ખેડા જિલ્લાના ઠાસરા શેઢી શાખા મહી કેનાલમાં મૃત્યુની વિધી પૂર્ણ કરીને કેનાલમાં નહાવા પડેલાં 8 યુવકો પૈકી એક યુવક ડૂબી જતાં દોડધામ મચી જવા પામી હતી, જે બાદ ફાયર બ્રિગેડની જાણ કરવામાં આવી હતી, દરમિયાન ટીમે સ્થળ પર પહોંચી જઇને હાલમાં યુવકની શોધખોળ હાથ ધરી છે.
પ્રાપ્ત માહિતી અનુસાર, ઠાસરા શેઢી શાખા મહી કેનાલમાં બુધવારે બપોરના સમયે મરણ વિધી પૂર્ણ કર્યા બાદ સુરેશભાઈ હિતેશભાઈ ઓડ, કિશનભાઈ રંગીતભાઈ ઓડ, હિતેશભાઈ ધર્મેશભાઈ ઓડ, ધર્મેશભાઈ શૈલેષભાઇ ઓડ, રાહુલભાઈ ઓડ,વિજયભાઈ મહેશભાઈ પરમાર, શૈલેષભાઇ ઘનશ્યામભાઈ ઓડ અને જયેશભાઇ મુકેશભાઈ ઓડ (ઉં.વ. 18) (તમામ રહે. ઠાસરા) કેનાલમાં ન્હાવા પડ્યા હતા. જે દરમિયાન જયેશભાઇ મુકેશભાઈ ઓડ પાણીમાં ડૂબવા લાગતાં સાથેના લોકોએ બૂમાબૂમ કરી હતી અને આસપાસથી લોકો દોડી આવ્યા હતા. જોકે, જયેશનો પત્તો ન લાગતાં ફાયર બ્રિગેડને જાણ કરતાં ટીમ સ્થળ પર દોડી આવી હતી. ઘટનાની જાણ થતાં પોલીસ પણ સ્થળ પર પહોંચી હતી અને મામલાની તપાસ હાથ ધરી હતી.
