ખેડા કલેકટર એન.વી. ઉપાધ્યાયના અધ્યક્ષ સ્થાને ડિસ્ટ્રીક્ટ રોડ સેફટી કમીટી (DRSC)ની બેઠકનું જિલ્લા કલેકટર કચેરી ખાતે આયોજન કરવામાં આવ્યું હતું.જેમાં ઓગષ્ટ-૨૦૨૬ રોડ સેફટી બાબતો પર મહત્વની ચર્ચાઓ કરવામાં આવી હતી.
ચોમાસાની સિઝન દરમિયાન પડેલા ભારે વરસાદના પગલે જિલ્લાના મહત્વના જાહેર માર્ગો જેવા કે નેશનલ હાઇવે, સ્ટેટ હાઇવે, પંચાયત માર્ગ તેમજ આરએન્ડબીના માર્ગો પર પડેલા ખાડાઓનું વેટ મિક્સથી યોગ્ય પુરાણકામ કરે તે સંદર્ભે કરેલ કાર્યવાહીની સમિક્ષા આ બેઠકમાં કરવામાં આવી હતી.
આ સાથે જિલ્લાના વિવિધ જાહેર માર્ગો પર રખડતા પશુઓના કારણે થતાં જીવલેણ માર્ગ અકસ્માતો નિવારવા બાબતે પણ આ બેઠકમાં ચર્ચા કરવામાં આવી હતી. આ સાથે જિલ્લામાં જૂલાઈ-૨૦૨૬ સુધી થયેલ ફેટલ અકસ્માત બાબતે પણ ચર્ચા કરી હતી. જેમાં વિવિધ બ્લેક સ્પોટની વિગતવાર માહિતી મેળવી અકસ્માત નિવારણ પગલાં લેવાના સૂચનો આપ્યા હતા. જેમાં ડિવાઈડર, નો પાર્કિગના બોર્ડ, રીફલેક્ટર, બહિર્ગોળ લેન્સ રોડ પર મૂકવા કલેકટરે જણાવ્યું હતું.
આ ઉપરાંત નડિયાદ રૂરલ પોલીસ સ્ટેશન હદ વિસ્તારમાં થતા અકસ્માતો નિવારણ બાબતે તેમજ સ્કૂલ ઝોન અને બાળકોને માર્ગ સલામતીને ધ્યાને લઈ સંત ઉર્સલા, આર.સી.મિશન શાળા અને લિટલ કિંગડમ શાળા આગળ કરેલ કાર્યવાહીની વિગતવાર ચર્ચા કરવામાં આવી તેમજ ડિસ્ટ્રીક્ટ હાઇવે ટાસ્ક ફોર્સ કમિટીની કામગીરીની પણ બેઠકમાં ચર્ચા કરાઈ હતી.
આ બેઠકમાં કલેકટરે રોંગસાઈડે આવતા વાહનો, ઓવર સ્પીડથી જતાં વાહનો, દબાણ જેવા ટ્રાફિક નિયમનને લગતી કામગીરી બાબતે અધિકારીઓ સાથે ચર્ચા કરી તેના નિવારણના પગલાં સૂચવ્યા હતા.
કલેકટર એન.વી.ઉપાધ્યાયે સૂચનો આપતા જણાવ્યું કે, મહત્વના રોડ પર જ્યાં જરૂર જણાય ત્યાં સ્પીડ બ્રેકર મુકવા અને સ્ટ્રીટ લાઈટ તેમજ હાઈમાસ્ટ લાઈટ મૂકવા જેવી બાબતો જણાવી અકસ્માત નિવારણ પગલાં લેવા સૂચનો આપ્યા હતા. જિલ્લામાં ટ્રાફિક ડ્રાઈવ વધુ સધન બનાવો તેમજ સરકારી ઓફિસમાં પણ તમામ કર્મયોગીઓ હેલ્મેટ અવશ્ય પહેરે તેવા પ્રયાસો કરવા અને તે માટે સ્પેશિયલ ઝૂંબેશ શરૂ કરવા કલેકટરે જણાવ્યું હતું. તથા પોલીસ અધિક્ષક વિજય પટેલે ટ્રાફિક નિયમન માટે જિલ્લામાં વિવિધ જગ્યાએ સિગ્નલો મુકવા પણ સૂચન કર્યું.
આ તકે જિલ્લા પોલીસ અધિક્ષક વિજય પટેલ, જિલ્લા વિકાસ અધિકારી જયંત કિશોર, અધિક નિવાસી કલેકટર જે.બી.દેસાઈ, આર.ટી.ઓ. ઇન્સ્પેક્ટર એમ.એન.ભાંગલે, એસટીના વિભાગીય નિયામક સી.ડી.મહાજન, સીડીએચઓ કવિતાબેન, માર્ગ અને મકાન વિભાગ સ્ટેટ અને પંચાયતના અધિકારીઓ, નેશનલ હાઇવે ઓથોરિટીના અધિકારી, સર્વે પ્રાંત અધિકારીઓ, સહિત સંબંધિત વિભાગના અધિકારી અને પ્રતિનિધિઓ હાજર રહ્યા હતા.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
