ખેડા જિલ્લા પોલીસ દ્વારા પ્રોજેક્ટ મૈત્રી અંતર્ગત અમલમાં મુકાયેલી અરજી વ્યવસ્થાપન પ્રણાલી (Application Management System – AMS) આજે નાગરિકકેન્દ્રિત પોલીસિંગનું સફળ મોડેલ બની છે. પારદર્શક, જવાબદાર અને સમયબદ્ધ કામગીરીના પરિણામે ખેડા જિલ્લા પોલીસને “પોલીસ–સમુદાય વચ્ચે વિશ્વાસ અને સંબંધોના નિર્માણ” ક્ષેત્રે શ્રેષ્ઠ કામગીરી બદલ દેશના પ્રતિષ્ઠિત SKOCH Awardથી સન્માનિત કરવામાં આવી છે. દિલ્હીમાં યોજાયેલા સમારોહમાં જિલ્લા પોલીસ વડા વિજયભાઈ પટેલએ આ એવોર્ડ પ્રાપ્ત કર્યો હતો.
નાગરિકોને તેમની અરજીઓ અંગે સમયસર માહિતી મળે અને ફરિયાદોના ઝડપી નિકાલ માટે તા. ૧ સપ્ટેમ્બર, ૨૦૨૩ના રોજ નડિયાદ ટાઉન અને ખેડા ટાઉન પોલીસ સ્ટેશન ખાતે AMSનો પ્રાયોગિક પ્રારંભ કરવામાં આવ્યો હતો. ત્યારબાદ મળેલા સફળ પરિણામોને આધારે તા. ૧૫ માર્ચ, ૨૦૨૪થી જિલ્લાના તમામ પોલીસ સ્ટેશનોમાં આ સિસ્ટમ કાર્યરત કરવામાં આવી છે.
દરેક પોલીસ સ્ટેશન ખાતે કાર્યરત રિસેપ્શન સેન્ટરમાં અરજીઓની નોંધણી, કાયદાકીય માર્ગદર્શન તથા તાત્કાલિક તપાસની કાર્યવાહી શરૂ કરવામાં આવે છે. દરેક અરજી માટે યોગ્ય તપાસ અધિકારીની નિમણૂક કરવામાં આવે છે અને અરજદારને સમગ્ર પ્રક્રિયા દરમિયાન સમયાંતરે માહિતી આપવામાં આવે છે.
જિલ્લા કક્ષાએ અસરકારક મોનિટરિંગ માટે દરેક રિસેપ્શન સેન્ટર ખાતે QR Codeની સુવિધા ઉપલબ્ધ છે. અરજી નોંધાયા બાદ અરજદાર પોતાના અનુભવ અને સૂચનો ઓનલાઈન નોંધાવી શકે છે. પોલીસ અધિક્ષકની અધ્યક્ષતામાં રચાયેલી મોનિટરિંગ ટીમ આ પ્રતિસાદના આધારે સમગ્ર પ્રક્રિયાનું સતત ઓનલાઈન સુપરવિઝન કરે છે.
AMSની સૌથી મહત્વપૂર્ણ વિશેષતા એ છે કે અરજીની માત્ર નોંધણી જ નહીં, પરંતુ સમગ્ર પ્રક્રિયાનું સતત અનુસરણ કરવામાં આવે છે. અરજી મળ્યાના ૨૪ કલાકમાં તપાસ અધિકારી, ત્યારબાદ ૪૮ કલાકમાં મોનિટરિંગ ટીમ અને અરજીના નિકાલ બાદ અંદાજે ૧૪ દિવસ પછી ફરી એકવાર અરજદારનો સંપર્ક કરવામાં આવે છે. એક અરજી માટે કુલ ત્રણ વખત સંપર્ક કરવાની આ વ્યવસ્થાથી અત્યાર સુધીમાં ૮૩ હજારથી વધુ ટેલિફોનિક સંપર્કો કરવામાં આવ્યા છે, જેના કારણે પોલીસ અને નાગરિકો વચ્ચે વિશ્વાસ અને પારદર્શિતામાં નોંધપાત્ર વધારો થયો છે.
પ્રોજેક્ટનું સ્વતંત્ર મૂલ્યાંકન નડિયાદની સૂરજબા મહિલા આર્ટ્સ કોલેજના પ્રિન્સિપાલ ડૉ. હસિત મહેતાના માર્ગદર્શન હેઠળ ૨૬ પ્રોફેસરો દ્વારા કરવામાં આવ્યું હતું. મૂલ્યાંકનમાં AMSને નાગરિકકેન્દ્રિત પોલીસિંગનું અસરકારક અને પ્રેરણાદાયી મોડેલ ગણાવવામાં આવ્યું છે.
ઉલ્લેખનીય છે કે છેલ્લા અઢી વર્ષમાં AMS અંતર્ગત ૩૭ હજારથી વધુ અરજીઓનો સંતોષકારક નિકાલ કરવામાં આવ્યો છે. જ્યારે ૧ જાન્યુઆરીથી ૩૦ જૂન, ૨૦૨૬ દરમિયાન પ્રાપ્ત થયેલી ૯,૦૦૦ અરજીઓમાંથી ૮,૮૦૦ અરજીઓનો સફળ નિકાલ કરવામાં આવ્યો છે.
ખેડા જિલ્લા પોલીસની આ પહેલ પારદર્શિતા, જવાબદારી અને સંવેદનશીલ અભિગમ દ્વારા “સેવા, સુરક્ષા અને શાંતિ”ના ધ્યેયને વધુ મજબૂત બનાવી રહી છે અને રાજ્યમાં કોમ્યુનિટી પોલીસિંગ માટે એક પ્રેરણાદાયી મોડેલ તરીકે ઉભરી આવી છે.
રિપોર્ટર – યેશા શાહ (ખેડા)
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
