પોરબંદર હેડ પોસ્ટ ઓફિસમાં એન્ટી કરપ્શન બ્યુરો (ACB) દ્વારા લાંચના કેસમાં કાર્યવાહી કરવામાં આવી છે. એક જાગૃત નાગરિકની ફરિયાદના આધારે ACBએ ટ્રેપ ગોઠવી વર્ગ-3ના પોસ્ટલ આસિસ્ટન્ટને ₹7,500ની લાંચ સ્વીકારતા રંગેહાથ ઝડપી પાડ્યા હોવાનો દાવો કરવામાં આવ્યો છે.
પ્રાપ્ત વિગતો અનુસાર, ફરિયાદીને પોતાના આધારકાર્ડમાં જન્મતારીખમાં સુધારો કરાવવાનો હતો. આ કામગીરી માટે તેઓ પોરબંદરના રેલવે સ્ટેશન રોડ પર આવેલી હેડ પોસ્ટ ઓફિસમાં ગયા હતા. અહીં ફરજ બજાવતા પોસ્ટલ આસિસ્ટન્ટ ધાર્મિક અશોકભાઈ ત્રિવેદી દ્વારા આધારકાર્ડમાં જન્મતારીખ સુધારવાનું કામ કરી આપવા માટે ₹9,000ની લાંચ માગવામાં આવી હોવાનો આરોપ છે.
ફરિયાદી લાંચની રકમ આપવા માંગતા ન હોવાથી તેમણે પોરબંદર ACBનો સંપર્ક કરીને ફરિયાદ નોંધાવી હતી. ફરિયાદના આધારે પોરબંદર ACBના પોલીસ ઇન્સ્પેક્ટર બી.કે. ગમાર અને તેમની ટીમ દ્વારા 14 સપ્ટેમ્બર, 2026ના રોજ પોરબંદર હેડ પોસ્ટ ઓફિસ ખાતે ટ્રેપ ગોઠવવામાં આવી હતી.
ACBના જણાવ્યા અનુસાર, ટ્રેપ દરમિયાન પોસ્ટલ આસિસ્ટન્ટે ફરિયાદી પાસેથી ₹7,500ની લાંચ સ્વીકારી હતી. રકમ સ્વીકારવામાં આવતાં જ ACBની ટીમે તેમને સ્થળ પર ઝડપી પાડ્યા હતા. ACB દ્વારા ₹7,500ની રકમ પણ રિકવર કરવામાં આવી હોવાનું જણાવાયું છે.
આ મામલે આરોપી વિરુદ્ધ ગુનો નોંધી ACB દ્વારા આગળની કાયદેસરની કાર્યવાહી હાથ ધરવામાં આવી છે. લાંચની મૂળ માંગ ₹9,000 હોવાનો આરોપ છે, જ્યારે ટ્રેપ દરમિયાન ₹7,500ની રકમ સ્વીકારવામાં આવી હોવાનું ACBની કાર્યવાહીમાં સામે આવ્યું છે.
આ કેસમાં આરોપો અંગે અંતિમ નિર્ણય તપાસ અને ન્યાયિક પ્રક્રિયા બાદ થશે.
નિપુલ પોપટ (પોરબંદર)
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
