જિલ્લામાં જન આરોગ્યના રક્ષણ અને લોકોને ગુણવત્તાયુક્ત ખાદ્ય સામગ્રી મળી રહે તે હેતુથી ફૂડ સેફ્ટી વિભાગ અને આરોગ્ય તંત્ર દ્વારા વ્યાપક તપાસ ઝુંબેશ હાથ ધરવામાં આવી છે. રાજ્યમાં GBS (Guillain-Barré Syndrome)ના કેસોને ધ્યાનમાં રાખીને ફૂડ એન્ડ ડ્રગ્સ વિભાગ વધુ સતર્ક બન્યો છે. લુણાવાડા શહેરમાં છેલ્લા બે દિવસથી હોટલો, રેસ્ટોરન્ટ, નાસ્તાની દુકાનો, ખાણીપીણીની લારીઓ, ડેરીઓ તેમજ શાળાઓ અને છાત્રાલયોમાં સઘન તપાસ કરવામાં આવી રહી છે.
વિશેષ કરીને વિદ્યાર્થીઓ અને સામાન્ય નાગરિકોને સ્વચ્છ, સુરક્ષિત અને ગુણવત્તાયુક્ત ખોરાક મળી રહે તે માટે ફૂડ સેફ્ટી ઓફિસરોની ટીમો દ્વારા રસોડાની સ્વચ્છતા, ખાદ્ય સામગ્રીનો સંગ્રહ, ખોરાક બનાવવાની પદ્ધતિ અને આસપાસની સફાઈ સહિતના મુદ્દાઓની તપાસ કરવામાં આવી રહી છે.
આવકાર રેસ્ટોરન્ટ અને બક્ષીપંચ છાત્રાલયને ઇમ્પ્રુવમેન્ટ નોટિસ
તપાસ દરમિયાન લુણાવાડાની જાણીતી આવકાર રેસ્ટોરન્ટમાં કેટલીક ક્ષતિઓ સામે આવતા ફૂડ એન્ડ ડ્રગ્સ વિભાગ દ્વારા સંચાલકને ‘ઇમ્પ્રુવમેન્ટ નોટિસ’ આપવામાં આવી છે. સંચાલકને ખાદ્ય સુરક્ષા અને સ્વચ્છતાના નિયમો અનુસાર જરૂરી સુધારા કરવા સૂચના આપવામાં આવી છે.
આ ઉપરાંત બક્ષીપંચ છાત્રાલયના રસોડા અને આસપાસના વિસ્તારમાં સ્વચ્છતાનો અભાવ જોવા મળતાં તંત્ર દ્વારા છાત્રાલયને પણ નોટિસ ફટકારવામાં આવી છે. જવાબદાર તંત્રને તાત્કાલિક સ્વચ્છતા અને ખાદ્ય સુરક્ષા સંબંધિત જરૂરી સુધારા કરવા આદેશ આપવામાં આવ્યો છે.
ગંદકી ફેલાવતા લારી-ગલ્લા ધારકો સામે કાર્યવાહી
ફૂડ સેફ્ટી વિભાગની તપાસ સાથે લુણાવાડા નગરપાલિકા પણ એક્શનમાં આવી છે. જાહેર સ્થળો અને ખાણીપીણીના વિસ્તારોમાં ગંદકી ફેલાવતા લારી-ગલ્લા ધારકો સામે નગરપાલિકાએ દંડાત્મક કાર્યવાહી હાથ ધરી છે.
તંત્ર દ્વારા વેપારીઓને ખાદ્ય સામગ્રી સ્વચ્છ રીતે રાખવા, આસપાસ સફાઈ જાળવવા અને ગ્રાહકોને આપવામાં આવતા ખોરાકની ગુણવત્તા સાથે કોઈપણ પ્રકારની બેદરકારી ન રાખવા સૂચના આપવામાં આવી છે.
હોટલો, ડેરીઓ અને શાળાઓમાંથી ખાદ્યપદાર્થોના સેમ્પલ લેવાયા
ફૂડ સેફ્ટી ઓફિસરોની ટીમે લુણાવાડાની વિવિધ હોટલો, ડેરીઓ, ખાણીપીણીના એકમો તેમજ શાળાઓમાંથી શંકાસ્પદ ખાદ્યપદાર્થોના સેમ્પલ લીધા છે. આ તમામ નમૂનાઓને ગુણવત્તા અને સલામતીની તપાસ માટે લેબોરેટરીમાં મોકલવામાં આવ્યા છે.
વહીવટી તંત્રના જણાવ્યા મુજબ, લેબોરેટરી રિપોર્ટ મળ્યા બાદ જો કોઈ ખાદ્ય સામગ્રી અપ્રમાણસર, ભેળસેળયુક્ત અથવા નિર્ધારિત ગુણવત્તાના માપદંડોને પૂર્ણ ન કરતી હોવાનું સામે આવશે તો જવાબદારો સામે નિયમો અનુસાર કાયદાકીય કાર્યવાહી કરવામાં આવશે.
અચાનક ચેકિંગથી વેપારીઓમાં ફફડાટ
લુણાવાડામાં ફૂડ સેફ્ટી વિભાગ અને આરોગ્ય તંત્ર દ્વારા શરૂ કરવામાં આવેલી અચાનક તપાસ ઝુંબેશને કારણે નિયમોનું પાલન ન કરતા વેપારીઓમાં ફફડાટ ફેલાયો છે. તંત્રએ સ્પષ્ટ સંકેત આપ્યો છે કે જન આરોગ્ય સાથે ચેડાં કરતી કોઈપણ બેદરકારી સામે કડક કાર્યવાહી કરવામાં આવશે.
આ અભિયાનનો મુખ્ય ઉદ્દેશ નાગરિકો અને વિદ્યાર્થીઓને સ્વચ્છ, સુરક્ષિત અને ગુણવત્તાયુક્ત ખોરાક ઉપલબ્ધ કરાવવાનો તેમજ ખાદ્ય સુરક્ષા અંગે વેપારીઓમાં જવાબદારી વધારવાનો છે.
અમારી યુટ્યુબ ચેનલને લાઈક કરો, શેર કરો અને સબસ્ક્રાઈબ કરો
Like, Share and Subscribe our YouTube channel
