કેરળમાં એક 26 વર્ષીય મહિલા ડોકટરે દહેજના કારણે લગ્ન તૂટ્યા બાદ આત્મહત્યા કરી હતી. આ મામલે પોલીસે દુલ્હા અને તેના પરિવાર સામે કેસ નોંધ્યો છે. કહેવામાં આવી રહ્યું છે કે વરપક્ષે કન્યાપક્ષ પાસેથી સોનું, BMW કાર અને 15 એકડ જમીન(Kerala Doctor Dies Fiance Demands Dowry Breaks Marriage)ની માંગ કરી હતી. છોકરાના પરિવારે માંગણી પૂરી ન થતાં લગ્ન તોડી નાખ્યા હતા. રાજ્યના આરોગ્ય મંત્રીએ આ મામલે તપાસના આદેશ આપ્યા છે. આત્મહત્યા કરનાર યુવતીએ મેડિકલ કોલેજના સર્જરી વિભાગમાંથી પોસ્ટ ગ્રેજ્યુએશન કર્યું હતું.
મેડિકલ PG એસોસિએશનના પૂર્વ પ્રદેશ અધ્યક્ષ વિરુદ્ધ કેસ નોંધાયો
મૃતકનું નામ શહાના હતું. તે તિરુવનંતપુરમ મેડિકલ કોલેજમાં પોસ્ટ ગ્રેજ્યુએશનની વિદ્યાર્થીની હતી. આ મામલે પોલીસે મેડિકલ PG એસોસિએશનના પૂર્વ પ્રદેશ અધ્યક્ષ ડો. રુવાઈઝ ઈએ વિરુદ્ધ કેસ નોંધ્યો છે. તેની સામે આત્મહત્યા માટે ઉશ્કેરવા અને દહેજ પ્રતિબંધક ધારાની કલમો હેઠળ કેસ નોંધવામાં આવ્યો છે. આ મામલો ચર્ચામાં આવ્યા બાદ કેરળના સ્વાસ્થ્ય મંત્રી વીણા જ્યોર્જે તપાસના આદેશ આપ્યા છે. તેમજ મહિલા અને બાળ વિકાસ વિભાગના નિયામકને વહેલી તકે અહેવાલ રજૂ કરવા આદેશો આપવામાં આવ્યા છે.
મળેલી માહિતી મુજબ શહાના મંગળવારના રોજ તેના એપાર્ટમેન્ટમાં મૃત અવસ્થામાં મળી આવી હતી. રુવાઈઝ અને શહાનાના લગ્ન નક્કી થઇ ગયા હતા. પરંતુ આરોપ છે કે રુવાઈઝના પરિવારે દહેજમાં 150 પાઉન્ડ સોનું, 15 એકડ જમીન અને એક BMW કાર માંગી રહ્યું હતું. આ પહેલા શહાનાનો પરિવાર 50 પાઉન્ડ સોનું, 50 લાખ રૂપિયાની સંપત્તિ અને એક કાર દેવા માટે રજી થયો હતો. જો કે છોકરાનો પરિવાર આ વાત પર રજી ન થયો અને લગ્ન તોડી દીધા હતા. જેથી શહાનાને આઘાત લાગ્યો અને તે ડિપ્રેશનમાં આવી ગઈ હતી.
સાથીદારોના ફોનનો ન આપ્યો જવાબ
શહાના સોમવારે સર્જરી ICUમાં નાઈટ ડ્યુટી જોઈન કરવાની હતી, પરંતુ તેણે રિપોર્ટ કર્યો ન હતો. જ્યારે એક સાથીદારે તેને ફોન કર્યો ત્યારે તેણે જવાબ આપ્યો ન હતો. બાદમાં જ્યારે તેના મિત્રો ફ્લેટ પર પહોંચ્યા ત્યારે તેમને દરવાજો અંદરથી બંધ જોવા મળ્યો હતો. આ પછી તે લોકોએ પોલીસને જાણ કરી. જ્યારે દરવાજો તોડવામાં આવ્યો ત્યારે તે અંદરથી બેભાન હાલતમાં મળી આવી હતી. તેને તાત્કાલિક મેડિકલ કોલેજ હોસ્પિટલમાં લઈ જવામાં આવી હતી જ્યાં ડૉક્ટરોએ તેને મૃત જાહેર કરી હતી.
માતાએ પુત્રી માટે કરી ન્યાયની માંગ
કેરળ મહિલા આયોગના ચેરપર્સન એડવોકેટ સતીદેવી શહાનાની માતાને તેમના ઘરે જઈ મળ્યા હતા. શહાનાની માતાએ તેની પુત્રી માટે ન્યાયની માંગ કરી છે અને આ મામલે યોગ્ય તપાસની માંગ કરી છે. મહિલા આયોગ આ મામલે પોલીસ પાસેથી રિપોર્ટ માંગશે. મહિલા આયોગના ચેરપર્સને કહ્યું હતું કે, ‘જો છોકરાના પરિવારે દહેજની માંગણી કરી છે તો તેમનાં વિરુદ્ધ દહેજ નિવારણ અધિનિયમ હેઠળ કેસ નોંધવામાં આવશે.’ રાજ્ય લઘુમતી આયોગે પણ પોતાના સ્તરે આ અંગે કેસ શરૂ કર્યો છે. આ દરમિયાન મેડિકલ PG ડોક્ટર્સ એસોસિએશને આરોપી ડોક્ટરને તેની સંસ્થાની તમામ જવાબદારીઓમાંથી હટાવી દીધો છે.
