સણસોલી ગામે સ્વયંભૂ પ્રગટ હનુમાનજીનું મંદિર, દાદા 5000 વર્ષથી બિરાજમાન હોવાની લોકવાયકા

વર્ષો પહેલા મહાભારત કાળમાં હેડંબા વનમાં પાંડવો અજ્ઞાતવાસ દરમિયાન અહિં રોકાયા હતા ત્યારે ભીમનું અભિમાન ઉતારવા તેમનો માર્ગ રોકવા માટે હનુમાનજીએ પોતાની પૂંછ માર્ગમાં આડી કરી હતી અને એટલે જ આ મંદિરમાં હનુમાનજીની પૂંછ જોઈ નથી શકાતી તેવી લોકવાયકા છે. મંદિરમાં હનુમાનજીની મૂર્તિ વિશ્રામ મુદ્રામાં છે. ભારતભરમાં આ મુદ્રામાં હનુમાનજીની મૂર્તિ વાળુ મંદિર બીજે ક્યાંય ન હોવાનું માનવામાં આવે છે. હનુમાનજીનું મંદિર વર્ષોથી એક જ પ્રકારનું એક જ સ્થિતિમાં રહેલું છે. વર્ષોથી સણસોલીયા હનુમાનજીને અનેક પ્રકારની વિધિ મુજબ આભૂષણોથી તૈયાર કરવામાં આવે છે વર્ષ દરમિયાન અનેક તહેવારો તેમજ હનુમાન જયંતી નિમિત્તે ચાંદીના છત્તર નીચે બિરાજમાન દાદાને આભૂષણોથી સજાવવામાં આવે છે. જ્યારે પણ મૂર્તિની સજાવટ કરવામાં આવે છે ત્યારે ચોલો ચડાવ્યા બાદ મૂર્તિનો ચાંદીના વરખથી શણગાર કરવામાં આવે છે અને સુંદર આભૂષણોથી સજાવટ કરવામાં આવે છે. મંદિરમાં વર્ષોથી ચાલતી પરંપરા હાલમાં પણ યથાવત છે. દાદાને ચોલો ચડાવવાની પરંપરા હાલની પેઢી પણ નિભાવે છે. હનુમાનજીને ચોલો ચડાવે ત્યારે જુનો ચોરો ઉતારવામાં આવે છે. અને તે ઉતારીને બાજુમાં આવેલા મંદિર પાસે તેનો ઢગ કરવામાં આવે છે. આ પરંપરા હજારો વર્ષથી ચાલી આવે છે એટલે ચોલાનો ઢગ હાલ મંદિર જેટલો ઊંચો થઈ ગયો છે. એકવાર સ્થાનિક મંદિરના પૂજારીને સ્વપ્ન આવ્યું અને સ્વપ્નમાં પૂજારીને કહેવામાં આવ્યું કે કાળભૈરવ ચોલાના ઢગ નીચે દબાઈ ગયેલા છે તેમને કાઢો. દટાયેલા કાળભૈરવને કાઢવા માટે સવારે મંદિરના પૂજારી તેમજ ટ્રસ્ટીગણ ભેગા થઈ વિધિ મુજબ ઢગને ખોલ્યો ત્યારે તેમાંથી કાળભૈરવની મૂર્તિ નીકળી હતી. તેને દાદાની બાજુમાં સ્થાપિત કરવામાં આવી છે.