ગુજરાત પોલીસની માનવતા અને સંવેદનશીલતાનું અનોખું ઉદાહરણ નડિયાદ જિલ્લા જેલમાં જોવા મળ્યું છે, જ્યાં એક મહિલા આરોપી માટે પોલીસ પરિવાર બનીને ઉભી રહી. નવજાત શિશુ સાથે મુશ્કેલીમાં મુકાયેલી આ સ્થળાંતરિત (માઇગ્રન્ટ) મહિલાને ગુજરાત પોલીસ દ્વારા તેના વતન મધ્યપ્રદેશ સુધી સુરક્ષિત પહોંચાડવામાં આવી, જે ઘટનાએ માનવતા પ્રત્યેનો વિશ્વાસ વધુ મજબૂત કર્યો છે.
માહિતી મુજબ, આણંદ જિલ્લાના ખંભાત વિસ્તારમાં POCSO એક્ટ હેઠળ નોંધાયેલા ગુનામાં એક સગર્ભા મહિલા સહ-આરોપી તરીકે નડિયાદ જિલ્લા જેલમાં આવી હતી. આ મહિલા મૂળ મધ્યપ્રદેશના અલીરાજપુર જિલ્લાની વતની છે અને મજૂરી માટે ગુજરાત આવી હતી.
જેલમાં રહેતી વખતે મહિલાએ 21 મેના રોજ પ્રસૂતિની પીડા અનુભવતા તેને તાત્કાલિક નડિયાદ સિવિલ હોસ્પિટલ અને ત્યારબાદ અમદાવાદ સિવિલ હોસ્પિટલ ખસેડવામાં આવી હતી, જ્યાં તેણે પુત્રને જન્મ આપ્યો હતો. સારવાર બાદ તેને નવજાત બાળક અને બે વર્ષના બાળક સાથે ફરી જેલમાં લાવવામાં આવી હતી.
જોકે મહિલાને જામીન મળી ગયા હતા, પરંતુ તેના પરિવારમાંથી કોઈ તેને લેવા આવ્યું નહોતું. આ સંવેદનશીલ પરિસ્થિતિમાં જિલ્લા કાનૂની સેવા સત્તા મંડળ (આણંદ) અને નડિયાદ જિલ્લા જેલના અધિકારીઓ આગળ આવ્યા હતા.
ગુજરાત પોલીસ વડા ડો. કે.એલ.એન રાવના માર્ગદર્શન હેઠળ નડિયાદ જિલ્લા જેલ પોલીસે વિશેષ વાહનની વ્યવસ્થા કરી અને બે પોલીસ કોન્સ્ટેબલ સાથે મહિલાને તેના વતન અલીરાજપુર (મધ્યપ્રદેશ) પહોંચાડવામાં આવી હતી. ત્યાં સ્થાનિક પોલીસની હાજરીમાં મહિલાનું તેના પરિવાર સાથે પુનર્મિલન કરાવવામાં આવ્યું હતું.
નવજાત બાળક અને પોતાના પરિવાર સાથે મળતા મહિલા ભાવવિભોર બની ગઈ હતી અને ગુજરાત પોલીસ તથા વહીવટીતંત્રનો આભાર વ્યક્ત કર્યો હતો.
આ સમગ્ર ઘટનાએ સાબિત કર્યું છે કે ખાખી માત્ર કાયદાનું પ્રતિક નથી, પરંતુ માનવતા અને સંવેદનાનું પણ જીવંત ઉદાહરણ છે.
અમારી યુટ્યુબ ચેનલને લાઈક કરો, શેર કરો અને સબસ્ક્રાઈબ કરો
Like, Share and Subscribe our YouTube channel
