હિંમતનગરમાં એક ગંભીર ઘટનામાં જ્વેલરી શોરૂમમાં કામ કરતા ત્રણ વ્યક્તિઓએ ગ્રાહકો પાસેથી મેળવેલી વ્યક્તિગત માહિતીનો દૂરઉપયોગ કરીને સગીરાને ફસાવવાનો પ્રયાસ કર્યો હોવાનું બહાર આવ્યું છે. પોલીસે ઝડપી કાર્યવાહી કરીને ત્રણેય આરોપીઓને ઝડપી જેલમાં મોકલી આપ્યા છે. આ ઘટના બાદ વ્યક્તિગત ડેટાની સુરક્ષા અને ડિજિટલ ડેટા પ્રોટેક્શન કાયદા અંગે ચર્ચા તેજ બની છે.
લગ્ન ખરીદી દરમિયાન મેળવેલી માહિતીનો દૂરઉપયોગ
મહિંમતનગર તાલુકાના એક પરિવાર સાત મહિના પહેલા દીકરીના લગ્ન માટે ખરીદી કરવા હિંમતનગરના એક જવેલર્સમાં ગયા હતા. આ દરમિયાન કંપનીના કર્મચારી મનીષ ગઢવી અને અજય નામથી ઓળખ આપનાર (પછીથી મહંમદ શાકીર સરદાર મોહમ્મદ શેખ તરીકે ઓળખાયો)એ ફીડબેક અને નવી સ્કીમની માહિતી આપવા બહાને પરિવારના મોબાઇલ નંબર, ઈમેઈલ અને સરનામા જેવી વ્યક્તિગત માહિતી મેળવી હતી.
ખોટી ઓળખથી સગીરાને સંપર્ક અને મિત્રતા
પોલીસ તપાસ મુજબ આરોપીઓએ હિન્દુ નામ ધારણ કરીને સગીરા સાથે સંપર્ક વધાર્યો અને મેસેજ તથા કોલ દ્વારા મિત્રતા બનાવી. ઉપહાર આપવાના બહાને તેઓ પરિવારના ઘરે પહોંચ્યા અને પછી હોસ્ટેલ સુધી જઈ મુલાકાત પણ લીધી. આ દરમિયાન ફોટા અને વીડિયો પણ લેવામાં આવ્યા હતા.
18 વર્ષ પૂરા થવાની રાહ અને બ્લેકમેલિંગનો પ્રયાસ
પોક્સો એક્ટ હેઠળ કાર્યવાહીથી બચવા આરોપીએ સગીરાના 18 વર્ષ પૂર્ણ થવાની રાહ જોઈ હતી. ત્યારબાદ સગીરાને ઘરેથી સોના-ચાંદીના દાગીના લઈ અજમેર જવા દબાણ કર્યું હતું. આરોપીની સાચી ઓળખ સામે આવતા સગીરાએ ઇન્કાર કર્યો, જેના બાદ અલગ અલગ નંબરથી ધમકીઓ આપી અને ફોટા-વિડિયો વાયરલ કરવાની ધમકી આપી રૂ. 5 લાખની ખંડણી માંગવામાં આવી હતી.
પોલીસની ઝડપી કાર્યવાહી, ત્રણેય આરોપી ઝડપાયા
સગીરાના પરિવાર દ્વારા પોલીસને જાણ કરતા હિંમતનગરમાં મહંમદ શાકીર સરદાર મોહમ્મદ શેખ અને તેનો સાગરિત મોહમદ સોહેલ સલીમ મોહમદ મકરાણી ઝડપાયા હતા, જ્યારે મનીષ ગઢવીને મહેસાણાથી ઝડપી લેવાયો હતો. A ડિવિઝન PSI નારાયણસિંહ વાઘેલાએ જણાવ્યું કે ત્રણેયને કોર્ટમાં રજૂ કર્યા બાદ જેલમાં મોકલી આપવામાં આવ્યા છે. આરોપીઓના મોબાઇલ ફોન જપ્ત કરીને તપાસ માટે મોકલવામાં આવ્યા છે.
ડેટા પ્રોટેક્શન કાયદા અંગે ચર્ચા તેજ
સિનિયર એડવોકેટ ઉર્વશીબેન ત્રિવેદી મુજબ ડિજિટલ પર્સનલ ડેટા પ્રોટેક્શન (DPDP) એક્ટ 2023 હેઠળ ડેટા ફિડ્યુસીયરી દ્વારા સુરક્ષા ન રાખવામાં આવે તો ભારે દંડ થઈ શકે છે. વ્યક્તિગત ડેટા લીક માટે 250 કરોડ સુધીનો દંડ અને નિયમોના ઉલ્લંઘન માટે 50 કરોડ સુધીનો દંડ લાગુ થઈ શકે છે.
હિન્દુ સંગઠનોની કડક કાર્યવાહી માટે માંગ
વિશ્વ હિન્દુ પરિષદ અને બજરંગ દળે ઘટનાની નિંદા કરી છે અને કલેક્ટર તેમજ DSPને આવેદનપત્ર આપી આરોપીઓ સામે કડક કાર્યવાહી કરવાની માંગ કરી છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
