ઉજ્જૈન ખાતે આવેલી લગભગ 200 વર્ષ જૂની તકિયા મસ્જિદના ડિમોલિશન મુદ્દે ચાલી રહેલો વિવાદ હવે સુપ્રીમ કોર્ટમાં સમાપ્ત થયો છે. શુક્રવારે (7 નવેમ્બર) સુપ્રીમ કોર્ટની જસ્ટિસ વિક્રમ નાથ અને જસ્ટિસ સંદીપ મેહતા સમિતિએ આ મામલે 13 અરજીકર્તાઓ દ્વારા દાખલ કરાયેલ અપીલને ફગાવી દીધી અને મધ્ય પ્રદેશ સરકારની કાર્યવાહીને સંપૂર્ણપણે કાયદેસર ગણાવી છે. કોર્ટના આ નિર્ણયથી રાજ્ય સરકારે ઉજ્જૈનમાં જાહેર હિત માટે હાથ ધરેલી કાર્યવાહી પર મૂકાયેલ કાયદાકીય અડચણો દૂર થઈ છે.
સુપ્રીમ કોર્ટે પોતાના નિર્ણયમાં સ્પષ્ટ કર્યું કે મસ્જિદ આવેલી જમીનનું અધિગ્રહણ “રાઈટ ટુ ફેર કોમ્પેન્સેશન એન્ડ ટ્રાન્સપરન્સી ઈન લેન્ડ એક્વિઝિશન એક્ટ, 2013” હેઠળ થયું હતું, જે મુજબ સરકાર કોઈ પણ જમીન લે તે પહેલાં નોટિફિકેશન જાહેર કરવું, સંબંધી પક્ષોને સાંભળવાની તક આપવી અને વાજબી વળતર ચૂકવવું ફરજિયાત છે. કોર્ટે નોંધ્યું કે ઉજ્જૈનની તકિયા મસ્જિદના કેસમાં આ તમામ પ્રક્રિયા પારદર્શક રીતે પૂર્ણ કરવામાં આવી છે અને વળતર પણ ચૂકવવામાં આવ્યું છે. જો કોઈ પક્ષને લાગે કે વળતર ખોટા વ્યક્તિને ચૂકવાયું છે, તો તે અંગે કાયદા હેઠળ અલગ ફરિયાદ કરવાની તક ઉપલબ્ધ છે.
અરજીકર્તાઓએ સુપ્રીમ કોર્ટમાં દલીલ કરતા કહ્યું હતું કે મસ્જિદનું ડિમોલિશન “પ્લેસિસ ઑફ વર્શિપ એક્ટ, 1991″નું ઉલ્લંઘન છે, કારણ કે આ કાયદા મુજબ કોઈ પણ ધાર્મિક સ્થળના સ્વરૂપમાં ફેરફાર કરી શકાય નહીં. પરંતુ સુપ્રીમ કોર્ટે આ દલીલને ખોટું અર્થઘટન ગણાવ્યું. કોર્ટે સ્પષ્ટ કર્યું કે આ કાયદાનો હેતુ મંદિરને મસ્જિદ કે મસ્જિદને મંદિર બનાવવાથી રોકવાનો છે, જ્યારે ઉજ્જૈનના કિસ્સામાં જમીન ધાર્મિક રૂપાંતર માટે નહીં પરંતુ જાહેર હિતના કામ માટે લેવામાં આવી છે. એટલે આ કાયદાનો અહીં ઉપયોગ યોગ્ય નથી.
કોર્ટએ આ પણ નોંધ્યું કે અરજીકર્તાઓએ અગાઉ મધ્ય પ્રદેશ હાઈકોર્ટમાં આ જ મુદ્દે રિટ અરજી દાખલ કરી હતી, પરંતુ પછી તેને સ્વેચ્છાએ પાછી ખેંચી લીધી હતી. હવે ફરી તે જ મુદ્દે સુપ્રીમ કોર્ટમાં અપીલ કરવી કાયદાકીય રીતે નબળું પગલું ગણાય છે. તેથી, કોર્ટએ સ્પષ્ટપણે જણાવ્યું કે અરજીકર્તાઓની અપીલમાં કોઈ નવો કે કાયદેસર મુદ્દો નથી.
હાઈકોર્ટના પૂર્વ ચુકાદાનો સમર્થન કરતા સુપ્રીમ કોર્ટએ પણ કહ્યું કે “નમાજ પઢવાની પ્રક્રિયા ફક્ત મસ્જિદ સુધી સીમિત નથી — વ્યક્તિ પોતાના ઘરમાં કે અન્ય કોઈ યોગ્ય સ્થળે પણ નમાજ અદા કરી શકે છે.” અંતે, કોર્ટે અરજી ફગાવીને મધ્ય પ્રદેશ સરકારની કાર્યવાહી સંવિધાનિક અને કાયદેસર હોવાનું માન્ય કર્યું, જે સાથે ઉજ્જૈનની તકિયા મસ્જિદનો લાંબો વિવાદ પૂરો થયો છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
