પાકિસ્તાનના ખૈબર પખ્તૂનખ્વા પ્રાંતમાંથી મોટી ખબર સામે આવી છે, જ્યાં પ્રતિબંધિત આતંકી સંગઠન લશ્કર-એ-તૈયબાના ટોપ કમાન્ડર શેખ યુસુફ આફ્રિદીની અજ્ઞાત બંદૂકધારીઓ દ્વારા ગોળી મારી હત્યા કરવામાં આવી છે. અચાનક થયેલા આ હુમલામાં હુમલાખોરોએ તાબડતોડ ફાયરિંગ કર્યું હતું, જેના કારણે આફ્રિદી ઘટનાસ્થળે જ મોતને ભેટ્યો હતો.
નજીકથી ગોળીબાર, બચવાની તક ન મળી
માહિતી મુજબ, શેખ યુસુફ આફ્રિદી પર અજાણ્યા હુમલાખોરોએ ઘેરીને અંધાધૂંધ ગોળીબાર કર્યો હતો. હુમલો એટલો ઝડપી હતો કે તેને બચવાની કોઈ તક મળી નહોતી. આ ઘટના બાદ વિસ્તારમાં ભયનો માહોલ ફેલાયો છે.
આફ્રિદીને આતંકી સંગઠનના પ્રમુખ હાફિઝ સઈદનો નજીકનો સહયોગી માનવામાં આવતો હતો.
લશ્કર નેટવર્કનો મુખ્ય સંચાલક
શેખ યુસુફ આફ્રિદી ખૈબર પખ્તૂનખ્વા વિસ્તારમાં લશ્કર-એ-તૈયબાના નેટવર્કનું સંચાલન કરતો હતો અને સ્થાનિક બ્રાન્ચ હેડ તરીકે પણ તેની ઓળખ હતી. તેના મૃત્યુને સંગઠન માટે મોટો ઝટકો માનવામાં આવી રહ્યો છે.
સુરક્ષા એજન્સીઓ તપાસમાં
હુમલા બાદ પાકિસ્તાની સુરક્ષા એજન્સીઓ ઘટનાસ્થળે પહોંચી ગઈ હતી અને સમગ્ર વિસ્તારને કોર્ડન કરીને તપાસ શરૂ કરી છે. અત્યાર સુધી હુમલાખોરોની ઓળખ સામે આવી નથી અને કોઈ સંગઠને આ હુમલાની જવાબદારી સ્વીકારી નથી.
પ્રાથમિક રીતે આ ઘટનાને ટાર્ગેટ કિલિંગ તરીકે જોવામાં આવી રહી છે.
2026માં આતંકીઓ પર વધતા હુમલા
ઉલ્લેખનીય છે કે વર્ષ 2026ની શરૂઆતથી પાકિસ્તાનમાં આતંકી સંગઠનો સાથે જોડાયેલા આશરે 30 જેટલા આતંકીઓ અને કમાન્ડરો ઠાર થઈ ચૂક્યા છે. લાહોર, કરાચી અને ખૈબર પખ્તૂનખ્વા જેવા વિસ્તારોમાં સતત આવી ઘટનાઓ સામે આવી રહી છે.
અગાઉના હુમલાઓનો સિલસિલો
આ પહેલાં એપ્રિલ મહિનામાં લશ્કર-એ-તૈયબાના સહ-સંસ્થાપક અને હાફિઝ સઈદના નજીકના સાથી અમીર હમઝા પર પણ લાહોરમાં હુમલો થયો હતો, જેમાં તે ગંભીર રીતે ઘાયલ થયો હતો. જોકે, આ હુમલાના જવાબદારો અંગે પણ હજી સુધી કોઈ સત્તાવાર માહિતી બહાર આવી નથી.
અમારી યુટ્યુબ ચેનલને લાઈક, શેર અને સબસ્ક્રાઈબ કરશો
हमारी यूट्यूब चैनल को लाइक, शेयर और सब्सक्राइब करे
Like, Share and Subscribe our YouTube channel
