બનાસકાંઠા જિલ્લાના ડીસા નજીક આવેલા ગામમાં એક જ સપ્તાહ દરમિયાન 22 થી 27 વર્ષની ચાર યુવતીઓએ અન્ય ધર્મના યુવકો સાથે લગ્ન કરવાની વાત કરતા મામલો ગંભીર બન્યો છે. યુવતીઓના પરિવારજનો દ્વારા સરપંચને જાણ કરવામાં આવતા આ મુદ્દે કાનૂની કાર્યવાહી શરૂ થઈ છે. સરપંચે પરિવારજનોના સોગંદનામા સાથે હાઈકોર્ટમાં અરજી દાખલ કરી યુવતીઓ અને તેમના પરિવારને રક્ષણ આપવા માંગણી કરી છે. આ અરજીને ધ્યાનમાં લઈ હાઈકોર્ટે રાજ્યના ગૃહ વિભાગને નોટિસ પાઠવી જવાબ રજૂ કરવાનો આદેશ કર્યો છે.
ગામમાં વધતી ઘટનાઓને લઈને પરિવારજનોની ચિંતા
અરજીમાં રજૂ કરવામાં આવ્યું છે કે છેલ્લા કેટલાક સમયથી ગામમાં અન્ય ધર્મના કેટલાક પરિવારો રહેવા આવ્યા છે અને તેમના સંતાનો ગામની યુવતીઓ સાથે મિત્રતા વધારવાનો પ્રયાસ કરી રહ્યા છે. પરિવારજનોના કહેવા મુજબ આ યુવકો દ્વારા લગ્ન માટે પ્રપોઝ કરવામાં આવતા કેટલીક યુવતીઓ અન્ય ધર્મના યુવકો સાથે લગ્ન કરવા તૈયાર થઈ રહી છે. જેના કારણે પરિવારજનોમાં ભય અને ચિંતા વધતા તેઓએ સુરક્ષા માટે હાઈકોર્ટનો દરવાજો ખખડાવ્યો છે.
પ્રેમજાળમાં ફસાવવાનો આરોપ, ચોક્કસ ટાર્ગેટિંગની રજૂઆત
રામસણ અને રમુણ ગામ નજીક રહેતા ચાર પરિવારોએ અરજીમાં જણાવ્યું છે કે તેમની દીકરીઓને અન્ય ધર્મના યુવકો દ્વારા પ્રેમજાળમાં ફસાવવાનો પ્રયાસ કરવામાં આવી રહ્યો છે. પરિવારજનોનો આક્ષેપ છે કે ચોક્કસ ઇરાદાથી યુવતીઓને ટાર્ગેટ કરવામાં આવે છે અને તેમને આકર્ષવા માટે મોંઘી કાર, કિંમતી કપડા અને લક્ઝુરિયસ જીવનશૈલીનો ઉપયોગ કરવામાં આવે છે.
કોલેજ બહાર મિત્રતા માટે પ્રયાસો, અગાઉ મારામારીની ઘટના
અરજી મુજબ આસપાસના ગામની યુવતીઓ કોલેજમાં અભ્યાસ માટે જાય છે અને કોલેજ બહાર કેટલાક યુવકો તેમની સાથે મિત્રતા કરવા પ્રયાસ કરતા હોવાનું જણાવાયું છે. આ મુદ્દે અગાઉ મારામારીની ઘટના પણ બની હોવાનું અરજીમાં ઉલ્લેખ કરવામાં આવ્યો છે. પરિવારજનોના કહેવા મુજબ થોડા સમયની ઓળખાણ બાદ યુવતીઓ લક્ઝુરિયસ જીવનશૈલીથી પ્રભાવિત થઈ મિત્રતા બાંધે છે.
આ મામલે હાઈકોર્ટે રાજ્યના ગૃહ વિભાગને નોટિસ પાઠવી જવાબ માંગ્યો છે અને કેસની આગળની સુનાવણી આવતા સોમવારે મુલતવી રાખવામાં આવી છે. સ્થાનિક સત્તાધીશો દ્વારા પરિવારજનોને મદદ અને સુરક્ષા પૂરી પાડવા અંગે પણ અરજીમાં માંગણી કરવામાં આવી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
🔗 https://www.youtube.com/@oneindianewscom-Gujarat
🔗 https://www.youtube.com/@oneindianewscom
