હેલ્થ ઈન્સ્યોરન્સમાં થશે મોટો ફેરફાર, જાણો વીમા ધારકને કેવો થશે ફાયદો

આજના સમયમાં મોટાભાગના લોકો હેલ્થ ઇન્સ્યોરન્સ ધરાવતા હોય છે. આ તમામ લોકો માટે સારા સમાચાર છે. હેલ્થ ઇન્સ્યોરન્સને લઇને મોટો બદલાવ થવા જઇ રહ્યો છે. જેનો અમલ આગામી એક વર્ષમાં જ થઇ જશે. વીમા ધારકોએ હવે ક્લેઇમ હવે ફોર્મ ભરીને સબમીટ કરવાના રહેશે નહી. આ સાથે જ અન્ય કેટલાક ફાયદાઓ પણ થશે.

ગુજરાતીમાં ઇન્સ્યોરન્સને લગતી માહિતી પત્રિકા બનશે

11 નવેમ્બર વીમા લોકપાલ દિવસ તરીકે મનાવાય છે. જેને લઈને અમદાવાદ ખાતે વીમા લોકપાલ કાર્યલાય પર એક પત્રકાર પરિષદ રાખવામાં આવી. જ્યાં લોકો વીમા લોકપાલ વિશે જાણતા થાય જાગૃત બને તેવી અપીલ કરવામાં આવી. તો પત્રકાર પરિષદમાં માહિતી પણ આપવામાં આવી કે આગામી 1 વર્ષમાં ઇન્શ્યોરન્સ ક્લેમનું કામ સરળ થઇ થશે.ઇન્સ્યોરન્સને લગતી માહિતીની પત્રિકા લોકલ ભાષામાં લોકોને મળી રહેશે. જેનો એક વર્ષમાં અમલ શરુ થઇ જશે. હાલ ફોર્મ ભરીને ક્લેમ સબમીટ કરવાની પ્રથા છે, તે આગામી સમયમાં બંધ થશે. હોસ્પિટલ અને ઇન્સ્યોરન્સ કંપનીએ સીધા ક્લેઇમ સેટલ કરવાના રહેશે.

એપ્રિલ મહિનાથી ઇન્સ્યોરન્સ પોલિસીને લઈને પણ બદલાવ આવશે. જેમાં ઇન્સ્યોરન્સ પોલિસીની સાથે સાથે પોલિસીમાં શું સમાવિષ્ટ છે અને શું બાકાત છે તેની સમરી પણ ઇન્શ્યોરન્સ કંપનીએ આપવાની રહેશે. જે સમરી લોકોને તેમની લોકલ ભાષામાં આપવી પડશે. જેથી લોકો પોલિસીથી સારી રીતે અવગત થઈ શકે અને ભવિષ્યમાં કોઈ સમસ્યા ન સર્જાય. આઇઆરડીએ તરફથી આ સર્ક્યુલર બહાર પડાયું છે.

ફરિયાદ માટે ગ્રાહક સુરક્ષા જ એકમાત્ર વિકલ્પ નહીં

અત્યાર સુધી વીમાને લગતી સમસ્યા કે ફરિયાદ કરવા લોકો ગ્રાહક સુરક્ષામાં જતા હતા. ફરિયાદીએ નાણાં ખર્ચી વકીલ રોકવો પડતો હતો. તેમાં ન્યાય મળતા એક, બે, ત્રણ, પાંચ કે 10 કે ઉપર વર્ષ થતા અને નાણાં પણ સમયે મળતા ન હતા.ઉપલી કોર્ટમાં કેસ પડકારતા ન્યાયમાં વધુ વિલંબ થતો. જ્યારે વીમા લોકપાલમાં માત્ર ફરિયાદ કરવાની હોય છે અને 90 દિવસમાં તેનો નિકાલ આવી જાય છે. 30 દિવસમાં નાણાં ચૂકવવાના હોય છે. જ્યાં વકીલ રોકવાનો પણ ખર્ચ નથી હોતો. લોકો ઓનલાઈન અને ગમે ત્યાંથી ફરિયાદ પણ કરી શકે છે. જોકે લોકોને વીમા લોકપાલની જાણ નહિ હોવાથી લોકો તેનો લાભ લઇ શકતા નથી. આ અંગે જાગૃતિ લાવવા 11 નવેમ્બરનો દિવસ વીમા લોકપાલ દિવસ તરીકે ઉજવાય છે.

વીમા લોકપાલમાં પણ ફરિયાદ નોંધાવી શકાય

દેશભરમાં અમદાવાદ સહિત દેશભરમાં વીમા લોકપાલની 17 કચેરીઓ બેંગલુરુ, ભોપાલ, ભુવનેશ્વર, ચંદીગઢ, ચેન્નાઈ, દિલ્હી, એર્નાકુલમ, ગુવાહાટી, હૈદરાબાદ, જયપુર, કોલકાતા, લખનૌ, મુંબઈ, નોઈડા, પટના અને પુણેમાં આવેલી છે. વીમા લોકપાલની 17 કચેરીઓ કાર્યરત છે. જ્યાં અમદાવાદ માં આવેલી વીમા લોકપાલ કચેરીમાં ગુજરાતના નાગરિકો વીમા સંબંધીત બાબતોની સીધી ફરિયાદ કરી શકે છે. જ્યાં ઇન્સ્યોરન્સ ક્લેમને લગતા વિવાદો 90 દિવસમાં જ નિકાલ આવશે. તેમજ 30 દિવસમાં નાણાં ચૂકવવા પડશે.