મહીસાગર જિલ્લાના લુણાવાડા તાલુકાના દોલતપુરા ગામે આવેલા અજંતા એનર્જી પ્રાઈવેટ લિમિટેડના હાઈડ્રો પાવર પ્રોજેક્ટમાં બનેલી દુર્ઘટનાએ સમગ્ર વિસ્તારમાં ચકચાર મચાવી છે. કડાણા ડેમમાંથી પાણી છોડાયા બાદ અચાનક જ પ્રોજેક્ટની અંદર જળસ્તર વધી ગયું, જેના કારણે કામ કરતા મજૂરોને જીવ બચાવવાનો મોકો પણ ન મળ્યો. અંદર અંદાજે 12 થી 15 લોકો હાજર હતા, જેમાંથી 10 વ્યક્તિઓ કોઈ રીતે બચીને બહાર આવી શક્યા પરંતુ 5 યુવાનો પાણીમાં ગરકાવ થઈ ગયા. અત્યાર સુધી આ પાંચેય યુવકોનો કોઈ અત્તો પત્તો મળ્યો નથી, જેના કારણે તેમના પરિવારજનોમાં ભારે ચિંતા અને આક્રંદ જોવા મળી રહ્યો છે.
આ દુર્ઘટના બપોરે ત્રણ વાગ્યાની આસપાસ બની હતી. બચી ગયેલા કર્મચારી અલ્પેશ પટેલે પોતાના નિવેદનમાં જણાવ્યું કે અંદરથી અચાનક જ 200 ફૂટ નીચે બ્લાસ્ટ થયાની અસરથી જોરદાર દબાણ સાથે પાણી પ્લાન્ટમાં ઘૂસી આવ્યું હતું. પાણી એટલી ઝડપે આવ્યું કે અંદર હાજર લોકોને સંભાળવાનો કે ભાગવાનો સમય જ મળ્યો નહીં. જેમને તરવું આવડતું હતું અથવા આસપાસ કોઈ વસ્તુ પકડી શક્યા તેઓ બહાર આવી બચી ગયા, પરંતુ બાકીના યુવાનો પળવારમાં પાણીમાં સમાઈ ગયા.
દુર્ઘટના બાદ તાત્કાલિક લુણાવાડા નગરપાલિકાની ફાયર ટીમ, SDRF અને બાદમાં ગાંધીનગરની NDRF ટીમે શોધખોળ શરૂ કરી હતી. છેલ્લા 17 કલાકથી સતત શોધખોળ ચાલુ છે, પરંતુ હજી સુધી ગુમ થયેલા પાંચેય યુવકોનો કોઈ પત્તો મળ્યો નથી. એનડીઆરએફની ટીમો આધુનિક સાધનો સાથે પાણીની અંદર તપાસ કરી રહી છે, સાથે જ પ્રોજેક્ટની અંદર ભરાયેલા પાણીને પંપ વડે ખાલી કરવાની પ્રક્રિયા પણ શરૂ કરવામાં આવી છે જેથી અંદરની સ્થિતિ વધુ સ્પષ્ટ થાય.
આ ઘટનાની પૃષ્ઠભૂમિમાં ચોંકાવનારી માહિતી પણ સામે આવી છે. આ હાઈડ્રો પાવર પ્રોજેક્ટ મોરબીના ઝૂલતા પુલ કેસમાં જવાબદાર ગણાતા જયસુખ પટેલ સાથે સંકળાયેલ હોવાનું જાણવા મળ્યું છે. મોરબી દુર્ઘટનામાં બેદરકારીના કારણે 140થી વધુ લોકોએ જીવ ગુમાવ્યો હતો, અને હવે મહીસાગર નદીના આ પ્રોજેક્ટમાં પણ એવી જ બેદરકારીના કારણે ગંભીર દુર્ઘટના સર્જાઈ હોવાનો આક્ષેપ થઈ રહ્યો છે.
હાલમાં જિલ્લા વહીવટી તંત્ર અને ઉચ્ચ અધિકારીઓ ઘટના સ્થળે હાજર રહી કામગીરી પર સતત નજર રાખી રહ્યા છે. પરિવારો પોતાના લાડકવાયાઓની આતુરતાથી રાહ જોઈ રહ્યાં છે અને તેઓ જીવિત કે મૃત હાલતમાં મળી રહે તેવી વિનંતી કરી રહ્યાં છે. આ ઘટનાએ પ્રોજેક્ટની સુરક્ષા વ્યવસ્થા, જવાબદારી અને બેદરકારી અંગે ગંભીર સવાલો ઉભા કર્યા છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
