છે, જ્યારે વડાપ્રધાનનો મુખ્ય કાર્યક્રમ બપોરે લગભગ 12 વાગ્યે યોજાશે.
BookMyShow પર પ્રથમ વખત ફ્રી રજિસ્ટ્રેશન
વડોદરા કાર્યક્રમ માટે લોકોની ભાગીદારી સુવ્યવસ્થિત બનાવવા BookMyShowના માધ્યમથી ડિજિટલ રજિસ્ટ્રેશન શરૂ કરવામાં આવ્યું હતું. વડોદરા મ્યુનિસિપલ કોર્પોરેશન દ્વારા સંચાલિત આ પ્રક્રિયામાં લોકો ફ્રીમાં પોતાનું રજિસ્ટ્રેશન કરાવી શકતા હતા.
આ પહેલને ભારે પ્રતિસાદ મળ્યો અને રજિસ્ટ્રેશન શરૂ થયાના લગભગ એક કલાકમાં જ તમામ સીટ બુક થઈ ગઈ. રજિસ્ટ્રેશન બંધ થયા બાદ પણ 42 હજારથી વધુ લોકો વેઇટિંગ લિસ્ટમાં નોંધાયા હતા.
ડિજિટલ M-Ticketથી મળશે પ્રવેશ
કાર્યક્રમમાં પ્રવેશ માટે સંપૂર્ણ ડિજિટલ એન્ટ્રી સિસ્ટમનો ઉપયોગ કરવામાં આવશે. સફળતાપૂર્વક રજિસ્ટ્રેશન કરાવનાર લોકોને તેમના BookMyShow એકાઉન્ટ પર ડિજિટલ M-Ticket આપવામાં આવશે.
આ M-Ticketમાં સુરક્ષિત અને લાઇવ QR Code હશે. કાર્યક્રમ સ્થળના એન્ટ્રી ગેટ પર QR Code સ્કેન કરીને નોંધણીની ચકાસણી કરવામાં આવશે અને ત્યારબાદ પ્રવેશ આપવામાં આવશે.
લાંબી કતારો અને ભીડ ઘટાડવા ટેક્નોલોજીનો ઉપયોગ
રજિસ્ટ્રેશનથી લઈને વેરિફિકેશન, એન્ટ્રી અને બેઠક વ્યવસ્થા સુધીની સંપૂર્ણ પ્રક્રિયાને ડિજિટલ બનાવવામાં આવી છે.
QR કોડ આધારિત એન્ટ્રી સિસ્ટમનો મુખ્ય હેતુ સ્થળ પર લાંબી કતારો ટાળવાનો, અનધિકૃત પ્રવેશ રોકવાનો અને મોટી સંખ્યામાં આવતા લોકોને ઝડપથી તથા વ્યવસ્થિત રીતે બેઠકો સુધી પહોંચાડવાનો છે.
PM મોદી વડોદરામાં ₹35,000 કરોડથી વધુના પ્રોજેક્ટનું લોકાર્પણ કરશે
વડાપ્રધાન નરેન્દ્ર મોદી 8 સપ્ટેમ્બરે ગુજરાત અને મહારાષ્ટ્રના પ્રવાસે આવશે. વડોદરામાં તેઓ ₹35,000 કરોડથી વધુના વિવિધ વિકાસ પ્રોજેક્ટનું લોકાર્પણ, રાષ્ટ્રાર્પણ અને ખાતમુહૂર્ત કરશે તેમજ જનસભાને સંબોધિત કરશે.
આ વિકાસકાર્યોમાં રેલવે, Dedicated Freight Corridor, નેશનલ હાઇવે અને ગુજરાત સરકારના વિવિધ ઈન્ફ્રાસ્ટ્રક્ચર પ્રોજેક્ટનો સમાવેશ થાય છે.
Western Dedicated Freight Corridorના 326 KMના ત્રણ સેક્શન રાષ્ટ્રને સમર્પિત થશે
વડાપ્રધાન Western Dedicated Freight Corridor (WDFC)ના 326 રૂટ કિલોમીટર લાંબા ત્રણ મહત્વપૂર્ણ સેક્શન રાષ્ટ્રને સમર્પિત કરશે. આ પ્રોજેક્ટ પર ₹20,700 કરોડથી વધુનો ખર્ચ થયો છે.
આ ત્રણ સેક્શનમાં Sanand (North)-Makarpura, New Umbergaon-New Saphale અને New Saphale-JNPTનો સમાવેશ થાય છે.
JNPA સુધી સીધી કનેક્ટિવિટી મળવાથી આયાત-નિકાસ માલની અવરજવર ઝડપી બનશે, ઔદ્યોગિક વિસ્તારો અને બંદરો વચ્ચે કનેક્ટિવિટી સુધરશે તેમજ લોજિસ્ટિક્સ ખર્ચ ઘટાડવામાં મદદ મળશે. આ સેક્શન શરૂ થતાં Dedicated Freight Corridorનું સમગ્ર નેટવર્ક સંપૂર્ણ રીતે કાર્યરત બનશે.
ચાર સ્થળેથી માલગાડીઓને લીલી ઝંડી
વડાપ્રધાન New Sanand (North), New Makarpura, New Umbergaon અને New JNPTથી નવી માલગાડી સેવાઓને પણ લીલી ઝંડી આપશે.
આ ઉપરાંત વડોદરા અને ટાંડા રોડ વચ્ચે નવી પેસેન્જર ટ્રેન સેવા શરૂ કરવામાં આવશે, જે વડોદરા, છોટાઉદેપુર અને અલીરાજપુર વિસ્તારના મુસાફરો માટે ઉપયોગી બનશે.
₹9,700 કરોડથી વધુના ત્રણ રેલવે પ્રોજેક્ટનું ખાતમુહૂર્ત
PM મોદી કુલ 329 કિલોમીટર લાંબા ત્રણ મહત્વપૂર્ણ રેલવે પ્રોજેક્ટના ખાતમુહૂર્ત પણ કરશે. આ પ્રોજેક્ટ પર ₹9,700 કરોડથી વધુનો ખર્ચ થવાનો છે. આ પ્રોજેક્ટમાં વડોદરા-રતલામ ત્રીજી અને ચોથી લાઇન, મિયાગામ કરજણ-ચોરંડા-મલસર ગેજ કન્વર્ઝન અને વિશ્વામિત્રી-દભોઈ ડબલિંગ પ્રોજેક્ટનો સમાવેશ થાય છે.
આ કામ પૂર્ણ થયા બાદ પેસેન્જર અને માલગાડી બંને માટે રેલ ક્ષમતા વધશે, ટ્રાફિકનું દબાણ ઘટશે અને ગુજરાત તથા મધ્યપ્રદેશ વચ્ચેની કનેક્ટિવિટી વધુ મજબૂત બનશે.
₹1,780 કરોડના નેશનલ હાઇવે પ્રોજેક્ટ
વડાપ્રધાન લગભગ ₹1,780 કરોડના ત્રણ નેશનલ હાઇવે પ્રોજેક્ટના ખાતમુહૂર્ત પણ કરશે.
આમાં NH-48ના કામરેજ-ચલથાણ સેક્શનનું છ લેનિંગ, વડોદરા-સુરત NH-48 પર તાપી અને નર્મદા નદી પર વધારાના મોટા પુલ તથા NH-53 પર અભવા, મિંધોળા અને ખજોદ જંક્શન ખાતે Grade-Separated Structuresનો સમાવેશ થાય છે.
ગુજરાત સરકારના ₹2,600 કરોડના પ્રોજેક્ટ પણ સામેલ
વડોદરા કાર્યક્રમ દરમિયાન ગુજરાત સરકારના આશરે ₹2,600 કરોડના વિવિધ પ્રોજેક્ટનું પણ ખાતમુહૂર્ત અને લોકાર્પણ કરવામાં આવશે.
મુખ્ય પ્રોજેક્ટમાં Vadodara Urban Development Authority Ring Road Phase-II, કડાણા ડેમ ખાતે 110 MWનો Floating Solar Project અને વડોદરા મ્યુનિસિપલ કોર્પોરેશનના નવા ઓફિસ બિલ્ડિંગ સહિતના વિકાસકાર્યોનો સમાવેશ થાય છે.
વડોદરા બાદ મુંબઈમાં Global Fintech Fest 2026
વડોદરાના કાર્યક્રમ બાદ વડાપ્રધાન મુંબઈ જશે. સત્તાવાર કાર્યક્રમ મુજબ સાંજે લગભગ 5:45 વાગ્યે તેઓ Global Fintech Fest 2026નું ઉદ્ઘાટન કરશે અને કાર્યક્રમને સંબોધિત કરશે.
આમ 8 સપ્ટેમ્બરના પ્રવાસ દરમિયાન વડાપ્રધાનના વડોદરા કાર્યક્રમમાં એક તરફ ₹35 હજાર કરોડથી વધુના વિકાસકાર્યોનો પ્રારંભ થશે, તો બીજી તરફ BookMyShow, M-Ticket અને Live QR Code આધારિત ડિજિટલ વ્યવસ્થા મોટા જાહેર કાર્યક્રમોના મેનેજમેન્ટમાં નવી પહેલ તરીકે જોવા મળી રહી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
