ગઢડા (સ્વામીના): ગઢડા તાલુકાના સાંજણાવદર ગામે જાણીતા લોકકલાકાર સ્વ. જાદવજીબાપા ધામેલીયાની સ્મૃતિમાં નિર્મિત સરકારી શાળાનું ભવ્ય લોકાર્પણ કરવામાં આવ્યું હતું. આ પ્રસંગે એક જ મંચ પર ત્રણ પદ્મશ્રી મહાનુભાવોની વિશેષ ઉપસ્થિતિએ કાર્યક્રમને યાદગાર બનાવ્યો હતો.
ગઢડાના વતની અને તળપદી ભાષાના જાણીતા લોકકલાકાર સ્વ. જાદવજીબાપા ધામેલીયા પોતાની અનોખી રજૂઆત અને લોકપ્રિય કૃતિઓ માટે જાણીતા હતા. તેમની સ્મૃતિને ચિરંજીવ રાખવાના હેતુથી સાંજણાવદર ગામે તેમના નામે શાળાનું નિર્માણ કરવામાં આવ્યું છે.
આ શાળાનું નિર્માણ આંતરરાષ્ટ્રીય હાસ્યકલાકાર, લેખક, ચિંતક અને પદ્મશ્રીથી સન્માનિત સમાજસેવક ડૉ. જગદીશ ત્રિવેદીના સેવાકાર્યના ભાગરૂપે કરવામાં આવ્યું છે. જગદીશ ત્રિવેદીએ જીવનના 50 વર્ષ પૂર્ણ થયા બાદ વૈદિક જીવનપદ્ધતિ અનુસાર વાનપ્રસ્થ વ્રત ધારણ કર્યું હતું. ત્યારબાદ તેમણે પોતાના કાર્યક્રમોમાંથી થતી આવકનો વ્યક્તિગત ઉપયોગ નહીં કરીને શિક્ષણ અને આરોગ્ય ક્ષેત્રે દાન કરવાનો સંકલ્પ લીધો હતો.
છેલ્લા નવ વર્ષથી તેઓ દેશ-વિદેશમાં યોજાતા પોતાના કાર્યક્રમોમાંથી થતી આવક શિક્ષણ અને આરોગ્ય સેવાઓ માટે સમર્પિત કરી રહ્યા છે. હાલમાં તેઓ પોતાના ક્ષેત્રના વડીલ કલાકારોના નામે શાળાઓનું નિર્માણ કરાવી રહ્યા છે. આ શ્રેણીમાં સાંજણાવદર ખાતે નિર્મિત શાળા પાંચમી છે, જ્યારે તેમના સેવાકાર્ય હેઠળ નિર્મિત આ કુલ સોળમી શાળા હોવાનું જણાવાયું હતું.
એક જ મંચ પર ત્રણ પદ્મશ્રી મહાનુભાવો
શાળાના લોકાર્પણ પ્રસંગે પદ્મશ્રી ડૉ. જગદીશ ત્રિવેદી, કિરણ હોસ્પિટલ સુરતના ચેરમેન અને જળક્રાંતિ અભિયાનના પ્રણેતા પદ્મશ્રી મથુરભાઈ સવાણી તેમજ જાણીતા હાસ્યકલાકાર, લેખક અને ચિંતક પદ્મશ્રી શાહબુદીન રાઠોડ એક જ મંચ પર ઉપસ્થિત રહ્યા હતા.
આ ઉપરાંત રાજકોટના સાંસદ પુરુષોત્તમ રૂપાલા, ધારાસભ્ય શંભુપ્રસાદજી ટુંડિયા, જાદવજીબાપાના પરિવારના હાસ્યકલાકાર સુખદેવ ધામેલીયા તથા પરિવારજનો પણ વિશેષ ઉપસ્થિત રહ્યા હતા.
કાર્યક્રમમાં ગઢડા અને આસપાસના વિસ્તારોના રાજકીય અને સામાજિક આગેવાનો, સ્વ. જાદવજીબાપાના ચાહકો, કલાકારો, જિલ્લા પ્રાથમિક શિક્ષણ વિભાગના અધિકારીઓ, ગ્રામજનો, શિક્ષકો અને વિદ્યાર્થીઓ મોટી સંખ્યામાં હાજર રહ્યા હતા.
આ શાળાનું લોકાર્પણ માત્ર શૈક્ષણિક સુવિધાનો ઉમેરો નહીં, પરંતુ લોકકલા અને લોકસંસ્કૃતિ સાથે જોડાયેલા વડીલ કલાકારના યોગદાનને સ્મરણમાં રાખવાનો એક મહત્વપૂર્ણ પ્રયાસ પણ બન્યો હતો.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
