૭૯મા સ્વાતંત્ર્ય દિનની ઉજવણી શેઠ.એમ.આર. હાઈસ્કૂલ કઠલાલ ખાતે થશે

જિલ્લા કલેકટર અમિત પ્રકાશ યાદવની અધ્યક્ષતામાં કલેકટર કચેરી નડિયાદ ખાતે ૭૯મા સ્વાતંત્ર્ય દિન ઉજવણીના જિલ્લા કક્ષાના કાર્યક્રમના આયોજન બાબતે એક મહત્વપૂર્ણ બેઠકનું આયોજન કરવામાં આવ્યું. જેમાં, સ્વાતંત્ર્ય દિન ઉજવણી કાર્યક્રમ માટે વિભિન્ન વિભાગોની કામગીરીની રૂપરેખા પ્રસ્તુત કરવામાં આવી અને કાર્યક્રમનુ સફળ આયોજન કરવા જરૂરી માર્ગદર્શન આપવામાં આવ્યું.

બેઠક અંતર્ગત પરેડ, પ્લાટુન, વોલી ફાયરિંગ, વૃક્ષારોપણ, ધ્વજવંદન, સ્ટેજ વ્યવસ્થા, સાંસ્કૃતિક કાર્યક્રમ, શ્રેષ્ઠ કામગીરી કરનારાઓનું સન્માન, પીવાના પાણીની વ્યવસ્થા, મેડિકલ અને વીજ વ્યવસ્થા, સાફ-સફાઈ, રોડ રસ્તા દુરસ્તી સહિતની કાર્યક્રમ સ્થળ અને કઠલાલ શહેરની અન્ય જાહેર વ્યવસ્થાઓ સુદ્રઢ કરવા માટે સંબંધિત વિભાગોને સુચારુ આયોજન કરવા જણાવવામાં આવ્યું.

કલેકટર અમિત પ્રકાશ યાદવે ખાસ કરીને રોડ-રસ્તા, ગટર વ્યવસ્થા, સરકારી ઇમારતો, બ્રિજ અને આરોગ્યની કામગીરીમાં વિશેષ ધ્યાન રાખવા તાકીદ કરી.

આ બેઠકમાં પોલીસ અધિક્ષક રાજેશ ગઢીયા, આઈપીએસ અતુલ બંસલ, નાયબ વન સંરક્ષક અભિષેક સામરીયા, નિવાસી અધિક કલેક્ટર જે.બી.દેસાઈ સહિત સંબંધિત વિભાગના અધિકારીઓ ઉપસ્થિત રહ્યા હતા.