તાપી જિલ્લાના સોનગઢ નગરમાં સોશિયલ મીડિયા પર થયેલી એક વાંધાજનક ટિપ્પણી અને ત્યારબાદ ફાટી નીકળેલી હિંસા મામલે પોલીસે લાલ આંખ કરી છે. નવરાત્રિના પવિત્ર પર્વ નજીક છે ત્યારે નગરનું વાતાવરણ ડહોળવાનો પ્રયાસ કરનારા અસામાજિક તત્વો સામે પોલીસે કડક કાર્યવાહી હાથ ધરી છે. આ મામલે પોલીસે સગીર સહિત કુલ 10 આરોપીઓની અટકાયત કરી લીધી છે અને કાયદો તથા વ્યવસ્થા જાળવવા માટે આરોપીઓનું જાહેરમાં સરઘસ કાઢવામાં આવ્યું હતું.
સોશિયલ મીડિયા પર વિવાદ અને પથ્થરમારો
આ સમગ્ર વિવાદની શરૂઆત સોશિયલ મીડિયા પર થયેલી એક વાંધાજનક કોમેન્ટથી થઈ હતી. હિન્દુ સંગઠનના સોશિયલ મીડિયા પેજ પર નવરાત્રિ અંગે એક વિધર્મી યુવક દ્વારા વાંધાજનક ટિપ્પણી કરવામાં આવી હતી. આ ટિપ્પણી સામે મુસ્લિમ ફળિયા પાસે રહેતા ગૌરવ ચૌધરી નામના સ્થાનિક યુવકે વળતો જવાબ આપીને પ્રતિભાવ આપ્યો હતો.
આ પ્રતિભાવથી ઉશ્કેરાઈને 20 થી 25 લોકોના ટોળાએ એકાએક ગૌરવ ચૌધરીના ઘર પર હુમલો કરી બેફામ પથ્થરમારો કર્યો હતો. અચાનક થયેલા આ હુમલાથી ઘરમાં હાજર પરિવારજનો ભયભીત થઈ ગયા હતા. ઘટનાની ગંભીરતા જોતા સોનગઢ પોલીસ તાત્કાલિક ઘટનાસ્થળે દોડી આવી હતી અને પરિસ્થિતિને કાબૂમાં લીધી હતી.
સગીર સહિત 10 આરોપીઓની ધરપકડ, પોલીસે ભણાવ્યો કાયદાનો પાઠ
ઘટનાની ગંભીરતાને ધ્યાનમાં રાખીને સોનગઢ પોલીસે ત્વરિત દરોડા પાડીને તોફાની તત્વોની ધરપકડનો દોર શરૂ કર્યો હતો. તપાસ દરમિયાન પોલીસે એક સગીર સહિત કુલ 10 શખ્સોની અટકાયત કરી લીધી છે. સ્થાનિક રહીશોમાં ભય ફેલાવનારા આ તમામ ઈસમોને પોલીસે કાયદાનો પાઠ ભણાવ્યો છે. હિંસા ફેલાવવામાં સામેલ અન્ય ફરાર આરોપીઓને ઝડપી પાડવા માટે પોલીસની અલગ-અલગ ટીમો સઘન તપાસ ચલાવી રહી છે.
અસામાજિક તત્વોમાં ખોફ બેસાડવા નગરમાં કાઢ્યું સરઘસ
ભવિષ્યમાં કોઈ પણ અસામાજિક તત્વ કાયદો હાથમાં લેવાની હિંમત ન કરે તેવા હેતુસર પોલીસે કડક દાખલો બેસાડ્યો હતો. સોનગઢ પોલીસે પકડાયેલા આરોપીઓના હાથ બાંધીને લોકો વચ્ચેથી પસાર થતું સરઘસ કાઢ્યું હતું. આશરે 9 જેટલા આરોપીઓને દોરડે બાંધીને ભરબજારે પગપાળા ફેરવવામાં આવ્યા હતા. જે વિસ્તારમાં તેમણે આતંક મચાવ્યો હતો અને ભય પેદા કરવાનો પ્રયાસ કર્યો હતો, તે જ વિસ્તારમાં ચુસ્ત પોલીસ બંદોબસ્ત વચ્ચે માથું ઝૂકાવીને આરોપીઓને ફેરવવામાં આવ્યા હતા.
હિન્દુ સંગઠનોનો આક્રોશ અને પ્રશાસનની ચેતવણી
આ ઘટના બાદ સ્થાનિક હિન્દુ સંગઠનોમાં ભારે રોષ જોવા મળ્યો હતો અને સોનગઢ બંધનું એલાન પણ આપવામાં આવ્યું હતું. જોકે, પોલીસ દ્વારા કડક ન્યાયની ખાતરી આપ્યા બાદ આંદોલનનું એલાન પરત ખેંચવામાં આવ્યું હતું. જિલ્લા પોલીસ વડા અને ઉચ્ચ અધિકારીઓના માર્ગદર્શન હેઠળ ગુનો નોંધી આરોપીઓ પર ત્વરિત કાર્યવાહી કરવામાં આવી છે. હાલ સોનગઢમાં સંપૂર્ણપણે શાંતિપૂર્ણ વાતાવરણ છે. વહીવટી તંત્ર અને પોલીસે સ્પષ્ટ ચેતવણી આપી છે કે, નગરમાં કોઈ પણ અસામાજિક પ્રવૃત્તિ કે અફવા ફેલાવનારાઓ સામે સખતમાં સખત પગલાં લેવામાં આવશે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
