સુપ્રીમ કોર્ટે ગુરુવારે નેટફ્લિક્સ અને જાણીતા ફિલ્મમેકર નીરજ પાંડેની આગામી ફિલ્મ ‘ઘૂસખોર પંડત’ના ટાઇટલ સામે ગંભીર નારાજગી વ્યક્ત કરી છે. જસ્ટિસ બી.વી. નાગરત્નાની અધ્યક્ષતાવાળી બેન્ચે સુનાવણી દરમિયાન ફિલ્મના નામ અંગે કડક ટિપ્પણી કરતાં કહ્યું કે આવા વિવાદાસ્પદ ટાઇટલ ઘણીવાર માત્ર પબ્લિસિટી મેળવવા માટે પસંદ કરવામાં આવે છે અને તે સમાજમાં અનાવશ્યક વિભાજન ઉભું કરી શકે છે.
કોર્ટે મેકર્સને આપી કડક ચેતવણી
સુનાવણી દરમિયાન જસ્ટિસ બી.વી. નાગરત્નાએ ફિલ્મના નિર્માતાઓને જણાવ્યું કે, કોઈપણ વર્ગ અથવા સમુદાયને અપમાનિત કરતી બાબતો સ્વીકાર્ય નથી. કોર્ટે સ્પષ્ટ શબ્દોમાં કહ્યું કે, “તમારા પીઆર સ્ટંટ માટે સમાજમાં વધુ તિરાડો ન વધારો.” સાથે જ બેન્ચે મેકર્સને પૂછ્યું કે તેઓ ફિલ્મનું નામ બદલવા તૈયાર હોય તો નવું પ્રસ્તાવિત નામ શું હશે તે અંગે તાત્કાલિક માહિતી આપે.
સુપ્રીમ કોર્ટે નિર્માતાઓને નોટિસ જારી કરીને પૂછ્યું છે કે ફિલ્મમાં કોઈ ચોક્કસ સમુદાય અથવા વર્ગ વિશે વાંધાજનક રજૂઆત છે કે નહીં. કોર્ટે આ મુદ્દે વિગતવાર જવાબ માંગ્યો છે, જેથી ફિલ્મના કન્ટેન્ટ અને તેની સામાજિક અસર અંગે સ્પષ્ટતા થઈ શકે.
દિલ્હી હાઈકોર્ટમાં નેટફ્લિક્સે શું કહ્યું હતું?
આ મામલો અગાઉ દિલ્હી હાઈકોર્ટમાં પણ પહોંચ્યો હતો, જ્યાં નેટફ્લિક્સે ખાતરી આપી હતી કે ફિલ્મનું ટાઇટલ બદલવા માટે તેઓ તૈયાર છે. આ ખાતરી બાદ સોશિયલ મીડિયા પરથી ફિલ્મનું પ્રમોશનલ મટીરિયલ પણ હટાવવામાં આવ્યું હતું. ત્યારબાદ હાઈકોર્ટે અરજીનો નિકાલ કર્યો હતો, પરંતુ હવે સુપ્રીમ કોર્ટે આ મુદ્દાને ફરી ગંભીરતાથી લઈ વધુ સ્પષ્ટતા માંગવામાં આવી છે.
વિરોધ પાછળનું કારણ શું?
અરજદારે દલીલ કરી હતી કે ‘ઘૂસખોર પંડત’ નામ હિન્દુ પૂજારીઓ અને એક ખાસ સમુદાયની છબીને નુકસાન પહોંચાડે છે. તેમના મુજબ, ટાઇટલ સામાજિક અને સાંપ્રદાયિક રીતે ઉશ્કેરણીજનક બની શકે છે અને તેનાથી સમાજમાં નકારાત્મક સંદેશ જવાનો ભય છે. આથી ફિલ્મની રિલીઝ અને સ્ટ્રીમિંગ પર તાત્કાલિક રોક લગાવવાની પણ માંગ કરવામાં આવી હતી.
સુપ્રીમ કોર્ટે નિર્માતાઓને ટૂંકા સમયમાં જવાબ આપવા કહ્યું છે. આ કેસની આગામી સુનાવણી 19 ફેબ્રુઆરીએ હાથ ધરવામાં આવશે, જ્યાં મેકર્સના જવાબ અને પ્રસ્તાવિત ફેરફારો અંગે વધુ ચર્ચા થવાની શક્યતા છે.
ફિલ્મ અંગે માહિતી અને સંભવિત કાસ્ટ
રિપોર્ટ્સ મુજબ, ફિલ્મમાં રવિ કિશન અથવા જિમી શેરગિલ જેવા કલાકારો મહત્વની ભૂમિકામાં જોવા મળી શકે છે, જોકે ટાઇટલ વિવાદને કારણે સત્તાવાર કાસ્ટ લિસ્ટ હાલ જાહેર કરવામાં આવ્યું નથી. નીરજ પાંડે સામાન્ય રીતે થ્રિલર અને ક્રાઈમ ડ્રામા માટે જાણીતા છે અને આ પ્રોજેક્ટમાં પણ નવી સ્ટારકાસ્ટ સાથે ડાર્ક ક્રાઈમ ડ્રામા અથવા સેટાયર રજૂ થવાની ચર્ચા છે.
ફિલ્મ ભ્રષ્ટાચાર અને વ્યવસ્થાની ખામીઓ પર આધારિત હોવાનું માનવામાં આવે છે. ટાઇટલ પરથી અનુમાન થાય છે કે વાર્તા એવા પાત્રની આસપાસ ગોઠવાઈ છે જે કોઈ સામાજિક અથવા સરકારી હોદ્દા પર રહીને ઘૂસખોરીમાં સંડોવાયેલું હોય. અરજદારોનું કહેવું છે કે ‘પંડિત’ શબ્દ સાથે ‘ઘૂસખોર’ જોડવાથી એક ચોક્કસ સમુદાયની નકારાત્મક છબી ઉભી થઈ શકે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
