દિલ્હીના મધ્ય જિલ્લામાં આવેલી પહાડગંજ વિસ્તારમાં બનેલી આ ઘટના અત્યંત ચોંકાવનારી અને ચિંતાજનક છે. અહેવાલો મુજબ, 4 સપ્ટેમ્બરના રોજ ત્રણ સગીરોએ 15 વર્ષના વિદ્યાર્થી પર શાળાની બહાર છરીથી હુમલો કર્યો. ઘટના એટલી ગંભીર હતી કે છરી વિદ્યાર્થીની છાતીમાં ફસાઈ ગઈ હતી, છતાં પણ પીડિત કોઈક રીતે પોતાનો જીવ બચાવીને સીધો પોલીસ સ્ટેશન પહોંચી ગયો. જ્યારે પહાડગંજ પોલીસ સ્ટેશનમાં હાજર પોલીસકર્મીઓએ છાતીમાં ઘૂસેલી છરી સાથે વિદ્યાર્થીને જોયો ત્યારે તેઓ પણ હકાબકા રહી ગયા અને તરત જ તેને હોસ્પિટલ મોકલવામાં આવ્યો. શરૂઆતમાં કલાવતી સરન હોસ્પિટલમાં દાખલ કર્યા બાદ વધુ સારવાર માટે આરએમએલ હોસ્પિટલમાં રિફર કરવામાં આવ્યો, જ્યાં ડૉક્ટરોએ સર્જરી કરીને તેની છાતીમાંથી છરી કાઢી. હાલ વિદ્યાર્થીની સ્થિતિ સ્થિર હોવાનું તબીબો દ્વારા જણાવાયું છે.
પોલીસની પ્રાથમિક તપાસમાં જાણવા મળ્યું કે લગભગ 10-15 દિવસ પહેલા થયેલા ઝઘડામાં એક આરોપીને માર પડ્યો હતો, અને તેને શંકા હતી કે આ ઝઘડામાં પીડિત વિદ્યાર્થીનો હાથ હતો. આ દુશ્મનાવટને કારણે આરોપીએ પોતાના બે મિત્રોને સાથે મળીને બદલો લેવા માટે પીડિત પર હુમલો કરવાનો પ્લાન ઘડ્યો હતો. 4 સપ્ટેમ્બરના રોજ જ્યારે પીડિત શાળાના ગેટ નજીક પહોંચ્યો, ત્યારે ત્રણેય સગીરોએ તેને ઘેરી લીધો. એક સગીરાએ છરીથી સીધો હુમલો કર્યો, જ્યારે બાકીના બે સગીરોએ પીડિતને પકડી રાખ્યો. હુમલા દરમિયાન એક આરોપીએ તૂટેલી બિયરની બોટલ બતાવીને પીડિતને વધુ ડરાવવાનો પ્રયત્ન કર્યો હતો.
પોલીસે ઝડપથી કાર્યવાહી કરતાં ત્રણેય સગીર આરોપીઓને આરામ બાગ વિસ્તારમાંથી પકડી પાડ્યા. તેમની ઉંમર 15 અને 16 વર્ષની વચ્ચે હોવાનું ખુલ્યું છે. પોલીસ દ્વારા ગુનામાં વપરાયેલી છરી અને તૂટેલી બોટલ જપ્ત કરવામાં આવી છે. સેન્ટ્રલ ડિસ્ટ્રિક્ટ ડેપ્યુટી કમિશનર ઑફ પોલીસ નિધિન વાલસને જણાવ્યું કે આ હુમલો સંપૂર્ણપણે વ્યક્તિગત દુશ્મનાવટના કારણે કરવામાં આવ્યો હતો અને આરોપીઓ સામે કાનૂની કાર્યવાહી શરૂ કરી દેવામાં આવી છે.
આ ઘટના માત્ર એક વિદ્યાર્થી પર થયેલા હુમલા સુધી મર્યાદિત નથી, પરંતુ તે સમાજમાં વધતી કિશોરવયની હિંસક માનસિકતા અને શૈક્ષણિક સંસ્થાઓની સુરક્ષા વ્યવસ્થાને લઈને પણ ગંભીર પ્રશ્નો ઊભા કરે છે. દિલ્હીમાં બનેલી આ ઘટના અગાઉ અમદાવાદના મણિનગર વિસ્તારમાં આવેલી સૅવનથ ડે સ્કૂલમાં બનેલી સમાન ઘટનાની યાદ અપાવે છે, જે દર્શાવે છે કે શાળાઓની બહાર વિદ્યાર્થીઓની સુરક્ષા માટે તાત્કાલિક કડક પગલાં લેવા જરૂરી બની ગયું છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
