અંકલેશ્વર જિલ્લાના વાલિયા તાલુકામાં આવેલા કોંઢ ગામ અને સિલુડી ગામ વચ્ચેના રસ્તે એક ભયાનક હત્યાની ઘટના પ્રકાશમાં આવી છે. શુક્રવારના રોજ એક મહિલાનો લોહીલુહાણ હાલતમાં મૃતદેહ નાળાની નીચે મળતા સ્થાનિક વિસ્તારમાં દહેશતનું વાતાવરણ છવાઈ ગયું હતું. મૃતદેહ પર ઘણા ગંભીર ઘા દેખાતા અને ગળું કાપેલું હોય તેવું જણાતા પોલીસે તાત્કાલિક તપાસ શરૂ કરી હતી. ગણતરીની કલાકોમાં જ પોલીસને સફળતા મળતાં હત્યા પાછળનો ભેદ ઉકેલી લેવાયો છે. ચોંકાવનારી વાત એ છે કે મહિલાનો હત્યારો બીજો કોઈ નહીં, પરંતુ તેનો પતિ પોતે જ હતો.
પ્રાપ્ત માહિતી અનુસાર, મૃતક મહિલા અંકલેશ્વર GIDC વિસ્તારમાં રહેતી હતી અને તેનો પતિ રાજેન્દ્ર રામચંદ્ર શ્રીવાસ્તવ છે, જે ઝઘડીયા નજીક ઉછાલી ખાતે પેટ્રોલ પંપ ચલાવે છે. પોલીસ જ્યારે ઘટનાની શંકાના આધારે મહિલાની ઓળખ માટે તેની રહેણાંક જગ્યાએ પહોંચી, ત્યારે તેને મળેલા પુરાવાઓ અને પુછપરછમાં રાજેન્દ્ર શંકાસ્પદ જણાયો. પોલીસની કડક પૂછપરછ દરમિયાન રાજેન્દ્રે હત્યાનો સ્વીકાર કર્યો.
તેનાં જણાવ્યા મુજબ, બંનેનો પાંચ વર્ષ પહેલાં મેટ્રિમોનિયલ સાઇટ મારફતે પરિચય થયો હતો અને પછી લગ્ન થયા હતા. તેમનો ચાર વર્ષનો પુત્ર પણ છે. રાજેન્દ્રે પોલીસને જણાવ્યું કે તે પોતાની પત્ની રૂચિના રોજિંદા ઝઘડાઓથી કંટાળી ગયો હતો. 9 જુલાઈના રોજ રાત્રે, માતાજીની પૂજા માટે ઘરમાં રાખેલી કર્તાલથી રૂચિના ગળા પર હુમલો કરી તેની હત્યા કરી દીધી હતી. હત્યા બાદ મૃતદેહને ચાદરમાં લપેટીને કોંઢ ગામના નાળામાં જઈને ફેંકી દીધો હતો અને પછી શાંતિથી ઘરે આવી ગયો હતો.
પોલીસે રાજેન્દ્રની અટકાયત કરી તેની પાસેથી ગુનામાં ઉપયોગ કરાયેલા હથિયાર અને અન્ય પુરાવાઓ મેળવવાની કાર્યવાહી શરૂ કરી છે. આ ઘટનાએ સમગ્ર અંકલેશ્વર વિસ્તારમાં ઉથલપાથલ મચાવી દીધી છે. એક સ્વજને જ એવો ક્રૂર ષડ્યંત્ર ઘડી પત્નીની હત્યા કરી હોવાની હકીકત જાણીને લોકો સ્તબ્ધ છે. હાલ પોલીસ આ ગુનાની તપાસ આગળ ધપાવી રહી છે અને હત્યા પાછળના તમામ કારણોની ઊંડાણપૂર્વક તપાસ કરવામાં આવી રહી છે.
