મહેસાણા જિલ્લાની ઐતિહાસિક નગરી વડનગરમાં પવિત્ર શ્રાવણ માસની ભક્તિમય શરૂઆત અનોખા અંદાજમાં થઈ છે. શર્મિષ્ઠા તળાવના કિનારેથી આયોજિત ‘વડનગર શ્રાવણોત્સવ’નો 108 ડમરુના ગહન નાદ વચ્ચે ભવ્ય પ્રારંભ કરવામાં આવ્યો હતો. નાયબ મુખ્યમંત્રી હર્ષ સંઘવીએ સ્વયં ડમરુ વગાડી મહોત્સવનું ઉદ્ઘાટન કર્યું હતું. ભક્તિ, શક્તિ, સંસ્કૃતિ અને પ્રવાસનના સંગમ સમાન આ કાર્યક્રમ દરમિયાન સમગ્ર વડનગર ‘હર હર મહાદેવ’ના નાદ અને ડમરુના ગુંજારવથી શિવમય બની ગયું હતું.
ગુજરાત સરકાર દ્વારા વડનગરના સમૃદ્ધ ઐતિહાસિક અને સાંસ્કૃતિક વારસાને નવી ઓળખ આપવા માટે વિવિધ આયોજન કરવામાં આવી રહ્યા છે. શ્રાવણોત્સવ પણ આ જ પ્રયાસનો મહત્વપૂર્ણ ભાગ છે. ધાર્મિક આસ્થા સાથે સ્થાનિક કલા, પરંપરા અને પ્રવાસનને જોડીને વડનગરને રાષ્ટ્રીય અને આંતરરાષ્ટ્રીય સ્તરે વધુ પ્રખ્યાત બનાવવાનો પ્રયાસ કરવામાં આવી રહ્યો છે.
108 કલાકારોએ એકસાથે વગાડ્યા ડમરુ
શ્રાવણોત્સવનું મુખ્ય આકર્ષણ 108 કલાકારોની વિશાળ ‘ડમરુ યાત્રા’ રહી હતી. નાયબ મુખ્યમંત્રી હર્ષ સંઘવીએ યાત્રાને પ્રસ્થાન કરાવ્યા બાદ 108 કલાકારોએ એકસાથે ડમરુ વગાડ્યા હતા. ડમરુના ગહન અને લયબદ્ધ નાદથી સમગ્ર વિસ્તાર ભક્તિમય બન્યો હતો.
આ વિશેષ યાત્રા ઐતિહાસિક શર્મિષ્ઠા તળાવથી શરૂ થઈ હતી. ત્યારબાદ અર્જુન બારી, ભગતના ગલ્લા, જુના ચાચર, શ્રી સ્વામિનારાયણ મંદિર અને ગોપાલજી મંદિર જેવા વિસ્તારોમાંથી પસાર થઈ યાત્રાનું સમાપન પ્રસિદ્ધ શ્રી હાટકેશ્વર મહાદેવ મંદિર ખાતે થયું હતું.
યાત્રાના સમગ્ર રૂટ દરમિયાન સ્થાનિક નાગરિકો અને શ્રદ્ધાળુઓએ ઉત્સાહપૂર્વક સ્વાગત કર્યું હતું. રસ્તાઓ પર શિવભક્તિનો માહોલ જોવા મળ્યો હતો અને મોટી સંખ્યામાં લોકો ડમરુ યાત્રાના સાક્ષી બન્યા હતા.
ભગવાન હાટકેશ્વર મહાદેવના ભક્તોની વિશાળ અને ભક્તિમય ઉપસ્થિતિ વચ્ચે ડમરુના નાદથી સમગ્ર વડનગર નગરી શિવમય બની ગઈ. શિવભક્તોની અપાર શ્રદ્ધા, ઉત્સાહ અને બમણી ઊર્જાથી આ ક્ષણ અદ્ભુત અને અવિસ્મરણીય બની રહી.
સાંસ્કૃતિક અને આધ્યાત્મિક વિરાસતને ઉજાગર કરતા આ પવિત્ર મહોત્સવમાં સહભાગી થઈને… pic.twitter.com/9bPci11Drh
— Harsh Sanghavi (@sanghaviharsh) August 13, 2026
ડમરુ યાત્રામાં પગપાળા જોડાયા હર્ષ સંઘવી
નાયબ મુખ્યમંત્રી હર્ષ સંઘવી માત્ર યાત્રાને પ્રસ્થાન કરાવીને અટક્યા નહોતા, પરંતુ તેઓ સ્વયં પગપાળા યાત્રામાં જોડાયા હતા. તેમની હાજરીને કારણે સ્થાનિક લોકો અને કલાકારોમાં વિશેષ ઉત્સાહ જોવા મળ્યો હતો.
યાત્રાના સમાપન બાદ હર્ષ સંઘવીએ શ્રી હાટકેશ્વર મહાદેવ મંદિરે દર્શન અને પૂજન કર્યું હતું. આ દરમિયાન શ્રદ્ધાળુઓને પ્રસાદ અને શિવ કીટનું વિતરણ પણ કરવામાં આવ્યું હતું.
હર્ષ સંઘવીએ વડનગરના શ્રાવણોત્સવને ભક્તિ અને કલાના સંગમ તરીકે વર્ણવતા કહ્યું હતું કે આવા સાંસ્કૃતિક આયોજનો વડનગરને વૈશ્વિક ફલક પર નવી ઓળખ અપાવવામાં મદદરૂપ બનશે.
શ્રાવણોત્સવ સાથે હેરિટેજ ઓટો સેવાનો પણ પ્રારંભ
વડનગરના સાંસ્કૃતિક વારસાને પ્રવાસન સાથે જોડવા માટે શ્રાવણોત્સવ દરમિયાન વધુ એક મહત્વપૂર્ણ પહેલ કરવામાં આવી હતી. નાયબ મુખ્યમંત્રી હર્ષ સંઘવીએ વિશેષ રીતે ડિઝાઇન કરાયેલી ‘વડનગર હેરિટેજ ઓટો રિક્ષા’ સેવાનું લોકાર્પણ કર્યું હતું.
વડનગરના ઐતિહાસિક અને સાંસ્કૃતિક વારસાની ઝલક દર્શાવતી આ હેરિટેજ ઓટો પ્રવાસીઓ માટે આકર્ષણનું નવું કેન્દ્ર બની શકે છે. હર્ષ સંઘવીએ હેરિટેજ ઓટોમાં જાતે સવારી કરી હતી અને શહેરના વિવિધ વિસ્તારોની મુલાકાત લીધી હતી.
આ પ્રકારની હેરિટેજ ટ્રાન્સપોર્ટ સુવિધા વડનગરમાં આવતા દેશ-વિદેશના પ્રવાસીઓને સ્થાનિક વારસા સાથે વધુ નજીકથી જોડવાનો પ્રયાસ છે. પ્રવાસીઓને શહેરના હેરિટેજ સ્થળો સુધી પહોંચવામાં સુવિધા મળે તેની સાથે વડનગરની વિશિષ્ટ ઓળખ પણ વધુ મજબૂત બનશે.
વડનગરના વિકાસકામોની કરી સમીક્ષા
શ્રાવણોત્સવ અને હેરિટેજ ઓટો સેવાના પ્રારંભ બાદ નાયબ મુખ્યમંત્રી હર્ષ સંઘવીએ વડનગરના વિવિધ વિકાસ પ્રોજેક્ટ અંગે વરિષ્ઠ અધિકારીઓ સાથે સમીક્ષા બેઠક યોજી હતી.
બેઠક દરમિયાન પ્રવાસન વિકાસ, હેરિટેજ સંવર્ધન, માર્ગ અને શહેરી સુવિધાઓ સહિતના મુદ્દાઓ પર ચર્ચા કરવામાં આવી હતી. વડનગરમાં આવતા પ્રવાસીઓ માટે વધુ સારી સુવિધાઓ વિકસાવવા અને ચાલુ કામોને સમયસર પૂર્ણ કરવા સંબંધિત મુદ્દાઓની પણ સમીક્ષા કરવામાં આવી હતી.
ભક્તિ અને પ્રવાસનનો અનોખો સંગમ
વડનગરનો શ્રાવણોત્સવ માત્ર ધાર્મિક કાર્યક્રમ પૂરતો મર્યાદિત નથી. આ આયોજન દ્વારા શહેરના પ્રાચીન વારસા, લોકસંસ્કૃતિ અને ધાર્મિક પરંપરાને પ્રવાસન સાથે જોડવાનો પ્રયાસ કરવામાં આવ્યો છે.
શર્મિષ્ઠા તળાવ, હાટકેશ્વર મહાદેવ મંદિર અને વડનગરના અન્ય ઐતિહાસિક સ્થળો પહેલેથી જ શહેરની ઓળખ છે. હવે ડમરુ યાત્રા, શ્રાવણોત્સવ અને હેરિટેજ ઓટો જેવી પહેલો વડનગરના પ્રવાસન અનુભવને વધુ આકર્ષક બનાવી રહી છે.
મહાનુભાવોની રહી વિશેષ ઉપસ્થિતિ
આ ભક્તિસભર કાર્યક્રમમાં ઊંઝાના ધારાસભ્ય કિરીટભાઈ પટેલ, મહેસાણાના ધારાસભ્ય મુકેશભાઈ પટેલ, ખેરાલુના ધારાસભ્ય સરદારભાઈ ચૌધરી, જિલ્લા પંચાયત પ્રમુખ નીતિનભાઈ પટેલ, વડનગર નગરપાલિકા પ્રમુખ મિતિકાબેન શાહ અને જિલ્લા કલેક્ટર શાલિની દુહાન સહિતના મહાનુભાવો અને અધિકારીઓ ઉપસ્થિત રહ્યા હતા.
સ્થાનિક આગેવાનો, કલાકારો, શ્રદ્ધાળુઓ અને નગરજનોએ પણ મોટી સંખ્યામાં કાર્યક્રમમાં ભાગ લીધો હતો.
વડનગરને હેરિટેજ ટુરિઝમ હબ બનાવવાના પ્રયાસોને વેગ
વડનગર ગુજરાતની સૌથી પ્રાચીન અને ઐતિહાસિક નગરોમાં સ્થાન ધરાવે છે. પુરાતત્ત્વીય અવશેષો, પ્રાચીન મંદિરો, તળાવો અને સાંસ્કૃતિક વારસાને કારણે શહેર પ્રવાસન માટે વિશેષ મહત્વ ધરાવે છે.
શ્રાવણોત્સવ જેવા મોટા સાંસ્કૃતિક કાર્યક્રમો અને હેરિટેજ ઓટો જેવી નવી પહેલ વડનગરને વધુ પ્રવાસી-મૈત્રીપૂર્ણ બનાવવામાં મહત્વની ભૂમિકા ભજવી શકે છે. આ સાથે સ્થાનિક રોજગારી, નાના વેપાર અને પ્રવાસન સાથે જોડાયેલા વ્યવસાયોને પણ પ્રોત્સાહન મળવાની સંભાવના છે.
108 ડમરુના શિવમય નાદ સાથે શરૂ થયેલો વડનગર શ્રાવણોત્સવ ભક્તિ અને સંસ્કૃતિનું અનોખું દૃશ્ય રજૂ કરી રહ્યો છે. હેરિટેજ ટુરિઝમ અને આધુનિક પ્રવાસન સુવિધાઓ સાથે ઐતિહાસિક વડનગરને વૈશ્વિક પ્રવાસન નકશા પર વધુ મજબૂત રીતે સ્થાપિત કરવાની દિશામાં આ આયોજન મહત્વપૂર્ણ પગલું બની રહ્યું છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
