વિદેશ મંત્રાલયે NATOના સેક્રેટરી જનરલ માર્ક રૂટે ભારતને રશિયાથી ક્રૂડ ખરીદવા મુદ્દે આપેલી ચીમકી પર સખત અને સ્પષ્ટ પ્રતિક્રિયા આપી છે. વિદેશ મંત્રાલયના પ્રવક્તા રણધીર જયસ્વાલે જણાવ્યું કે ભારત પોતાનાં નાગરિકોની સુરક્ષા અને ઊર્જાની જરૂરિયાતોને હંમેશા સર્વોચ્ચ પ્રાધાન્ય આપે છે અને તેમાં કોઇપણ પ્રકારનું દબાણ સહન કરાશે નહીં. તેમણે જણાવ્યું કે, “અમે રશિયા પાસેથી ક્રૂડ ખરીદવા અંગે સેકેન્ડરી પ્રતિબંધોના અહેવાલો જોયા છે અને આ પરિસ્થિતિ પર ગંભીરતાથી નજર રાખી રહ્યા છીએ. પરંતુ એક મુદ્દો સ્પષ્ટ છે — ભારત માટે ઉર્જાની સપ્લાય જાળવી રાખવી એ રાષ્ટ્રીય હિતનો પ્રશ્ન છે અને અમે વૈશ્વિક બજારની સ્થિતિને જોતા સર્વોત્તમ વિકલ્પ પસંદ કરીશું.”
જયસ્વાલે જણાવ્યું કે ભારતમાં ઉપલબ્ધ વિકલ્પો તથા વૈશ્વિક પરિસ્થિતિના આધારે પોતાનું નીતિગત નિર્ણય લે છે અને “કોઈ પણ દેશ અથવા સંગઠન દ્વારા દુબળું વલણ અપનાવવામાં નહીં આવે.” NATOના સેક્રેટરી જનરલે બુધવારે ભારત, ચીન અને બ્રાઝિલને ચેતવણી આપી હતી કે જો તેઓ રશિયાથી ક્રૂડ ખરીદી ચાલુ રાખશે તો તેમને સેકેન્ડરી પ્રતિબંધોનો સામનો કરવો પડી શકે છે. સાથે જ તેમણે આ ત્રણેય દેશોને રશિયાના પ્રમુખ વ્લાદિમીર પુતિન પર યુક્રેન સાથે શાંતિ માટે દબાણ કરવા પણ કહ્યું હતું.
#WATCH | Delhi | On Nato chief Mark Rutte's comment that countries buying Russian oil could face secondary sanctions, MEA spokesperson Randhir Jaiswal says, "We have seen reports on the subject and are closely following the developments. Let me reiterate that securing the energy… pic.twitter.com/SdhmWRQYLL
— ANI (@ANI) July 17, 2025
વિશ્લેષકો મુજબ, ભારત રશિયાથી મોટાપાયે સસ્તા દરે ક્રૂડ ખરીદી રહ્યું છે, જે તેના ઊર્જા બજેટ અને ઘરેલુ આવશ્યકતાઓ માટે ખૂબ જ મહત્વનું છે. ભારત અગાઉ પણ સ્પષ્ટ કહી ચૂક્યું છે કે તે એક નિકાસનિર્ભર દેશ છે અને પોતાનાં વ્યૂહાત્મક હિતોને ધ્યાને રાખીને ક્રૂડ આયાત કરશે, ભલે તે રશિયાથી હોય કે અન્ય દેશથી.
આ પ્રસંગે રણધીર જયસ્વાલે યમનમાં ફાંસીની સજાનો સામનો કરી રહેલી ભારતીય નર્સ નિમિષા પ્રિયા અંગે પણ પ્રતિક્રિયા આપી. તેમણે જણાવ્યું કે ભારત સરકાર તેમની મદદ માટે તમામ શક્ય પ્રયાસો કરી રહી છે. “અમે નિમિષા માટે કાયદાકીય સહાયતા પણ પૂરી પાડી છે. એક વકીલની નિમણૂક કરીને તેમના પરિવારના સંપર્કમાં છીએ અને સ્થાનિક અધિકારીઓ સાથે પણ સતત સંવાદ ચાલી રહ્યો છે,” એમ જયસ્વાલે ઉમેર્યું.
ભારતની આ બે મુદ્દાઓ પરની સ્પષ્ટ અને દૃઢ વલણવાળા પ્રતિસાદે આંતરરાષ્ટ્રીય સ્તરે ભારતની નીતિગત આત્મનિર્ભરતા અને નાગરિકહિતપ્રથમ અભિગમને વધુ સ્પષ્ટતા આપી છે.
