ગઢડા (સ્વામીના): ગઢડા શહેરમાં રહેતા અને 89 વર્ષની વયે પણ સતત ચિત્રકામ સાથે જોડાયેલા વયોવૃદ્ધ ચિત્રકાર દયાળજીભાઈ પટેલની કલા સાધનાથી પ્રભાવિત થઈ પૂર્વ કેન્દ્રીય મંત્રી અને વર્તમાન સાંસદ પુરુષોત્તમભાઈ રૂપાલાએ તેમની ‘ચિત્રમ આર્ટ ગેલેરી’ની વિશેષ મુલાકાત લીધી હતી.
દયાળજીભાઈ પટેલે પોતાના નિવાસસ્થાને જ ‘ચિત્રમ આર્ટ ગેલેરી’ની રચના કરી છે. વર્ષોથી નિઃસ્વાર્થ ભાવથી ચિત્રકલા ક્ષેત્રે કાર્યરત દયાળજીભાઈ અનેક ચિત્રકારો માટે માર્ગદર્શક અને પ્રેરણાસ્ત્રોત બન્યા છે. 89 વર્ષની ઉંમરે પણ તેમનો ચિત્રકલા પ્રત્યેનો લગાવ અને સર્જનાત્મક પ્રવૃત્તિ યથાવત છે.
ગઢડા ખાતે યોજાયેલા એક કાર્યક્રમના રૂટ દરમિયાન સાંસદ પુરુષોત્તમભાઈ રૂપાલાએ ખાસ સમય કાઢીને ચિત્રમ આર્ટ ગેલેરીની મુલાકાત લીધી હતી. તેમણે ગેલેરીમાં પ્રદર્શિત વિવિધ ચિત્રકૃતિઓ નિહાળી અને દયાળજીભાઈ પટેલ પાસેથી તેમની ચિત્રયાત્રા, કલા સાધના અને ગેલેરી અંગે વિગતવાર માહિતી મેળવી હતી.
દયાળજીભાઈ પટેલની લાંબા સમયથી ચાલી રહેલી કલા સાધના અને ચિત્રકલા પ્રત્યેના સમર્પણની સાંસદ રૂપાલાએ પ્રશંસા કરી હતી. વયોવૃદ્ધ અવસ્થામાં પણ કલા પ્રત્યેનો તેમનો ઉત્સાહ જાળવી રાખવો નવી પેઢીના કલાકારો માટે પ્રેરણાદાયી હોવાનું તેમણે જણાવ્યું હતું.
આ મુલાકાત દરમિયાન પ્રદેશ અગ્રણી બાબુભાઈ જેબલિયા, સ્થાનિક યુવા આગેવાનો વિક્રમભાઈ બોરીચા, મુકેશભાઈ હિહોરીયા, સુરેશભાઈ ડવ, ડૉ. આર.જી. પંડ્યા, વિજયભાઈ પટેલ, મહાવીરભાઈ ખાચર, કમલભાઈ ત્રિવેદી, ચિત્રકાર હરેશભાઈ ગજ્જર અને પેઈન્ટર હમરાઝ સહિતના આગેવાનો અને કલા રસિકો ઉપસ્થિત રહ્યા હતા.
સાંસદ રૂપાલાની આ મુલાકાતથી સ્થાનિક કલા જગતમાં ઉત્સાહ જોવા મળ્યો હતો અને દયાળજીભાઈ પટેલની નિષ્ઠાપૂર્વકની ચિત્રકલા સાધનાને વિશેષ માન્યતા મળી હતી.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
