મ્યાનમારમાં 7.7 અને 7.2 ની ભારે તીવ્રતાવાળા બે ભૂકંપની અસર છેક ભારત, બેંગકોક સુધી જોવા મળી હતી. જોકે હવે તાજેતરના અહેવાલ અનુસાર આ ભૂકંપને કારણે બાંગ્લાદેશ પણ બાકાત રહ્યું નથી. બાંગ્લાદેશમાં પણ 7.3ની તીવ્રતાનો જોરદાર ભૂકંપ અનુભવાયો હોવાનો દાવો કરવામાં આવી રહ્યો છે. બાંગ્લાદેશમાં ભૂકંપના ભારે આંચકાને પગલે ઢાકા અને ચટગાંવ સહિત અનેક શહેરો હચમચી ગયા હતા.
બાંગ્લાદેશની સરહદે જ હતું ભૂકંપનું કેન્દ્ર
બાંગ્લાદેશના હવામાન વિભાગના જણાવ્યાનુસાર શુક્રવારે બપોરના સમયે 12:25 વાગ્યે ઢાકા સહિત દેશના વિવિધ ભાગોમાં રિક્ટર સ્કેલ પર 7.3ની તીવ્રતાનો જોરદાર ભૂકંપ અનુભવાયો હતો. ભૂકંપનું કેન્દ્ર બાંગ્લાદેશની સરહદે મ્યાનમારના માંડલેમાં હતું. જોકે ઢાકાથી ભૂકંપનું કેન્દ્ર લગભગ 597 કિ.મી. દૂર હતું. આ ભૂકંપની તીવ્રતા ભારે હોવાને કારણે તેને મોટા ભૂકંપની શ્રેણીમાં ગણવામાં આવશે.
પીએમ મોદીએ કર્યું ટ્વિટ
વડાપ્રધાન નરેન્દ્ર મોદીએ મ્યાનમાર અને થાઇલેન્ડમાં ભૂકંપ બાદ સ્થિતિ પર ચિંતા વ્યક્ત કરતાં કહ્યું કે મ્યાનમાર અને થાઈલેન્ડમાં ભૂકંપ બાદની સ્થિતિ અંગે ચિંતિત છું. બધા સુરક્ષિત રહે તેવી મારી પ્રાર્થના છે. અમે દરેક સંભવ મદદ માટે તૈયાર છીએ. અમે આ મામલે તંત્રને એલર્ટ રહેવા કહ્યું છે. સાથે જ વિદેશ મંત્રાલયને કહ્યું છે કે તે આ મામલે મ્યાનમાર અને થાઈલેન્ડની સરકારના સંપર્કમાં રહે. તમામ સુરક્ષિત રહે તેવી કામના.
Concerned by the situation in the wake of the Earthquake in Myanmar and Thailand. Praying for the safety and wellbeing of everyone. India stands ready to offer all possible assistance. In this regard, asked our authorities to be on standby. Also asked the MEA to remain in touch…
— Narendra Modi (@narendramodi) March 28, 2025
ભૂકંપમાં ક્યાં કેવી જાનહાનિ?
આ સાથે ભૂકંપમાં મૃત્યુનો અત્યાર સુધીનો લેટેસ્ટ આંકડો સામે આવી ગયો છે. માહિતી મુજબ મ્યાનમારના માંડાલેમાં 20 લોકો જ્યારે તાઉંગૂ ખાતે 5 લોકોના મોત થયા હતા. જ્યારે થાઈલેનડમાં ડઝનેક લોકો ઈજાગ્રસ્ત થયા છે જ્યારે 43 લોકોની અત્યાર સુધી કોઈ ભાળ મળી નથી. કુલ મિલાવીને બંને દેશોના મિલાવીને 25 લોકો મૃત્યુ પામી ચૂક્યા છે જ્યારે 43 લોકો હજુ ગુમ છે અને સેંકડો લોકો ઈજાગ્રસ્ત પણ છે.
