સ્વચ્છતા હી સેવા ૨૦૨૫ માં શ્રેષ્ઠ તાલુકા તરીકે કપડવંજ તાલુકાની પસંદગી

રાજકોટ ખાતે વિકાસ સપ્તાહ અંતર્ગત “વિકસિત ગ્રામ વિકસિત ગુજરાત” કાર્યક્રમમાં મુખ્યમંત્રી ભુપેન્દ્રભાઈ પટેલે સ્વચ્છ ભારત મિશન ગ્રામીણ યોજના અંતર્ગત “સ્વચ્છતા હી સેવા – ૨૦૨૫” અભિયાન દરમ્યાન સ્વચ્છતાની ઉત્તમ કામગીરી બદલ ખેડા જિલ્લાના કપડવંજ તાલુકાને શ્રેષ્ઠ તાલુકો જાહેર કર્યો હતો. કપડવંજ તાલુકા વિકાસ અધિકારી બીપીન પરમારને મુખ્યમંત્રીના હસ્તે શ્રેષ્ઠ તાલુકાનું પ્રમાણપત્ર એનાયત કરી સન્માન કરવામાં આવ્યું હતું.

મહુધા ધારાસભ્ય સંજયસિંહ મહિડા અને જિલ્લા વિકાસ અધિકારી જયંત કિશોરની મુખ્ય ઉપસ્થિતિમાં મહુધા તાલુકાના અલીણા ગામની પે. સેન્ટર શાળા ખાતે વિકાસ સપ્તાહ ઉજવણી ૨૦૨૫ કાર્યક્રમ યોજાયો હતો. જેમાં, અલીણા ગામ ખાતે વિકાસ રથનું સ્વાગત કરી વિવિધ યોજનાકીય લાભોનું વિતરણ કરવામાં આવ્યું હતું.
આ અવસરે ધારાસભ્ય સંજયસિંહ મહિડાએ વિકસિત ભારત નિર્માણમાં સહયોગી બનવા સૌને અપીલ કરી હતી. વિશેષમાં તેમણે દીકરી સહાય યોજના અંતર્ગત લગ્ન પ્રસંગે કન્યાઓને મળતી સહાય બદલ સરકારનો આભાર માન્યો હતો.

આ પ્રસંગે રાજકોટ ખાતેથી પ્રસારિત મુખ્યમંત્રી ભુપેન્દ્રભાઈ પટેલનું ઉદ્બોદન સાંભળવામાં આવ્યું હતું. મુખ્યમંત્રીએ વડાપ્રધાન નરેન્દ્રભાઈ મોદીના સુશાસન કાળના ૨૫માં વર્ષ પ્રવેશને સિલ્વર જ્યુબીલી ગણાવ્યો હતો. ખેડા જિલ્લા માટે મહત્વપૂર્ણ ઘટના તરીકે સ્વચ્છ ભારત મિશન ગ્રામીણ યોજના અંતર્ગત “સ્વચ્છતા હી સેવા – ૨૦૨૫” અભિયાન દરમ્યાન સ્વચ્છતાની ઉત્તમ કામગીરી બદલ ખેડા જિલ્લાના કપડવંજ તાલુકાને મુખ્યમંત્રીના હસ્તે શ્રેષ્ઠ તાલુકાનું પ્રમાણપત્ર એનાયત કરવામાં આવ્યું હતું.

કાર્યક્રમ અંતર્ગત ગંગા સ્વરૂપ, વૃદ્ધ સહાય, આયુષ્માન કાર્ડ, પશુપાલન, પોષણ સંગમ જેવા કાર્યક્રમ અને યોજનાકીય લાભનું વિતરણ કરવામાં આવ્યું હતું. જેમાં, નેશનલ લાઈવલીહુડ મિશન હેઠળ રૂ. ૩ લાખની ક્રેડિટ લોન અને પ્રધાનમંત્રી આવાસ યોજના હેઠળ રૂ. ૧.૭૦ લાખના સહાય ચેકનું વિતરણ કરવામાં આવ્યું હતું.
સાથે જ મુખ્યમંત્રી ગ્રામીણ અસ્મિતા સ્પર્ધાના વિજેતાઓને ઇનામ આપી સન્માનિત કરવામાં આવ્યા હતાં.

આ પ્રસંગે લાભાર્થી પ્રવીણભાઈ કાળાભાઈ ભોજાણીએ જણાવ્યું હતું કે પ્રધાનમંત્રી આવાસ યોજનાની સહાયથી તેમનુ પોતાના ઘર માટેનું સપનું સાકાર થયું છે. અને તેમને સન્માન પૂર્વક જીવવાનો અવસર મળ્યો છે. અન્ય લાભાર્થી ઐયુબભાઈ મલેકે જણાવ્યું હતું કે કિસાન સન્માન નિધિ અંતર્ગત દર વર્ષે તેમના ખાતામાં રૂ. ૬૦૦૦ ની ધનરાશી જમા થાય છે. જેનાથી તેમને નાની મોટી ખેતપેદાશો અને બિયારણોની ખરીદી કરવામાં મદદ મળી રહે છે. અને આજે તેમની ખેત ઉપજમાં પણ વધારો થયો છે.

આ અવસરે ખેતીવાડી, પશુપાલન, આઇસીડીએસ વિભાગ દ્વારા સ્ટોલ લગાવીને યોજનાકીય સહાય વિશે માહિતી આપવામાં આવી હતી અને આરોગ્ય વિભાગ દ્વારા ઉપસ્થિત ગ્રામજનોને નાની મોટી તબીબી સેવાઓ આપવામાં આવી હતી.

કાર્યક્રમમાં ગુજરાતના ૨૪ વર્ષના સુશાસનની સિદ્ધિઓ રજૂ કરતી ફિલ્મ નિહાળવામાં આવી હતી. અને ઉપસ્થિત સૌએ વિકસિત ભારતના નિર્માણમાં સહયોગી બનવા પ્રતિજ્ઞા લીધી હતી. તેમજ વૃક્ષારોપણ કરી પર્યાવરણ જાગૃતિનો સંદેશો પાઠવવામાં આવ્યો હતો. આ પ્રસંગે ધારાસભ્યશ્રીએ વૃક્ષ રથને પ્રસ્થાન કરાવ્યું હતું.
કાર્યક્રમ અંતર્ગત મહુધા ધારાસભ્ય સંજયસિંહ મહિડા, જિલ્લા વિકાસ અધિકારી જયંત કિશોર, પ્રાંત અધિકારી નિર્ભય ગોંડલીયા, ડેપ્યુટી ડીડીઓ ક્રિષ્ના ઉપાધ્યાય, પ્રાથમિક શિક્ષણ અધિકારી કલ્પેશભાઈ વાઘેલા, મામલતદાર, તાલુકા વિકાસ અધિકારી જ્યોતિબેન દેસાઈ, તાલુકા પંચાયત પ્રમુખ, ગ્રામ સરપંચ, તલાટી મંત્રી, આચાર્ય, સહિત અન્ય અગ્રણીઓ, મહાનુભાવો અને ગ્રામજનો ઉપસ્થિત રહ્યા હતા.