કંઈ મોટું થવાનું છે? PM મોદી રાષ્ટ્રપતિને મળ્યા, તો જેપી નડ્ડાના ઘરે દિગ્ગજ નેતાઓની બંધ બારણે બેઠક

સૂત્રોના જણાવ્યા અનુસાર આ બેઠકમાં ઘણા મહત્વપૂર્ણ મુદ્દાઓ પર ચર્ચા થઈ હતી. અમિત શાહ અને રાજનાથ સિંહ જેવા નેતાઓની હાજરી સૂચવે છે કે રાષ્ટ્રીય સુરક્ષા અને સંરક્ષણ સંબંધિત મુદ્દાઓ પર ચર્ચાથઈ હોઈ શકે. પિયુષ ગોયલ અને અશ્વિની વૈષ્ણવની હાજરી આર્થિક અને માળખાગત સુવિધાઓ સંબંધિત મુદ્દાઓ તરફ ઈશારો કરે છે. કેટલાક નિષ્ણાતો કહે છે કે આ બેઠક મંત્રીમંડળના વિસ્તરણ અથવા ફેરબદલની શક્યતાને પણ મજબૂત બનાવી રહી છે.

PM મોદીની રાષ્ટ્રપતિ સાથે મુલાકાત

પ્રધાનમંત્રી નરેન્દ્ર મોદી રાષ્ટ્રપતિ ભવન પહોંચ્યા અને રાષ્ટ્રપતિ દ્રૌપદી મુર્મુને મળ્યા હતા. આ બેઠક પણ લગભગ એક કલાક ચાલી હતી. જોકે આ બેઠકનો સત્તાવાર એજન્ડા જાહેર કરવામાં આવ્યો નથી. પરંતુ રાજકીય વર્તુળોમાં આ અંગે અનેક અટકળો લગાવવામાં આવી રહી છે. કેટલાક માને છે કે આ એક ઔપચારિક બેઠક હોઈ શકે છે, પરંતુ તેને નડ્ડાના નિવાસસ્થાને ચાલી રહેલી બેઠક સાથે જોડવામાં આવી રહી છે. શું આ બેઠક કોઈ મોટા બંધારણીય કે વહીવટી નિર્ણય સાથે સંબંધિત છે? શું સરકાર કોઈ મોટું પગલું ભરવાની તૈયારી કરી રહી છે? આ પ્રશ્નો સોશિયલ મીડિયા અને રાજકીય વર્તુળોમાં ચર્ચાનો વિષય બન્યા છે.

બેઠક બાદ અટકળોનું બજાર ગરમ

સોશિયલ મીડિયા પર પણ આ ઘટનાઓની ઘણી ચર્ચા થઈ રહી છે. કેટલાક લોકો કહી રહ્યાં છે કે, કંઈક તોફાનના સંકેત છે. એક યુઝરે લખ્યું, ‘મોદીજીની રાષ્ટ્રપતિ સાથે મુલાકાત અને નડ્ડાના ઘરે ટોચના નેતાઓની મુલાકાત – ચોક્કસપણે કંઈક મોટું થવાનું છે.’ કેટલાક લોકોએ તેને કેબિનેટ વિસ્તરણ સાથે જોડ્યું, જ્યારે કેટલાક લોકોએ તેને તાજેતરના રાજકીય વિકાસ, જેમ કે વિપક્ષી નેતાઓ સામે ED ની કાર્યવાહી સાથે જોડ્યું. જોકે, આ અટકળોને કોઈ સત્તાવાર રીતે પુષ્ટિ મળી નથી.