સુરત ક્રાઇમ બ્રાન્ચે 1 કિલો MD ડ્રગ્સ સાથે ઝડપી પાડેલી માનસી સૈયદને લઈને તપાસમાં અનેક મહત્વપૂર્ણ અને ચોંકાવનારી વિગતો સામે આવી રહી છે. પોલીસ તપાસ મુજબ માનસી માત્ર ડ્રગ્સનું સેવન કરતી વ્યક્તિ સુધી સીમિત નહોતી, પરંતુ મુંબઈના હાઈપ્રોફાઈલ અને એલાઈટ વર્ગના લોકો સુધી MD ડ્રગ્સ સપ્લાય કરતી હોવાની વિગતો સામે આવી છે. સોશિયલ મીડિયા અને વોટ્સએપ પર કોડ લેંગ્વેજનો ઉપયોગ કરીને ડ્રગ્સની ડીલ કરવામાં આવતી હોવાનું પણ તપાસમાં જાણવા મળ્યું છે.
સુરત ક્રાઇમ બ્રાન્ચે બે દિવસ અગાઉ માનસી સૈયદ અને સોહેલ સુલેમાન શેખને 1 કિલો MD ડ્રગ્સ સાથે ઝડપી પાડ્યા હતા. બંને આરોપીઓના પાંચ દિવસના રિમાન્ડ મેળવવામાં આવ્યા છે. હવે પોલીસ ડ્રગ્સનો સ્ત્રોત, સપ્લાય ચેઇન, ગ્રાહકો અને આ નેટવર્ક સાથે જોડાયેલા અન્ય લોકો અંગે ઊંડાણપૂર્વક તપાસ કરી રહી છે.
માનસી સૈયદ 17 દેશોની મુલાકાત લઈ ચૂકી હોવાની માહિતી
તપાસ દરમિયાન સામે આવેલી વિગતો અનુસાર માનસી સૈયદ ફ્લુઅન્ટ અંગ્રેજી બોલે છે અને અત્યાર સુધીમાં આશરે 17 દેશોની મુલાકાત લઈ ચૂકી હોવાનું જાણવા મળ્યું છે. તેની જીવનશૈલી અને અગાઉના વ્યવસાયને લઈને પણ પોલીસને મહત્વપૂર્ણ વિગતો મળી છે.
માનસી અગાઉ હરિયાણા, પંજાબ અને દિલ્હીમાં સ્ટેજ આર્ટિસ્ટ તરીકે કામ કરી ચૂકી હોવાનું સામે આવ્યું છે. આ ઉપરાંત તે એક સમયે મલેશિયન એરલાઈન્સમાં એર હોસ્ટેસ તરીકે પણ નોકરી કરી ચૂકી હોવાની માહિતી તપાસ દરમિયાન સામે આવી છે.
2015થી ડ્રગ્સના વ્યસનમાં આવી હોવાની તપાસમાં વિગતો
પોલીસ તપાસ મુજબ માનસીના અંગત જીવનમાં આવેલા ઉતાર-ચઢાવ બાદ તે માનસિક તણાવમાંથી પસાર થઈ હતી અને ત્યારબાદ વર્ષ 2015 આસપાસ ડ્રગ્સના વ્યસન તરફ વળી હોવાની વિગતો મળી છે.
તપાસ એ દિશામાં પણ ચાલી રહી છે કે ડ્રગ્સનું સેવન શરૂ કર્યા બાદ તે ક્યારે અને કેવી રીતે ડ્રગ્સ સપ્લાય નેટવર્ક સાથે જોડાઈ. પોલીસ એ પણ શોધી રહી છે કે તેની પાસે MD ડ્રગ્સ કોણ પહોંચાડતું હતું અને તેનો સંપર્ક મોટા ડ્રગ્સ સપ્લાયરો સાથે હતો કે કેમ.
WhatsApp અને સોશિયલ મીડિયા પર કોડવર્ડથી થતી હતી ડીલ
ક્રાઇમ બ્રાન્ચની તપાસમાં માનસી સૈયદ WhatsApp અને અન્ય સોશિયલ મીડિયા પ્લેટફોર્મ મારફતે ગ્રાહકો સાથે સંપર્કમાં રહેતી હોવાની માહિતી સામે આવી છે. ડ્રગ્સની ખરીદી-વેચાણ અંગે સીધી ભાષામાં વાત કરવાને બદલે કોડવર્ડ અને કોડ લેંગ્વેજનો ઉપયોગ કરવામાં આવતો હોવાનું પોલીસ તપાસમાં જાણવા મળ્યું છે.
પોલીસ હવે તેના મોબાઇલ ફોન, ચેટ્સ, સોશિયલ મીડિયા એકાઉન્ટ્સ, સંપર્કો અને અન્ય ડિજિટલ પુરાવાની તપાસ કરીને આખી સપ્લાય ચેઇન સુધી પહોંચવાનો પ્રયાસ કરી રહી છે.
મુંબઈના હાઈપ્રોફાઈલ અને એલાઈટ વર્ગ સુધી ડ્રગ્સ પહોંચાડતી હોવાની તપાસ
સૌથી મહત્વપૂર્ણ બાબત એ છે કે માનસીનું ડ્રગ્સ નેટવર્ક માત્ર સુરત સુધી સીમિત નહોતું હોવાની શંકા વ્યક્ત થઈ રહી છે. તપાસમાં મુંબઈના હાઈપ્રોફાઈલ અને એલાઈટ વર્ગના કેટલાક ગ્રાહકો સુધી ડ્રગ્સ સપ્લાય થતું હોવાની વિગતો સામે આવી છે.
હવે પોલીસ એ જાણવા પ્રયાસ કરી રહી છે કે તેના નિયમિત ગ્રાહકો કોણ હતા, કેટલી માત્રામાં MD ડ્રગ્સ સપ્લાય કરવામાં આવતું હતું અને આ સમગ્ર નેટવર્કનું સંચાલન કોણ કરતું હતું.
1 કિલો MD ડ્રગ્સ સાથે માનસી સૈયદ અને સોહેલ શેખ ઝડપાયા
સુરત ક્રાઇમ બ્રાન્ચે હાથ ધરેલી કાર્યવાહીમાં 1 કિલો MD ડ્રગ્સ સાથે માનસી સૈયદ અને સોહેલ સુલેમાન શેખને ઝડપી પાડવામાં આવ્યા હતા. બંને સામે કાયદેસરની કાર્યવાહી કર્યા બાદ કોર્ટમાં રજૂ કરવામાં આવ્યા હતા, જ્યાંથી પોલીસને 5 દિવસના રિમાન્ડ મળ્યા છે.
રિમાન્ડ દરમિયાન આરોપીઓની પૂછપરછ કરીને ડ્રગ્સ ક્યાંથી લાવવામાં આવતું હતું, સુરત અને મુંબઈ સહિત અન્ય કયા વિસ્તારોમાં તેનો સપ્લાય થતો હતો અને આ નેટવર્ક સાથે અન્ય કેટલા લોકો જોડાયેલા છે તે અંગે તપાસ આગળ વધારવામાં આવી રહી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
Like, Share and Subscribe our YouTube channel
