રાજ્યમાં ખાદ્ય પદાર્થોમાં ભેળસેળ કરીને નાગરિકોના સ્વાસ્થ્ય સાથે ચેડાં કરતા તત્ત્વો સામે આરોગ્ય મંત્રી પ્રફુલ પાનશેરીયાએ કડક વલણ અપનાવ્યું છે. તેમની સૂચના બાદ ખોરાક અને ઔષધ નિયમન તંત્ર વધુ એક્શન મોડમાં આવ્યું છે. તંત્ર દ્વારા સુરતના કામરેજ અને બનાસકાંઠાના ડીસા ખાતે અલગ-અલગ સ્થળોએ દરોડા પાડી કુલ રૂ.35 લાખથી વધુ કિંમતનો શંકાસ્પદ ઘી તેમજ ભેળસેળ માટે ઉપયોગમાં લેવાતો તેલનો જથ્થો જપ્ત કરવામાં આવ્યો છે.
સુરત ખોરાક અને ઔષધ નિયમન તંત્રની ટીમે કામરેજ તાલુકાના ધોરણ પારડી વિસ્તારમાં આવેલા હિન્દવા ડ્રીમ ઇન્ડસ્ટ્રીયલ એસ્ટેટમાં આવેલી ‘કેવલ ફૂડ પ્રોડક્ટ’ નામની ફેક્ટરી પર દરોડો પાડ્યો હતો. તપાસ દરમિયાન સામે આવ્યું કે ફેક્ટરી સંચાલક પાસે જરૂરી કાયદેસર લાઇસન્સ ન હોવા છતાં બહારથી તાળું મારી અંદર કથિત રીતે અસલીના નામે નકલી અને ભેળસેળયુક્ત ઘીનું ઉત્પાદન તથા પેકિંગ કરવામાં આવી રહ્યું હતું.
દરોડા દરમિયાન ટીમે ‘શ્રી અનમોલ રતન કાઉ ઘી’ નામથી વિવિધ પેકિંગમાં રહેલો અંદાજે 5,157 લીટર ઘીનો જથ્થો સીઝ કર્યો હતો, જેની કિંમત આશરે રૂ.26.12 લાખ હોવાનું જણાવાયું છે. ઉપરાંત ભેળસેળ માટે રાખવામાં આવેલ અંદાજે 1,485 કિલોગ્રામ પામોલીન તેલ અને 285 કિલોગ્રામ સોયાબીન તેલનો જથ્થો પણ જપ્ત કરવામાં આવ્યો હતો. આ તેલની કુલ કિંમત અંદાજે રૂ.3.63 લાખ હોવાનું તંત્ર દ્વારા જણાવાયું છે.
આ રીતે માત્ર કામરેજની ફેક્ટરીમાંથી જ રૂ.29.75 લાખથી વધુ કિંમતનો ઘી અને તેલનો જથ્થો સીઝ કરવામાં આવ્યો છે. તંત્ર દ્વારા તમામ શંકાસ્પદ ખાદ્ય પદાર્થોના નમૂનાઓ લઈને લેબોરેટરી પરીક્ષણ માટે મોકલવામાં આવ્યા છે.
બીજી તરફ પાલનપુર વર્તુળની ટીમે બનાસકાંઠાના ડીસા ખાતે પણ વિવિધ પેઢીઓમાં તપાસ હાથ ધરી હતી. દરોડા દરમિયાન બે પેઢીઓમાંથી શંકાસ્પદ ઘીના નમૂનાઓ લેવામાં આવ્યા હતા અને કુલ 987 લીટર ઘીનો જથ્થો જપ્ત કરવામાં આવ્યો હતો. આ જથ્થાની અંદાજિત કિંમત રૂ.6.22 લાખથી વધુ હોવાનું સામે આવ્યું છે.
સુરત અને ડીસા ખાતે હાથ ધરાયેલી કાર્યવાહીમાં મળેલા તમામ નમૂનાઓ ‘ફૂડ સેફ્ટી એન્ડ સ્ટાન્ડર્ડ્સ એક્ટ, 2006’ની જોગવાઈઓ અનુસાર લેવામાં આવ્યા છે. લેબોરેટરી રિપોર્ટ આવ્યા બાદ ભેળસેળ અથવા ગુણવત્તામાં ગેરરીતિ સામે આવશે તો જવાબદાર વ્યક્તિઓ અને પેઢીઓ સામે કાયદેસરની કડક કાર્યવાહી કરવામાં આવશે.
આરોગ્ય મંત્રી પ્રફુલ પાનશેરીયાએ જણાવ્યું કે રાજ્યના નાગરિકોના સ્વાસ્થ્ય સાથે ચેડાં કરનાર કોઈપણ કસૂરવાર વ્યક્તિ કે વેપારી પેઢીને બક્ષવામાં નહીં આવે. ખાદ્ય પદાર્થોમાં ભેળસેળ કરનાર તત્ત્વો સામે રાજ્યવ્યાપી ઝુંબેશને આગામી દિવસોમાં વધુ કડક બનાવવામાં આવશે.
આ કાર્યવાહીથી ખાસ કરીને ઘી જેવા રોજિંદા ઉપયોગના ખાદ્ય પદાર્થોમાં થતી સંભવિત ભેળસેળ સામે તંત્રની સતર્કતા સ્પષ્ટ થઈ છે. ગ્રાહકો સુધી ગુણવત્તાયુક્ત અને સુરક્ષિત ખાદ્ય પદાર્થો પહોંચે તે માટે રાજ્યનું ખોરાક અને ઔષધ નિયમન તંત્ર તપાસ, સેમ્પલિંગ અને કાયદેસરની કાર્યવાહી વધુ સઘન બનાવશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
