ભાવનગરમાં બનેલી લઠ્ઠાકાંડની ગંભીર ઘટના બાદ રાજ્યભરમાં દારૂબંધીના કાયદાનો વધુ કડક અમલ કરાવવા ગૃહ વિભાગ દ્વારા સૂચનાઓ આપવામાં આવી છે. આ આદેશોને પગલે મહેસાણા જિલ્લા પોલીસ તંત્ર પણ એક્શન મોડમાં આવ્યું છે. મહેસાણા LCB દ્વારા જિલ્લામાં પ્રોહિબિશન ડ્રાઇવ તેજ કરવામાં આવી છે અને ખાસ કરીને અવાવરૂ વિસ્તારો તેમજ નદી કિનારે ગેરકાયદેસર રીતે ચાલતી દેશી દારૂની ભઠ્ઠીઓ શોધવા માટે ડ્રોન ટેકનોલોજીનો ઉપયોગ કરવામાં આવી રહ્યો છે.
મહેસાણા LCBના PI એ.એમ. કામળિયાના માર્ગદર્શન હેઠળ પોલીસની અલગ-અલગ ટીમો બનાવી જિલ્લામાં દારૂના ગેરકાયદેસર ઉત્પાદન, સંગ્રહ અને હેરાફેરી સામે કાર્યવાહી શરૂ કરવામાં આવી છે. પોલીસ દ્વારા બાતમીદારોના નેટવર્કની સાથે ડ્રોન કેમેરાની મદદથી શંકાસ્પદ વિસ્તારોમાં સર્વેલન્સ કરવામાં આવ્યું હતું. આ દરમિયાન કેટલીક અવાવરૂ જગ્યાઓ અને નદી કિનારે દેશી દારૂ બનાવવાની પ્રવૃત્તિ ચાલતી હોવાનું સામે આવતાં પોલીસે દરોડા પાડ્યા હતા.
ડ્રોન સર્વેલન્સથી દેશી દારૂની ભઠ્ઠીઓ ઝડપાઈ
દારૂના ગેરકાયદેસર કારોબારીઓ પોલીસથી બચવા માટે ઘણી વખત ગામથી દૂર, નદી કિનારે અથવા અવાવરૂ સ્થળોએ દેશી દારૂની ભઠ્ઠીઓ ચલાવતા હોય છે. આવા સ્થળો સુધી પહોંચવા અને ગેરકાયદેસર પ્રવૃત્તિઓ શોધી કાઢવા મહેસાણા પોલીસે ટેકનોલોજીનો સહારો લીધો છે.
ડ્રોન કેમેરાથી કરવામાં આવેલા સર્વેલન્સ દરમિયાન શંકાસ્પદ સ્થળોની ઓળખ કર્યા બાદ પોલીસ ટીમોએ ત્યાં દરોડા પાડ્યા હતા. આ કાર્યવાહીમાં દેશી દારૂ બનાવવા માટે તૈયાર કરવામાં આવેલો મોટા પ્રમાણનો વોશ તેમજ તૈયાર દેશી દારૂ ઝડપી પાડવામાં આવ્યો હતો.
24 કલાકમાં દારૂના કુલ 13 કેસ
પોલીસના જણાવ્યા અનુસાર બાતમી અને ડ્રોન સર્વેલન્સના આધારે છેલ્લા 24 કલાક દરમિયાન મહેસાણા જિલ્લામાં દેશી તેમજ વિદેશી દારૂને લગતા કુલ 13 કેસ નોંધવામાં આવ્યા છે.
દરોડા દરમિયાન પોલીસે દેશી દારૂ બનાવવા માટે ઉપયોગમાં લેવાતો આશરે 23,600 લીટર વોશ (આથો) ઝડપી પાડ્યો હતો. પોલીસ દ્વારા આ વોશનો સ્થળ પર જ નાશ કરવામાં આવ્યો હતો, જેથી તેનો ઉપયોગ દારૂ બનાવવા માટે ન થઈ શકે.
આ ઉપરાંત પોલીસે અલગ-અલગ સ્થળેથી આશરે 190 લીટર તૈયાર દેશી દારૂ પણ ઝડપી પાડ્યો છે.
વિદેશી દારૂની 247 બોટલો પણ જપ્ત
પ્રોહિબિશન ડ્રાઇવ દરમિયાન માત્ર દેશી દારૂ જ નહીં પરંતુ ભારતીય બનાવટના વિદેશી દારૂ સામે પણ કાર્યવાહી કરવામાં આવી છે. પોલીસે કુલ 247 નંગ વિદેશી દારૂની બોટલો ઝડપી પાડી હોવાનું સામે આવ્યું છે.
પોલીસ હવે આ દારૂ ક્યાંથી લાવવામાં આવ્યો હતો, કોને પહોંચાડવાનો હતો અને તેની પાછળ કોઈ મોટું સપ્લાય નેટવર્ક કાર્યરત છે કે કેમ તે દિશામાં પણ તપાસ આગળ ધપાવી રહી છે.
રૂ.7.62 લાખથી વધુનો મુદ્દામાલ જપ્ત
મહેસાણા LCBની અલગ-અલગ કાર્યવાહીમાં દારૂનો જથ્થો, વોશ, ગેરકાયદેસર દારૂની હેરાફેરીમાં ઉપયોગમાં લેવાતા વાહનો તેમજ અન્ય સાધન-સામગ્રી સહિત કુલ રૂ.7,62,126નો મુદ્દામાલ જપ્ત કરવામાં આવ્યો છે.
પોલીસ દ્વારા સંબંધિત આરોપીઓ સામે પ્રોહિબિશનના કાયદા હેઠળ ગુનાઓ નોંધવામાં આવ્યા છે. આ કેસોમાં સંડોવાયેલા અન્ય આરોપીઓ અને દારૂ સપ્લાય કરનારા લોકો સુધી પહોંચવા માટે વધુ તપાસ હાથ ધરવામાં આવી છે.
બુટલેગરો સામે કાર્યવાહી વધુ કડક બનવાના સંકેત
ભાવનગરની ગંભીર ઘટના બાદ રાજ્યમાં ગેરકાયદેસર દારૂના ઉત્પાદન અને વેચાણ સામે પોલીસની કામગીરી વધુ કડક બનાવવામાં આવી રહી છે. મહેસાણામાં કરવામાં આવેલી ડ્રોન આધારિત કાર્યવાહીથી પોલીસ હવે પરંપરાગત પેટ્રોલિંગ ઉપરાંત આધુનિક ટેકનોલોજીના માધ્યમથી પણ ગેરકાયદેસર દારૂના અડ્ડાઓ શોધી રહી હોવાનું સ્પષ્ટ થયું છે.
મહેસાણા LCBની સપાટાબંધ કાર્યવાહીને પગલે જિલ્લામાં દેશી-વિદેશી દારૂના ગેરકાયદેસર કારોબાર સાથે સંકળાયેલા બુટલેગરો અને અસામાજિક તત્વોમાં ફફડાટ ફેલાયો છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
Like, Share and Subscribe our YouTube channel
