દહેગામ તાલુકાના ઝાંક ગામની જે.એમ. દેસાઈ વિદ્યામંદિર શાળામાં એક અચાનક ઉદ્ભવેલી તંદુરસ્તી સંબંધી પરિસ્થિતિએ સમગ્ર આરોગ્ય તંત્રને હરકતમાં મૂકી દીધું છે. શાળાના કુલ 225 વિદ્યાર્થીઓમાંથી 122 વિદ્યાર્થીઓમાં એક ખાસ પ્રકારની આંખોની તકલીફ — જેમાં આંખમાં ખંજવાળ, લાલાશ, બળતરા, તથા ડબલ વિઝન જેવી લક્ષણો જોવા મળ્યા હતા — સામે આવતા તાત્કાલિક સમગ્ર તંત્ર ચિંતામાં મુકાયું હતું. આ ઘટના સામે આવતા જ જિલ્લા આરોગ્ય વિભાગ અને કડાદરા આરોગ્ય કેન્દ્રની તાત્કાલિક ટીમ શાળાએ દોડી ગઈ હતી અને પ્રથમ તબક્કે સ્થળ પર જ પ્રાથમિક તપાસ અને સારવારની શરૂઆત કરવામાં આવી હતી.
વિદ્યાર્થીઓની સ્થિતિ ગંભીર જણાતા તેમને વધુ તબીબી દેખરેખ માટે ગાંધીનગર સિવિલ હોસ્પિટલમાં રાત્રે તબક્કાવાર રીતે ખસેડવામાં આવ્યા હતા. હોસ્પિટલમાં તમામ બાળકોની તાકીદે તપાસ શરૂ કરી દેવામાં આવી હતી અને સાથે જ બાળકોને ભોજન તથા ચા-નાસ્તાની વ્યવસ્થા પણ તંત્ર દ્વારા કરવામાં આવી હતી, જેથી માતાપિતા અને શાળા સંચાલકોને સંતોષકારક સપોર્ટ મળી શકે. મંગળવારના સવારે સ્ક્રીનિંગ બાદ રાહતદાયક સમાચાર સામે આવ્યા કે 120 વિદ્યાર્થીઓની તબિયત સંપૂર્ણપણે સ્થિર હોવાથી તેમને રજા આપી દેવામાં આવી છે. માત્ર બે વિદ્યાર્થીઓ હજુ પણ ઓબ્ઝર્વેશન હેઠળ છે, જેમને હાલ કોઈ ગંભીર લક્ષણો નથી પરંતુ સાવચેતીના ભાગરૂપે વધુ સમય માટે તબીબી દેખરેખ હેઠળ રાખવામાં આવ્યા છે.
આ સમગ્ર ઘટનાને રોગચાળાની દૃષ્ટિએ જોવામાં આવી રહી છે. તેથી, તંત્ર દ્વારા વિદ્યાર્થીઓના બ્લડ અને યુરિનના નમૂનાઓ લઇને કિડની અને લીવર પર કોઈ અસર થઈ છે કે નહીં તેની પણ ખાસ તપાસ કરવામાં આવી હતી. રિપોર્ટ મુજબ, બાળકોના અંગો પર કોઈ ખોટી અસર જોવા મળી નથી, જે એક સકારાત્મક બાબત છે.
તથાપિ, આ રોગચાળો કેવી રીતે ફેલાયો અને તેનું મૂળ કારણ શું છે તે અંગે હજુ સુધી કોઈ સ્પષ્ટતા થઈ નથી. આરોગ્ય વિભાગ ઉપરાંત ફૂડ એન્ડ સેફટી ડિપાર્ટમેન્ટે શાળા તથા હોસ્ટેલમાંથી પાણી તથા ભોજનના નમૂનાઓ એકત્ર કર્યા છે. સેમ્પલ લેબોરેટરીમાં મોકલવામાં આવ્યા છે અને રિપોર્ટની રાહ જોવામાં આવી રહી છે. પરંતુ, સમગ્ર ઘટના સર્જાઈ તે પછી પણ 24 કલાકથી વધુ સમય વીતી ગયાં હોવા છતાં તંત્ર તરફથી આ રોગચાળાનું કારણ જાણવા મળ્યું નથી, જેને જોઈને વહીવટી તંત્રની કાર્યક્ષમતાની નિષ્ફળતા સામે આવી રહી છે.
આ ઘટના માત્ર સ્થાનિક આરોગ્ય વ્યવસ્થાની ક્ષમતા માટે પડકારરૂપ નથી, પરંતુ સમગ્ર શાળાકીય માળખાની સફાઈ, પાણીનાં સ્ત્રોતોની શુદ્ધતા અને હોસ્ટેલમાં આપાતકાલીન વ્યવસ્થાઓ વિશે પણ ગંભીર પ્રશ્નો ઊભા કરે છે. આવી ઘટનાઓના મૂળમાં જઇ યોગ્ય કારણ શોધી તેનો નિકાલ લાવવો આરોગ્ય વિભાગ માટે અગત્યનું છે, નહીં તો આવનાર સમયમાં આવી ઘટનાઓ ફરી ન ઊભી થાય તેની ગેરંટી નહીં રહે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
