ખેડા જિલ્લાના નડિયાદ ખાતે અન્ન, નાગરિક પુરવઠા અને ગ્રાહક સુરક્ષા વિભાગના કેબિનેટ મંત્રી તેમજ ખેડા જિલ્લાના પ્રભારી મંત્રી રમણભાઈ સોલંકીના અધ્યક્ષસ્થાને વિભાજન વિભીષિકા સ્મૃતિ દિવસ અને રાષ્ટ્રીય ગ્રામ સ્વરાજ અભિયાન અંતર્ગત વિશેષ કાર્યક્રમ યોજાયો હતો. આ પ્રસંગે વિભાજન દરમિયાન પીડા સહન કરનાર લાખો પરિવારોને શ્રદ્ધાંજલિ અર્પણ કરવામાં આવી હતી, જ્યારે બીજી તરફ નવનિયુક્ત જનપ્રતિનિધિઓને ગ્રામ વિકાસ અને જનસેવાની જવાબદારી અંગે માર્ગદર્શન આપવામાં આવ્યું હતું.
‘વિશ્વાસ, વિકાસ અને જનકલ્યાણને સાર્થક કરીએ’
કાર્યક્રમને સંબોધતા પ્રભારી મંત્રી રમણભાઈ સોલંકીએ જિલ્લા અને તાલુકા પંચાયતના નવનિયુક્ત પદાધિકારીઓને જણાવ્યું હતું કે ચૂંટાયેલા જનપ્રતિનિધિઓ સમાજનો અવાજ છે. ખેડા જિલ્લામાં મોટી વસ્તી ગ્રામ્ય વિસ્તારમાં રહેતી હોવાથી જનપ્રતિનિધિઓની જવાબદારી વધુ મહત્વપૂર્ણ બને છે.
તેમણે વડાપ્રધાન નરેન્દ્ર મોદીના વિકાસ અભિગમનો ઉલ્લેખ કરતાં કહ્યું કે વિશ્વાસ, વિકાસ અને જનકલ્યાણને સાર્થક કરવાનું કામ દરેક જનપ્રતિનિધિએ કરવું જોઈએ. પ્રજાનો વિશ્વાસ જાળવીને સરકારની ગરીબલક્ષી અને જનકલ્યાણકારી યોજનાઓનો લાભ છેવાડાના માનવી સુધી પહોંચાડવો એ પ્રાથમિકતા હોવી જોઈએ.
રમણભાઈ સોલંકીએ નવનિયુક્ત પદાધિકારીઓને માત્ર હોદ્દેદાર નહીં, પરંતુ સાચા અર્થમાં જનસેવક બનવા અનુરોધ કર્યો હતો. તેમણે કહ્યું કે જનપ્રતિનિધિઓએ લોકોના પ્રશ્નોને સમજવા, તેમને વાચા આપવા અને સમયસર ઉકેલ લાવવા પ્રયત્ન કરવો જોઈએ. એવો કાર્યકાળ બનાવવો જોઈએ કે લોકો વર્ષો સુધી તેને યાદ રાખે.
‘સ્ટેચ્યુ ઓફ યુનિટી સરદાર પટેલના અખંડ ભારતના સ્વપ્નને સ્મરણાંજલિ’
કાર્યક્રમમાં પૂર્વ ગૃહમંત્રી પ્રદિપસિંહ જાડેજાએ વિભાજન વિભીષિકા સ્મૃતિ દિવસ અંગે વક્તવ્ય આપ્યું હતું. તેમણે જણાવ્યું કે દેશના વિભાજન દરમિયાન અસંખ્ય લોકોએ પોતાના ઘર, સંપત્તિ અને પરિવારજનો ગુમાવ્યા હતા. આ પીડા અને બલિદાનને નવી પેઢી યાદ રાખે તે માટે વિભાજન વિભીષિકા સ્મૃતિ દિવસનું મહત્વ વિશેષ છે.
તેમણે કહ્યું કે વડાપ્રધાન નરેન્દ્ર મોદીએ ‘એક ભારત, શ્રેષ્ઠ ભારત’ના સંકલ્પ સાથે રાષ્ટ્રીય એકતા મજબૂત કરવાની દિશામાં અનેક પ્રયાસો કર્યા છે. સરદાર વલ્લભભાઈ પટેલે દેશના રજવાડાઓનું એકીકરણ કરીને અખંડ ભારતના નિર્માણમાં ઐતિહાસિક ભૂમિકા ભજવી હતી. તેમના સન્માનમાં નિર્મિત સ્ટેચ્યુ ઓફ યુનિટીને તેમણે સરદાર પટેલના દેશપ્રેમ અને રાષ્ટ્રીય એકતાના વિચારને સ્મરણાંજલિ ગણાવી હતી.
પ્રદિપસિંહ જાડેજાએ પંડિત દીનદયાળ ઉપાધ્યાયના વિચારોનો પણ ઉલ્લેખ કર્યો હતો અને જણાવ્યું કે રાષ્ટ્રીય એકતા અને અખંડતાનો સંકલ્પ સતત જીવંત રાખવો જરૂરી છે.
વિભાજન માત્ર પીડાની નહીં, પુનઃસ્થાપનની પણ ગાથા
પૂર્વ ગૃહમંત્રીએ જણાવ્યું કે વિભાજનની સ્મૃતિ માત્ર હિંસા અને પીડા પૂરતી મર્યાદિત નથી. વિસ્થાપિત થયેલા લાખો લોકોએ નવી જગ્યાએ ફરી જીવન શરૂ કર્યું, મહેનત કરી અને દેશના વિકાસમાં યોગદાન આપ્યું. તેથી આ દિવસ તેમની સંઘર્ષશક્તિ અને દેશપ્રેમને પણ યાદ કરવાનો અવસર છે.
નિવાસી અધિક કલેક્ટર જે.બી. દેસાઈએ વિભાજન વિભીષિકાની પૂર્વભૂમિકા રજૂ કરતાં જણાવ્યું કે દેશના ભાગલા સમયે અંદાજે દોઢ કરોડ લોકો વિસ્થાપિત થયા હતા અને મોટી સંખ્યામાં શરણાર્થીઓના પુનઃસ્થાપન માટે લાંબી પ્રક્રિયા હાથ ધરવી પડી હતી.
પીડિતોની સ્મૃતિમાં બે મિનિટનું મૌન
કાર્યક્રમ દરમિયાન ઉપસ્થિત મહાનુભાવો, અધિકારીઓ અને નાગરિકોએ વિભાજન દરમિયાન જીવ ગુમાવનાર તથા પીડા સહન કરનાર લોકોની સ્મૃતિમાં બે મિનિટનું મૌન પાળ્યું હતું. વિભાજનની ઐતિહાસિક પૃષ્ઠભૂમિ દર્શાવતી ફિલ્મ પણ પ્રદર્શિત કરવામાં આવી હતી.
નડિયાદના યોગી ફાર્મ ખાતે વિભાજન વિભીષિકાના પીડિતોની સ્મૃતિને સમર્પિત બે દિવસીય પ્રદર્શનનું પણ આયોજન કરવામાં આવ્યું હતું. મહાનુભાવોએ આ પ્રદર્શનની મુલાકાત લઈને વિભાજનના સમયની ઐતિહાસિક ઘટનાઓ અને માનવીય પીડાને દર્શાવતી સામગ્રી નિહાળી હતી.
રાષ્ટ્રીય ગ્રામ સ્વરાજ અભિયાન હેઠળ પદાધિકારીઓને તાલીમ
રાષ્ટ્રીય ગ્રામ સ્વરાજ અભિયાન અંતર્ગત જિલ્લા અને તાલુકા પંચાયતના નવનિયુક્ત પદાધિકારીઓ માટે ક્ષમતાવર્ધન તાલીમનું આયોજન કરવામાં આવ્યું હતું. જિલ્લા વિકાસ અધિકારી જયંત કિશોરે સ્વાગત પ્રવચનમાં જણાવ્યું કે પંચાયત ધારા, ગ્રામસભાનું મહત્વ, વિકાસ યોજનાઓ અને વિવિધ સરકારી કાર્યક્રમોની જાણકારી મેળવી જનપ્રતિનિધિઓ અસરકારક રીતે કામ કરી શકે છે.
તેમણે આશા વ્યક્ત કરી કે તાલીમ મેળવેલા પદાધિકારીઓ ગ્રામ્ય વિસ્તારોમાં યોજનાઓના અસરકારક અમલીકરણ દ્વારા સમૃદ્ધ ખેડાના નિર્માણમાં મહત્વપૂર્ણ ભૂમિકા ભજવશે.
મુખ્યમંત્રી ગ્રામ અસ્મિતા યોજના હેઠળ શ્રેષ્ઠ ગ્રામ પંચાયતોનું સન્માન
કાર્યક્રમ દરમિયાન મુખ્યમંત્રી ગ્રામ અસ્મિતા યોજના હેઠળ જિલ્લાની ત્રણ શ્રેષ્ઠ ગ્રામ પંચાયતોને સન્માનિત કરવામાં આવી હતી. વનોડા ગ્રામ પંચાયતને પ્રથમ સ્થાન બદલ રૂ.50 હજાર, મિરઝાપુર ગ્રામ પંચાયતને બીજા સ્થાન બદલ રૂ.30 હજાર અને અજુપુરા ગ્રામ પંચાયતને ત્રીજા સ્થાન બદલ રૂ.20 હજારનો ચેક આપવામાં આવ્યો હતો.
આ પુરસ્કારો સંબંધિત ગ્રામ પંચાયતોના સરપંચોને મહાનુભાવોના હસ્તે એનાયત કરવામાં આવ્યા હતા.
નિબંધ અને વકૃત્વ સ્પર્ધાના વિજેતા વિદ્યાર્થીઓને પુરસ્કાર
મુખ્યમંત્રી ગ્રામ અસ્મિતા યોજના અંતર્ગત યોજાયેલી જિલ્લાકક્ષાની નિબંધ અને વકૃત્વ સ્પર્ધાના વિજેતા વિદ્યાર્થીઓને પણ રોકડ પુરસ્કારો આપવામાં આવ્યા હતા.
નિબંધ સ્પર્ધામાં ભાનેરની પૂજા તળપદાને પ્રથમ સ્થાન બદલ રૂ.25 હજાર, પુષ્પા દવેને બીજા સ્થાન બદલ રૂ.20 હજાર અને આયુષ જોષીને ત્રીજા સ્થાન બદલ રૂ.15 હજારનો ચેક આપવામાં આવ્યો હતો.
વકૃત્વ સ્પર્ધામાં દીપક તળપદાને પ્રથમ સ્થાન બદલ રૂ.25 હજાર, જીઆ અમિતકુમારને બીજા સ્થાન બદલ રૂ.20 હજાર અને હિતાક્ષી પટેલને ત્રીજા સ્થાન બદલ રૂ.15 હજારનો પુરસ્કાર આપવામાં આવ્યો હતો.
‘સમરસ વિદ્યા સેતુ અભિયાન’ હેઠળ 3,928 બાળકોનો પુનઃપ્રવેશ
કાર્યક્રમ દરમિયાન રાજ્ય સરકારના શિક્ષણ વિભાગ દ્વારા શાળા છોડી ચૂકેલા વિદ્યાર્થીઓને ફરી શિક્ષણની મુખ્યધારામાં લાવવા માટે શરૂ કરાયેલા ‘સમરસ વિદ્યા સેતુ અભિયાન’ અંતર્ગત ‘બેક ટુ સ્કૂલ’ પહેલનો પ્રારંભ કરવામાં આવ્યો હતો.
પુનઃપ્રવેશ મેળવનાર વિદ્યાર્થીઓનું મહાનુભાવોએ સ્કૂલ બેગ આપીને સ્વાગત કર્યું હતું. ખેડા જિલ્લામાં ધોરણ 8થી 11 સુધીના કુલ 3,928 બાળકોને ફરી શાળામાં પ્રવેશ આપવામાં આવ્યો છે, જ્યારે અન્ય બાળકોની પ્રવેશ પ્રક્રિયા પણ ચાલુ હોવાનું જણાવાયું હતું.
આ અભિયાનનો હેતુ શાળા છોડનારા વિદ્યાર્થીઓને ફરી શિક્ષણ સાથે જોડીને તેમનું ભવિષ્ય સુરક્ષિત કરવાનો છે.
ગ્રામ વિકાસની યોજનાઓ અંગે આપવામાં આવ્યું માર્ગદર્શન
પંચાયત, ગ્રામ ગૃહ નિર્માણ અને ગ્રામ વિકાસ વિભાગ દ્વારા આયોજિત તાલીમમાં નવનિયુક્ત પદાધિકારીઓને વિવિધ સરકારી યોજનાઓ, ગ્રામસભાની ભૂમિકા, પંચાયતની જવાબદારીઓ અને વિકાસકાર્યોના અસરકારક અમલીકરણ અંગે માર્ગદર્શન આપવામાં આવ્યું હતું.
કાર્યક્રમનો મુખ્ય ઉદ્દેશ ગ્રામ્ય વિસ્તારોમાં ચૂંટાયેલા પ્રતિનિધિઓની ક્ષમતા વધારવાનો અને સરકારી યોજનાઓનો લાભ પારદર્શક તથા અસરકારક રીતે લોકો સુધી પહોંચાડવાનો રહ્યો હતો.
મોટી સંખ્યામાં મહાનુભાવો અને અધિકારીઓ ઉપસ્થિત
આ કાર્યક્રમમાં પ્રદેશ ભાજપ મહામંત્રી અજય બ્રહ્મભટ્ટ, જિલ્લા ભાજપ પ્રમુખ નયનાબેન પટેલ, ખેડાના સાંસદ દેવુસિંહ ચૌહાણ, નડિયાદ મહાનગરપાલિકાના મેયર મનીષ પટેલ, જિલ્લા પંચાયત પ્રમુખ હિતેશ તડવી, માતરના ધારાસભ્ય કલ્પેશ પરમાર, મહેમદાવવાના ધારાસભ્ય અર્જુનસિંહ ચૌહાણ અને ઠાસરાના ધારાસભ્ય યોગેન્દ્રસિંહ પરમાર સહિત અનેક જનપ્રતિનિધિઓ ઉપસ્થિત રહ્યા હતા.
આ ઉપરાંત ખેડા જિલ્લા કલેક્ટર એન.વી. ઉપાધ્યાય, નડિયાદ મહાનગરપાલિકા કમિશનર કિરણ ઝવેરી, જિલ્લા વિકાસ અધિકારી જયંત કિશોર, પોલીસ અધિક્ષક વિજય પટેલ, નિવાસી અધિક કલેક્ટર જે.બી. દેસાઈ, એડિશનલ કલેક્ટર વિમલ બારોટ, જિલ્લા ગ્રામ વિકાસ એજન્સીના નિયામક સહિત મોટી સંખ્યામાં અધિકારીઓ અને જિલ્લા-તાલુકાના જનપ્રતિનિધિઓ હાજર રહ્યા હતા.
રીપોર્ટર – સુરેશ પારેખ (ખેડા)
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
