ખેડા જિલ્લા માટે એક અત્યંત ગૌરવપૂર્ણ સમાચાર સામે આવ્યા છે. ગુજરાત ક્રિકેટ ટીમમાં સૈયદ મુસ્તાક અલી ટી20 ટ્રોફી માટે ખેડા જિલ્લાના કુલ પાંચ ખેલાડીઓની પસંદગી કરવામાં આવી છે. આ સિલેક્શન થતાં જ જિલ્લા ક્રિકેટ એસોસિએશનના પ્રમુખ મનીષ દેસાઈએ આનંદ અને ગૌરવની લાગણી વ્યક્ત કરી હતી. જિલ્લાના ખેલાડીઓનું આ પ્રદર્શન રાજ્ય અને રાષ્ટ્રીય સ્તરે ખેડાનું નામ રોશન કરી રહ્યું છે.
ભારતમાં સામાન્ય રીતે ક્રિકેટ સીઝનની શરૂઆત ઓક્ટોબર મહિનાથી થતી હોય છે. આ સીઝનની શરૂઆત રણજી ટ્રોફી જેવી પ્રતિષ્ઠિત ટુર્નામેન્ટથી થાય છે. આ વખતે રમાઈ રહેલી રણજી ટ્રોફીમાં પણ ખેડા જિલ્લાના ચાર ખેલાડીઓ સિલેક્ટ થયા હતા અને તેઓનો દેખાવ ખૂબ જ સારો રહ્યો હતો. જોકે, હાલમાં રણજી ટ્રોફીમાં વિરામ છે અને તેની બાકીની મેચો જાન્યુઆરી મહિનાના મધ્ય ભાગથી ફરી શરૂ થશે.
હાલમાં દેશમાં સૈયદ મુસ્તાક અલી ટ્રોફી ની શરૂઆત કરવામાં આવી છે. આ ટ્રોફી T20 ફોર્મેટમાં રમાય છે અને આનું આયોજન કરવાનો મુખ્ય હેતુ આગામી માર્ચ મહિનામાં શરૂ થનારી IPL છે. આ ટુર્નામેન્ટમાં જે ખેલાડીઓનું પ્રદર્શન સારું રહેશે, તેઓને IPLની હરાજીમાં સ્થાન મળવાની અને પોતાની પસંદગીની ફ્રેન્ચાઇઝીમાં સામેલ થવાની ઉત્તમ તક મળશે.
આ મહત્વપૂર્ણ ટુર્નામેન્ટના સંદર્ભમાં તાજેતરમાં એક પ્રીમેચનું આયોજન કરવામાં આવ્યું હતું. આ પ્રીમેચ ગુજરાતની ટીમ અને તમિલનાડુ રાજ્યની ટીમ વચ્ચે યોજાઈ હતી. આ પ્રીમેચ માટે ગુજરાતની ટીમમાં ખેડા જિલ્લાના કુલ પાંચ ખેલાડીઓને સિલેક્ટ કરવામાં આવ્યા હતા. આ સિલેક્શન જિલ્લા માટે મોટી ઉપલબ્ધિ ગણાય છે.
સૈયદ મુસ્તાક અલી ટ્રોફીની પ્રીમેચ માટે ગુજરાતની ટીમમાં સિલેક્ટ થયેલા ખેડા જિલ્લાના પાંચ ખેલાડીઓના નામોમા અભિષેક દેસાઈ, અમિત દેસાઈ, વિશાલ જયસ્વાલ, રૂપાલ પટેલ, હિતેન મહેરા નાઓનો સમાવેશ થયો છે.
રિપોર્ટર – યેશા શાહ (ખેડા)
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
