ગુજરાત રાજ્યની અગ્રણી અને ખેડૂતોની પોતાની બેંક, જે છેલ્લા ૭૭ વર્ષથી બૃહદ ખેડા જિલ્લામાં પોતાની ઉત્કૃષ્ટ સેવાઓ આપી રહી છે, તે હવે “ધી ખેડા ડિસ્ટ્રિક્ટ સેન્ટ્રલ કો ઓપરેટિવ બેન્ક લિમિટેડ” તરીકે ઓળખાશે. રિઝર્વ બેંક ઑફ ઇન્ડિયા (RBI) દ્વારા “કૈરા” ને બદલે “ખેડા” નામકરણને સત્તાવાર મંજૂરી મળતાં, બેંકના સંચાલક મંડળના સુચારુ પ્રયાસોને ભવ્ય સફળતા મળી છે. કૈરા” નામ અંગ્રેજોના ઉચ્ચારણ પર આધારિત હતું અને ભૂતકાળનું પ્રતીક હતું. “ખેડા” એ ઐતિહાસિક અને પ્રાદેશિક રીતે સુસંગત નામ છે, જે સરદાર વલ્લભભાઈ પટેલના જન્મસ્થળ સાથે પણ જોડાયેલું છે.
ઐતિહાસિક નામકરણ અને આઝાદીના પ્રતીક રૂપે “ખેડા”
ભારતના આઝાદી સંગ્રામમાં ખેડાનું નામ ખૂબ જ પ્રચલિત છે, જ્યાં સરદાર વલ્લભભાઈ પટેલ સાહેબનું જન્મસ્થાન આવેલું છે. આ પવિત્ર ભૂમિમાં તેમના વિચારો અને સપનાથી ૧૯૪૯માં સ્થપાયેલી આ જિલ્લા સહકારી બેંકને, અંગ્રેજોના શાસનકાળ દરમિયાન તેમના ઉચ્ચારણ અનુસાર “કૈરા” નામ આપવામાં આવ્યું હતું. તે સમયે RBI દ્વારા બેંકના રજીસ્ટ્રેશન માટે “કૈરા” (અંગ્રેજીમાં) અને “ખેડા” (હિન્દીમાં) એમ બે નામોનું લાયસન્સ અપાયું હતું. એક જ બેંકના જુદા જુદા અર્થઘટન વાળા આ નામથી પેદા થતી મૂંઝવણ અને “કૈરા” નામ સાથે જોડાયેલી ગુલામીની પ્રતીતિને દૂર કરવા માટે, બેંકના નિયામક મંડળે ૭૭ વર્ષ પછી આ ઐતિહાસિક નિર્ણય લીધો.
સંચાલક મંડળના અથાક પ્રયાસોને સફળતા “કૈરા” નામનું કોઈ ગામ અસ્તિત્વમાં ન હોવાથી અને વર્તમાન તથા આવનારી પેઢીને આ નામથી અવગત ન હોવાના કારણે સર્જાતી ગેરસમજને ધ્યાનમાં રાખીને, સંચાલક મંડળે આ બાબતને ગંભીરતાથી લીધી. બેંકની સાધારણ સભામાં ખાસ ઠરાવ પસાર કરીને, RBI સમક્ષ નામ સુધારણા માટે દરખાસ્ત કરવામાં આવી હતી.
RBI દ્વારા આ દરખાસ્તને મંજૂરી મળતા, આજથી “ધી ખેડા ડિસ્ટ્રિક્ટ સેન્ટ્રલ કો ઓપરેટિવ બેન્ક લિમિટેડ” નામ સત્તાવાર રીતે અમલમાં આવ્યું છે. આ ઐતિહાસિક પરિવર્તન પર બેંકના ચેરમેન અને સંચાલક મંડળે તમામ ગ્રાહકો અને સભાસદોને હાર્દિક અભિનંદન પાઠવ્યા છે તથા આ બાબતની જાણ કરી છે. ગ્રાહકો અને સભાસદો માટે એ જ સંદેશ છે કે આ નવા નામ સાથે બેંકની ભાવિ પ્રતિબદ્ધતા તથા સેવાઓ વધુ ઉત્કૃષ્ટ બનશે.હવે એક જ ઓળખ, “ખેડા” નામ સાથે, જિલ્લા બેંક આપના આંગણે વિવિધ સર્વશ્રેષ્ઠ સેવાઓ પહોંચાડવા માટે હંમેશા કટિબદ્ધ છે.
