નડિયાદના ખોરાક અને ઔષધ નિયમન તંત્ર દ્વારા નાગરિકોને શુદ્ધ, સલામત અને ગુણવત્તાયુક્ત ખાદ્ય ચીજ વસ્તુઓ ઉપલબ્ધ રહે તે માટે ફૂડ સેફટી એન્ડ સ્ટાન્ડર્ડ એક્ટ હેઠળ કાર્યવાહી કરવામાં આવી છે. આ દરમિયાન જીલ્લાની ચાર પેઢીઓમાંથી ખાદ્ય સામગ્રીના નમૂનાઓ લઈ લેબોરેટરીમાં પરીક્ષણ કરાયું હતું. નમૂનાઓ ધોરણ મુજબ ના આવતા, ખાદ્ય ચીજોની ગુણવત્તા ખામીના આધારે કુલ રૂ. ૪,૭૫,૦૦૦ નો દંડ ફટકારવામાં આવ્યો છે.
કપડવંજના ગાયત્રી લસ્સીવાલાની મસાલા બટર મિલ્ક (૩૦૦ એમએલ પેક પાઉચ) નમૂનો તા. ૨૨/૦૫/૨૦૨૪ના રોજ લેવામાં આવેલ, જેને મિસબ્રાન્ડેડ જાહેર કરી ૨૮/૦૪/૨૦૨૫ના રોજ રૂ. ૨૦,૦૦૦ નો દંડ ફટકારાયો હતો. તેવી જ રીતે નડિયાદની ઉત્તરસંડા દૂધ ઉત્પાદક મંડળીના લૂઝ ગાયના દૂધનોં નમૂનો તા. ૦૬/૦૯/૨૦૨૪ના રોજ લેવામાં આવેલ, જેને સબસ્ટાન્ડર્ડ જાહેર કરી રૂ. ૧૦,૦૦૦ નો દંડ ફટકારવામાં આવ્યો છે.
તદુપરાંત, નડિયાદના મેઘના સેલ્સ એજન્સી દ્વારા વેચાતા ધી (શ્રી સરસ બ્રાન્ડ, ૨૦૦ એમએલ જાર) નમૂનો તા. ૨૬/૦૯/૨૦૨૩ના રોજ લેવામાં આવ્યો હતો. ધી સબસ્ટાન્ડર્ડ જાહેર થતા રૂ. ૨,૩૫,૦૦૦ નો દંડ કરવામાં આવ્યો છે. તથા ડાકોર એપીએમસી માર્કેટ ખાતે આવેલ અમૃત કિરાણા સ્ટોરના અમૃત બ્રાન્ડના ધી (૫૦૦ એમએલ પેક જાર) નો નમૂનો તા. ૨૦/૧૦/૨૦૨૩ના રોજ લેવામાં આવેલ, જેને પણ સબસ્ટાન્ડર્ડ જાહેર કરી તા. ૨૮/૦૪/૨૦૨૫ના રોજ રૂ. ૨,૧૦,૦૦૦ નો દંડ ફટકારાયો છે.
આ તમામ કેસોમાં રેસીન્ડેશીઅલ એડીશનલ કલેકટર જે.બી.દેસાઈ અને એજયુડીકેટીંગ ઓફીસરની કોર્ટમાં અરજી દાખલ કરવામાં આવેલ જે અંગે ખાદ્ય ચીજની ક્ષતીને ધ્યાને લેતા એડજયુડીકેટીંગ કેસ ચલાવી ઉપરોક્ત પેઢીઓ સામે કાર્યવાહી કરવામાં આવી છે. આ માહિતી ખોરાક અને ઔષધ નિયમન તંત્ર, નડીઆદની અખબારી યાદીમાં જાહેર કરવામાં આવી છે.
