અમેરિકાના રાષ્ટ્રપતિ ડોનાલ્ડ ટ્રમ્પ દ્વારા ભારત પર લાદવામાં આવેલા ટેરિફ અને રશિયાથી તેલ ખરીદવા મુદ્દે ઊભેલા તણાવ વચ્ચે કેન્દ્રીય નાણામંત્રી નિર્મલા સીતારમણે ખૂબ જ સ્પષ્ટ અને દૃઢ નિવેદન આપ્યું છે. તેમણે સ્પષ્ટ શબ્દોમાં કહ્યું કે ભારત પોતાના આર્થિક હિતોને પ્રથમ સ્થાન આપશે અને રશિયા પાસેથી ક્રૂડ ઓઇલની ખરીદી ચાલુ રાખશે. સીતારમણે જણાવ્યું કે ભારતના નિર્ણયો માત્ર આંતરરાષ્ટ્રીય દબાણ કે રાજકીય સંકેતો પર આધારિત નહીં પરંતુ દેશની જરૂરિયાતો, કિંમતની પરિસ્થિતિ અને લોજિસ્ટિકલ સુવિધાઓને ધ્યાનમાં રાખીને લેવાય છે. તેમણે ઉર્જા સુરક્ષા અને વિદેશી મુદ્રાની સ્થિરતા ભારત માટે જીવનરેખા સમાન હોવાનું પણ ઉમેર્યું.
સીતારમણે ઇન્ટરવ્યુ દરમિયાન સમજાવ્યું કે ભારત વિશ્વનો ત્રીજો સૌથી મોટો તેલ આયાતકાર છે અને તેના કુલ આયાત ખર્ચમાં ક્રૂડ ઓઇલનો સર્વાધિક હિસ્સો છે. ક્રૂડ અને રિફાઇન્ડ ઇંધણ પર ભારતનો વિશાળ ખર્ચ થાય છે અને આ કારણે દેશ માટે તેલ ક્યાંથી ખરીદવું એ મુદ્દો સંપૂર્ણપણે આર્થિક વ્યૂહરચનાનો ભાગ છે. તેમણે કહ્યું કે જ્યાંથી સસ્તું, સ્થિર અને વિશ્વસનીય પુરવઠો મળશે ત્યાંથી ભારત તેલ લાવશે, અને આ મામલે ભારતને કોઈ પણ દેશની મંજૂરી લેવાની જરૂર નથી. આ સંદર્ભમાં તેમણે સ્પષ્ટતા કરી કે રશિયા પાસેથી તેલ ખરીદવું ભારતની લાંબા ગાળાની વ્યૂહરચનાનો ભાગ છે અને ભારત તેને નિસંદેહ ચાલુ રાખશે.
રશિયા-યુક્રેન યુદ્ધ પહેલા ભારત રશિયાથી માત્ર 1 ટકા જેટલું ક્રૂડ ઓઇલ આયાત કરતું હતું. પરંતુ પશ્ચિમી દેશોએ મોસ્કો સામે પ્રતિબંધો લાદ્યા બાદ અને રશિયાએ ભારે ડિસ્કાઉન્ટ ઓફર કર્યા બાદ ભારતે આ તકનો લાભ લીધો અને તેની આયાતમાં નોંધપાત્ર વધારો કર્યો. હાલની સ્થિતિએ ભારત રશિયન દરિયાઈ ક્રૂડનો વિશ્વનો સૌથી મોટો ખરીદદાર બની ગયો છે. જ્યારે યુરોપિયન દેશોએ રશિયન તેલ ખરીદવાનું બંધ કર્યું ત્યારે તેમણે ભારતીય રિફાઇનરીઓમાંથી રિફાઇન્ડ ઉત્પાદનો ખરીદવાનું શરૂ કર્યું, જેનાથી ભારતની ઉર્જા વ્યૂહરચના વધુ મજબૂત બની. આથી સાબિત થાય છે કે ભારત પોતાના હિતોને કેન્દ્રસ્થાને રાખીને વૈશ્વિક બજારમાં પોતાનું સ્થાન સુનિશ્ચિત કરી રહ્યું છે.
નાણામંત્રીએ વધુમાં ભારપૂર્વક જણાવ્યું કે આજના સમયમાં સમગ્ર વિશ્વ આર્થિક અને રાજકીય દૃષ્ટિએ ભારતને ગંભીરતાથી જોઈ રહ્યું છે. એવા સમયે ભારતમાં કોઈએ પણ જૂની ઓપનિવેશિક વિચારસરણીનો બચાવ ન કરવો જોઈએ. આત્મનિર્ભર ભારતનું સાચું સાર્થક ત્યારે જ થશે જ્યારે દેશ આત્મસન્માનને સર્વોચ્ચ પ્રાથમિકતા આપશે. તેમણે જણાવ્યું કે બ્રિટિશ શાસન દરમિયાન ‘ભાગલા પાડો અને રાજ કરો’ જેવી નીતિઓએ ભારતને નબળું બનાવ્યું હતું, પરંતુ હવે સ્વતંત્ર ભારતે એ વિચારસરણીને પૂર્ણતઃ છોડવી જોઈએ. તેમણે કહ્યું કે આજે ભારતને પોતાની ઓળખ, સ્વાભિમાન અને પ્રગતિ પર ગર્વ હોવો જોઈએ, વિદેશી દલીલો કે દબાણને સ્વીકારવાની જરૂર નથી. આ રીતે સીતારમણનું નિવેદન સ્પષ્ટ કરે છે કે ભારત હવે વૈશ્વિક મંચ પર પોતાની શરતો પર કામ કરી રહ્યું છે અને પોતાની ઊર્જા સુરક્ષા તથા આર્થિક હિતને સૌથી ઉપર રાખે છે.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
