પીપળાવ દૂધ ઉત્પાદક સહકારી મંડળી લિ.ને નેશનલ કોઓપરેટિવ ડેવલોપમેન્ટ કોર્પોરેશન-એનસીડીસી દ્વારા ક્ષેત્રીય સહકારી ઉત્કૃષ્ટતા એવંમ શ્રેષ્ઠતા પુરસ્કાર ૨૦૨૫થી સન્માનિત કરવામાં આવેલ છે. સહકારથી સમૃદ્ધિ માટે પીપળાવ દૂધ ઉત્પાદક સહકારી મંડળી લિ.નું મોડેલ અન્ય મંડળીઓ માટે ઉદાહરણીય બની રહ્યું છે. ઇફ્કોના ચેરમેન દિલીપભાઇ સંઘાણીના તથા તેજસકુમાર બી.પટેલના હસ્તે એવોર્ડ મંડળીના સેક્રેટરી ઘનશ્યામભાઈ પટેલે સ્વીકાર્યો હતો.
નેશનલ કોઓપરેટિવ ડેવલોપમેન્ટ કોર્પોરેશન, સહકારિતા મંત્રાલય-ભારત સરકારના ક્ષેત્રીય નિર્દેશાલય ગાંધીનગર દ્વારા ક્ષેત્રીય સહકારી ઉત્કૃષ્ટતા એવંમ શ્રેષ્ઠતા પુરસ્કાર ૨૦૨૫નો સમારોહ ઇફ્કોના ચેરેમન દિલીપભાઇ સંઘાણી ડિરેક્ટર અને કેડીસીસી બેંકના ચેરમેન તેજસભાઇ પટેલ, સંજયકુમારની ઉપસ્થિતિમાં યોજવામાં આવ્યો હતો.
આ પ્રસંગે આણંદ જિલ્લાની પીપળાવ દૂધ ઉત્પાદક સહકારી મંડળી લિ.ને ક્ષેત્રીય સહકારી ઉત્કૃષ્ટતા એવંમ શ્રેષ્ઠતા પુરસ્કાર ૨૦૨૫ એનાયત કરવામાં આવ્યો હતો. વર્ષ ૧૯૫૮માં એક નાનકડા સ્વપ્ન સાથે શરૂ કરાયેલી પીપળાવ દૂધ ઉત્પાદક સહકારી મંડળી લિ.આજે હજારો પરિવારો માટે આર્થિક ઉન્નતિ માટેનો મુખ્ય સ્ત્રોત બની રહી છે. વડાપ્રધાન નરેન્દ્રભાઇ મોદી, કેન્દ્રીય ગૃહ અને સહકારિતા મંત્રી અમિતભાઇ શાહ, ગુજરાતના મુખ્યમંત્રી ભૂપેન્દ્રભાઇ પટેલ અને રાજયના સહકારી મંત્રી જગદીશભાઇ વિશ્વકર્માના સહકારથી સમૃદ્ધિ અને સશક્તિકરણના મંત્રને ચરિતાર્થ કરતાં મંડળીએ કામગીરીમાં ઉત્કૃષ્ટતા જાળવી રાખી છે.
પીપળાવ દૂધ ઉત્પાદક સહકારી મંડળી દ્વારા ચેરમેન તેજસભાઇ પટેલના માર્ગદર્શન હેઠળ ગામની મહિલાઓ આત્મનિર્ભર બને તે દિશામાં પહેલ કરવામાં આવી છે. દૂધ, ફળો અને શાકભાજીમાં મૂલ્યવર્ધન કરીને વિવિધ પેદાશો બનાવવા માટે મહિલાઓને તાલીમ રજીસ્ટર્ડ સંસ્થાઓના સહયોગથી આપવામાં આવે છે.
ચેરમેન તેજસકુમાર બી. પટેલે જણાવ્યું કે, દેશી ગાયના ઉછેર સંવર્ધન કરી વધુ દૂધ ઉત્પાદકતા મેળવી શકાય અને તેનાથી આર્થિક રીતે પણ વધુ ફાયદો મેળવી શકાય છે. તબેલાની યોજનાનો લાભ પણ મેળવી શકાય છે તેમજ ખેતીની સાથે સાથે પશુપાલન કરી આવકમાં વધારો કરી શકાય છે. સરકારની સ્વચ્છ ભારત યોજના અંતર્ગત પશુના છાણ અને મૂત્રથી બાયોગેસ અને સેન્દ્રીય ખાતર બનાવીને આવકનો વધુ એક સ્ત્રોત ઉભો કરી શકાય છે, જેનાથી પર્યાવરણને પણ ફાયદો થશે. પીપળાવ દૂધ મંડળીને મળેલ એવોર્ડ સભાસદો અને કર્મચારીઓ તથા કમિટીના સભ્યોના અથાગ પ્રયાસોનું પરિણામ છે.
રિપોર્ટર – યેશા શાહ ( ખેડા)
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
