રક્ષાબંધન એટલે ભાઈ-બહેનના પ્રેમ અને રક્ષણના વચનનું પવિત્ર પર્વ. પરંતુ આણંદ તાલુકાના મોગરી ગામની 18 વર્ષીય વિદ્યાર્થીની ખુશી વૈદ્યએ રાખડીના આ પવિત્ર તાંતણાને દેશભક્તિ સાથે જોડી સરહદ પર દેશની રક્ષા કરતા ભારતીય સેનાના જવાનો સુધી પહોંચાડવાનો અનોખો પ્રયાસ કર્યો છે.
‘એક રાખી ફોજી કે નામ’ અભિયાન અંતર્ગત ખુશી છેલ્લા ચાર વર્ષથી વિવિધ શાળા-કોલેજોના વિદ્યાર્થીઓ પાસેથી રાખડીઓ, વ્યક્તિગત સંદેશાઓ અને રાખડી કાર્ડ એકત્ર કરી ભારતીય સેનાના જવાનો સુધી પહોંચાડે છે. દર વર્ષે અંદાજે 6000 જેટલી રાખડીઓ જવાનો માટે મોકલવામાં આવે છે. ચાલુ વર્ષે પણ રક્ષાબંધન નિમિત્તે આશરે 6000 રાખડીઓ મોકલવામાં આવી હોવાનું ખુશીએ જણાવ્યું હતું.
વલ્લભ વિદ્યાનગર ખાતે કોલેજના પ્રથમ વર્ષમાં અભ્યાસ કરતી ખુશી માટે આ અભિયાનની પ્રેરણા સિયાચીન સાથે જોડાયેલી છે. સિયાચીન ગ્લેશિયરની પ્રેરણાદાયી યાત્રા દરમિયાન તેને ભારતીય સૈનિકોના સાહસ, શૌર્ય, કઠિન જીવન અને બલિદાનને નજીકથી સમજવાની તક મળી હતી. સિયાચીનમાં તૈનાત જવાનોના પડકારોને સમજાવતા પુસ્તક અને સિયાચીન જાગૃતિ અભિયાનથી પ્રેરાઈને તેના મનમાં સૈનિકો માટે કંઈક કરવાની ભાવના જાગી અને ત્યાંથી ‘એક રાખી ફોજી કે નામ’ અભિયાનનો પ્રારંભ થયો.
આ અભિયાન હેઠળ ધોરણ 1થી 12 તેમજ કોલેજના વિદ્યાર્થીઓને સૈનિકો માટે રાખડીઓ બનાવવા અને પોતાના હાથે લાગણીસભર સંદેશા લખવા પ્રોત્સાહિત કરવામાં આવે છે. છેલ્લા ચાર વર્ષમાં ખુશીએ વિવિધ શાળા-કોલેજોની મુલાકાત લઈને હજારો વિદ્યાર્થીઓને આ દેશભક્તિના અભિયાન સાથે જોડ્યા છે.
ખુશીના જણાવ્યા મુજબ, આ પ્રવૃત્તિ માત્ર રાખડી બનાવવા કે રક્ષાબંધનના તહેવાર પૂરતી મર્યાદિત નથી. તેનો મુખ્ય હેતુ નવી પેઢીમાં દેશપ્રેમ, જવાબદારી, સંવેદનશીલતા અને સૈનિકોના સમર્પણ પ્રત્યે આદરની ભાવના વિકસાવવાનો છે. વિદ્યાર્થીઓ દ્વારા તૈયાર થતી દરેક રાખડી અને સંદેશામાં સરહદના જવાનો પ્રત્યેનો પ્રેમ અને સન્માન વ્યક્ત થાય છે.
ખાસ વાત એ છે કે સૈનિકો તરફથી પણ આ અભિયાનને હૃદયસ્પર્શી પ્રતિસાદ મળે છે. વિદ્યાર્થીઓની રાખડીઓ અને સંદેશા મળ્યા બાદ જવાનો તરફથી મળતા પ્રતિભાવથી બાળકોમાં દેશ પ્રત્યે ગૌરવ અને સૈનિકો પ્રત્યે સન્માનની લાગણી વધુ મજબૂત બને છે.
મોગરીની 18 વર્ષીય ખુશી વૈદ્યની આ પહેલ સાબિત કરે છે કે દેશભક્તિ માટે ઉંમરની કોઈ મર્યાદા નથી અને રાખડીનો એક નાનકડો તાંતણો પણ સરહદ પર ઊભેલા જવાન સુધી સમગ્ર દેશનો પ્રેમ અને આભાર પહોંચાડી શકે છે.
ભાવેશ સોની (આણંદ)
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
