હિમાચલ પ્રદેશમાં ભારે વરસાદે ફરી એક વાર હાહાકાર મચાવ્યો છે. બિલાસપુર જિલ્લાના નૈના દેવી વિધાનસભા વિસ્તારના ગુતરાહન ગામમાં શનિવારે વહેલી સવારે વાદળ ફાટવાની ઘટના બની, જેના કારણે વિસ્તારમાં તબાહીનું દૃશ્ય સર્જાયું. અચાનક પડેલા ભારે વરસાદથી ભારે પ્રમાણમાં કાટમાળ વહેતાં અનેક વાહનો તેની ચપેટમાં આવી દબાઈ ગયા, જ્યારે મુખ્ય રસ્તાઓ પર જંગી નુકસાન નોંધાયું. વાહનવ્યવહાર કલાકો સુધી ઠપ થઈ ગયો અને સ્થાનિક લોકોને ભારે મુશ્કેલીનો સામનો કરવો પડ્યો. સદભાગ્યે આ કુદરતી આફતમાં કોઈ જાનહાનિ થઈ નથી, નહીંતર પરિસ્થિતિ વધુ ગંભીર બની શકી હોત. ગામલોકોએ વહીવટીતંત્ર પાસે તાત્કાલિક સ્થળ પર પહોંચી નુકસાનનું મૂલ્યાંકન કરી પીડિતોને યોગ્ય વળતર આપવાની માંગણી કરી છે.
આવી જ એક કુદરતી આફત મંડી જિલ્લાના ધરમપુર વિસ્તારના સપદી રોહ ગામમાં પણ સામે આવી છે, જ્યાં શનિવારે સવારે લગભગ 4 વાગ્યે અચાનક ભૂસ્ખલન થયું. આ ભૂસ્ખલનથી ગામના ઘણા ઘરો કાટમાળ અને માટીના ઢગલામાં ઘેરાઈ ગયા. સ્થાનિક લોકો રાત્રીના સમયે સુરક્ષિત સ્થાને ખસી જતા હોવાથી જાનહાનિ ટળી, પરંતુ ગામના અનેક પરિવારોના મકાન અને મિલકતને ભારે નુકસાન થયું છે. હાલમાં વહીવટીતંત્ર અને રાહત ટીમો ગામ સુધી પહોંચવાનો પ્રયાસ કરી રહી છે, જેથી લોકોને સુરક્ષિત સ્થળે ખસેડી શકાય.
હવામાન વિભાગે આગાહી કરી છે કે હિમાચલ પ્રદેશમાં હવામાન આગામી દિવસોમાં પણ અસ્થીર રહેશે. શિમલા હવામાન કેન્દ્ર અનુસાર, 13 અને 14 સપ્ટેમ્બરના રોજ રાજ્યના અનેક વિસ્તારોમાં ગાજવીજ સાથે હળવાથી મધ્યમ વરસાદ પડવાની શક્યતા છે. ખાસ કરીને કાંગડા, ઉના, હમીરપુર, બિલાસપુર અને મંડી જિલ્લામાં ભારે વરસાદની સંભાવના હોવાથી ઓરેન્જ એલર્ટ જાહેર કરવામાં આવ્યું છે. આ જિલ્લાઓમાં વરસાદને કારણે ફરીથી ભૂસ્ખલન અને વાદળ ફાટવાની ઘટનાઓ બની શકે છે, જેને ધ્યાનમાં રાખીને વહીવટીતંત્રને સતર્ક રહેવા સૂચના અપાઈ છે. શિમલા, સિરમૌર, સોલન, કુલ્લુ અને ચંબા જિલ્લામાં પણ હળવાથી મધ્યમ વરસાદની શક્યતા છે, જેના કારણે ત્યાં યલો એલર્ટ જાહેર કરાયું છે.
વિશેષજ્ઞોના જણાવ્યા મુજબ, હિમાચલ પ્રદેશમાં સતત વરસાદને કારણે જમીન ભીની થઈ ચૂકી છે, જેના કારણે નાના વરસાદથી પણ ભૂસ્ખલન થવાની સંભાવના વધી ગઈ છે. ગ્રામજનોને ચેતવણી આપવામાં આવી છે કે તેઓ સંવેદનશીલ વિસ્તારોમાં અત્યારે ન જાય અને સલામતીના નિયમોનું પાલન કરે. રાજ્ય સરકાર અને આપત્તિ વ્યવસ્થાપન વિભાગ સતત પરિસ્થિતિ પર નજર રાખી રહ્યા છે અને જરૂર પડ્યે તાત્કાલિક રાહત કામગીરી શરૂ કરવાની તૈયારીમાં છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
