દેશના 80મા સ્વાતંત્ર્ય પર્વની ઉજવણીના ભાગરૂપે ચાલી રહેલા ‘હર ઘર તિરંગા’ અભિયાન અંતર્ગત આણંદ શહેરમાં રાષ્ટ્રપ્રેમનો અનોખો માહોલ સર્જાયો હતો. આણંદ જિલ્લા વહીવટી તંત્ર અને કરમસદ-આણંદ મહાનગરપાલિકાના સંયુક્ત ઉપક્રમે ભવ્ય તિરંગા યાત્રાનું આયોજન કરવામાં આવ્યું હતું, જેમાં 10 હજારથી વધુ નગરજનોએ ઉમંગ અને ઉત્સાહ સાથે ભાગ લીધો હતો.
વલ્લભ વિદ્યાનગરના શાસ્ત્રી મેદાનથી તિરંગા યાત્રાનો ભવ્ય પ્રારંભ કરવામાં આવ્યો હતો. ગુજરાતના નાયબ મુખ્યમંત્રી હર્ષ સંઘવી, મંત્રી રમણભાઈ સોલંકી, સાંસદ મિતેશ પટેલ, સ્થાનિક ધારાસભ્યો તેમજ અન્ય અગ્રણીઓએ લીલી ઝંડી બતાવી યાત્રાને પ્રસ્થાન કરાવ્યું હતું.
તિરંગા યાત્રા શાસ્ત્રી મેદાનથી શરૂ થઈ વિદ્યાનગર શહીદ ચોક અને ભાઈકાકા સ્ટેચ્યુ થઈ આણંદ ટાઉનહોલ ખાતે સંપન્ન થઈ હતી. સમગ્ર માર્ગ પર મોટી સંખ્યામાં નાગરિકો હાથમાં તિરંગો લઈને જોડાયા હતા અને દેશભક્તિના નારાઓથી સમગ્ર વિસ્તાર ગુંજી ઉઠ્યો હતો.
પોલીસ બેન્ડ, ઘોડેશ્વાર પોલીસ અને NCC કેડેટ્સ બન્યા આકર્ષણનું કેન્દ્ર
યાત્રાની શરૂઆતમાં બાઈક સવાર પોલીસ જવાનો, ઘોડેશ્વાર પોલીસ, પોલીસ બેન્ડ અને NCC ગુજરાત બટાલિયનના કેડેટ્સે શિસ્તબદ્ધ કૂચ કરીને સૌનું ધ્યાન ખેંચ્યું હતું. આ ઉપરાંત હોમગાર્ડ, મહિલા પોલીસ કોન્સ્ટેબલ, ટીઆરબી જવાનો અને વિવિધ સ્કૂલ-કોલેજોના વિદ્યાર્થીઓ પણ વિશેષ વેશભૂષામાં યાત્રામાં જોડાયા હતા.
વિદ્યાર્થીઓએ દેશભક્તિના ગીતો અને નૃત્યો દ્વારા રાષ્ટ્રપ્રેમનો સંદેશ આપ્યો હતો. વિવિધ વેશભૂષા અને સાંસ્કૃતિક રજૂઆતોના કારણે તિરંગા યાત્રા વધુ રંગારંગ અને આકર્ષક બની હતી.
અધિકારીઓ અને પદાધિકારીઓ પણ હાથમાં તિરંગો લઈને જોડાયા
તિરંગા યાત્રાની વિશેષતા એ રહી કે વિવિધ ઉચ્ચ અધિકારીઓ અને પદાધિકારીઓએ સામાન્ય નાગરિકોની જેમ હાથમાં તિરંગો લઈને પદયાત્રામાં ભાગ લીધો હતો. મેયર દીપિકાબેન પટેલ, જિલ્લા કલેક્ટર પ્રવીણ ચૌધરી, મ્યુનિસિપલ કમિશનર આર. એન. ડોડીયા, જિલ્લા પોલીસ વડા ગૌરવ જસાણી તેમજ સરદાર પટેલ યુનિવર્સિટીના કુલપતિ સહિતના મહાનુભાવો પણ યાત્રામાં જોડાયા હતા.
નાયબ મુખ્યમંત્રી હર્ષ સંઘવીએ તિરંગા યાત્રામાં મોટી સંખ્યામાં જોડાયેલા નગરજનોને બિરદાવ્યા હતા અને સ્વાતંત્ર્ય પર્વ નિમિત્તે સૌને શુભકામનાઓ પાઠવી હતી.
વિદ્યાનગર રોડ પર તિરંગા અને રોશનીનો નયનરમ્ય શણગાર
કરમસદ-આણંદ મહાનગરપાલિકા દ્વારા વિદ્યાનગર રોડની બંને બાજુ આવેલી ઇમારતોને રાષ્ટ્રધ્વજથી શણગારવામાં આવી હતી. માર્ગ પરના થાંભલાઓ અને મુખ્ય વિસ્તારોમાં આકર્ષક રોશની કરવામાં આવતા સમગ્ર વિસ્તાર તિરંગાના રંગોમાં રંગાયો હતો.
10 હજારથી વધુ લોકો હાથમાં રાષ્ટ્રધ્વજ લઈને “ભારત માતા કી જય” અને “વંદે માતરમ્”ના નારા લગાવતા આગળ વધી રહ્યા હતા. પરિણામે સમગ્ર વિદ્યાનગર રોડ રાષ્ટ્રપ્રેમ અને દેશભક્તિના રંગે રંગાયો હતો.
ભવ્ય તિરંગા યાત્રા માત્ર સ્વાતંત્ર્ય પર્વની ઉજવણી પૂરતી સીમિત ન રહી, પરંતુ નાગરિકોમાં રાષ્ટ્રપ્રેમ, એકતા અને દેશ પ્રત્યેની જવાબદારીનો સંદેશ આપતો લોકોત્સવ બની હતી. મોટી સંખ્યામાં યુવાનો, વિદ્યાર્થીઓ, પોલીસ જવાનો, અધિકારીઓ અને નાગરિકોની ભાગીદારીથી આણંદમાં દેશભક્તિનો યાદગાર માહોલ સર્જાયો હતો.
ભાવેશ સોની (આણંદ)
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
